مىنە، جەر ماسەلەسى بويىنشا كوميسسيا قۇرىلدى. وسىلاي شەشكەن دۇرىس سياقتى ءبىر قاراعاندا. بىراق، بۇل كوميسسيا ەشتەڭەنى شەشە الماسا شە، كەرىسىنشە، جەر داۋىن ۇدەتىپ جىبەرسە شە؟ جەر ماسەلەسىندە بۇرىننان قاتتالىپ، جينالىپ قالعان بارلىق تۇيتكىل مەن سۇراقتاردى قوپارىپ، ءبارىن بىراق شىعارسا شە؟ جو-جوق، كوميسسيانىڭ قۇرامىنا، ولاردىڭ ۇلتجاندىلىعى مەن ازاماتتىق ۇستانىمىنا، بۇل جولى تاباندى،ءارى پاراساتتى بولاتىنىنا مەنىڭ ەشقانداي كۇمانىم جوق. ءتىپتى، ماسەلە ولاردا دا ەمەس، ماسەلە - قوعامدا، حالىقتا بولىپ تۇر.

بۇعان دەيىن كوپشىلىكتى توپتاستىرعان، بىرىكتىرگەن: "جەر ساتىلماسىن!" دەگەن ءبىر-اق ۇران ەدى. بۇل جەردە، مەنشىك جەرى بار، مەنشىك جەرى جوق - بارلىق قازاق، جەردىڭ، شەت ەلدىكتەرگە، وزگە ەلدىڭ ازاماتتارىنا ساتىلۋىنا قارسى بولدى. ءتىپتى، جالعا بەرىلۋىنە قارسى شىقتى. بۇل تۇسىنىكتى. بۇل جونىندە كوميسسيا ءبىر شەشىمگە كەلىپ، پارلامەنتكە ۇسىنىس جاساي الادى. ال، بىراق، سول ۇراننىڭ تاساسىندا، قالقاسىندا: "جەردى مەملەكەت مەنشىگىنە قايتارۋ كەرەك" دەگەن ۇران قوسا ايتىلىپ جاتتى ەمەس پە؟ بۇل ۇران، مىنا كوميسسيا قۇرىلادى دەگەننەن باستاپ، ءتىپتى قاتتى ەستىلە باستادى. ەرتەڭ كوميسسيا قۇرامى ءدال وسى ماسەلەگە بايلانىستى قاتتى ايتىساتىن بولادى. سەبەبى، ەگەر، وسى ماسەلەنى تياناقتامايتىن بولسا، وندا "جەر ساتىلماسىن!" دەگەن ۇرانعا سوڭعى نۇكتە قويىلماعانداي بولادى. جەردى شەت ەلدىكتەرگە ساتۋعا قارسىلار كەلىسكەنمەن، ەلىمىزدە - جەر ساۋداسىنا قارسىلار، توقتامايدى. كوميسسيادا بولاتىن ايتىس جەر داۋىن توقتاتۋشى ەمەس، ۇدەتۋشى كاتاليزاتور بوپ كەتە مە دەپ كۇدىكتەنەتىنىم سوندىقتان. وسى ەكى ماسەلەنىڭ اراجىگىن اشىپ الۋ كەرەك كوميسسيا مۇشەلەرىنە. ويتكەنى، جالپى، "جەر ساتىلماسىن" داۋىن بۇل كوميسسيا شەشە المايدى. بۇل - ءبىر كۇندە، ۇرانمەن، ايتىسپەن شەشىلە قوياتىن دۇنيە ەمەس. جەر مەنشىگى - بارلىق مەملەكەتتىڭ ىرگەتاسى. ونى شايقاۋ - مەملەكەتتى قۇلاتۋ دەگەن ءسوز. كەڭەس ۇكىمەتى دە قۇرىلعان كۇننىڭ ەرتەڭىندە "جەر تۋرالى دەكرەت" قابىلدادى ەمەس پە؟ بارلىق جەردى مەملەكەت مەنشىگىنە تارتىپ الدى. سوڭى نەگە ۇلاسقانى بەلگىلى عوي. ازامات سوعىسى تۋدى. "مال اشۋى - جان اشۋى". ءبىر مەملەكەتتىڭ ازاماتتارى ەكىگە جارىلىپ، اقتار مەن قىزىلدار بولىپ سوعىستى، ءبىرىن-ءبىرى اياۋسىز قىرىپ تاستادى. مىنە "جەردى مەملەكەت مەنشىگىنە قايتارۋ كەرەك" دەگەن ۇراننىڭ جەتكىزەر جەرى سول عانا. بۇل ۇراندى كوتەرۋشىلەر، مەملەكەتىنە قاستىق ويلايتىن ناعىز قاسكويلەر، كورسوقىرلار، ازامات سوعىسىنا - ارانداتۋشىلار. اينالايىن-اۋ، كولحوز-سوۆحوز تاراپ، اركىم پايلارىن، ۇلەستەرىن الىپ قويعالى قانشا ۋاقىت ءوتتى. ونى باسقا بىرەۋگە ساتتى. ول جەردى يگەردى. ەندى، ايدالاداعى بىرەۋگە وڭايلىقپەن بەرە مە؟ اتىسادى، الىسادى، بىراق بەرمەيدى. ءبىر اۋىلداعى اعايىنداردىڭ ءوزى قىرىقپىشاق بولماي ما؟ قالاداعى ءاربىر قازاقتىڭ، اۋىلدا فەرمەر تۋىستارى بار. ونىڭ جەرىن تارتىپ العاندا - ۇتارى قايسى؟ سوندىقتان، بۇل ۇران، ەندى، ۇلتتى ەكىگە جارىپ جىبەرەيىن دەپ تۇر. سولاردىڭ ارانداتۋىنان اباي بولايىق.

راس، شۇرايلى جەردى مىڭ گەكتارلاپ باۋىرىنا باسىپ قالعان جەمقورلار، پايداكۇنەمدەر، لاتيفۋنديستەر بار. بىراق، سولارعا بولا اشۋىمىزدى، ءوزى از جەرىن ەمىپ، ءوزىن دە، وزگەنى دە اسىراپ وتىرعان اعايىنعا اقتارىپ الىپ جۇرمەيىك. ال، لاتيفۋنديستەردەن جەردى قايتارىپ الۋدىڭ ەكونوميكالىق، سالىق مەحانيزمدەرى بويىنشا ۇسىنىسىمدى، بۇعان دەيىنگى "جەر اشۋى - جان اشۋى" اتتى ماقالامدا تولىق جازعان بولاتىنمىن. ال ازىرشە، كوميسسيا مۇشەلەرىنەن تىندىرىمدى، تياناقتى جۇمىس كۇتەيىك. بىراق،"جەر مەملەكەت مەنشىگىنە قايتارىلسىن!" دەگەن ارانداتۋشى ۇراندى ورىنداتۋدى تالاپ ەتپەي-اق قويايىق. بۇل - مەنىڭ، ازامات جانە قازاق رەتىندەگى نىق ۇستانىمىم. شىنىمەن-اق، اق پەن قارانىڭ ارا جىگىن اجىراتا ءبىلىپ، ەلىمىزدى ازامات سوعىسىنان الىس ۇستايىقشى. جەر ءوز ازاماتتارىمىزدىڭ قولىندا قالسىن! كوميسسيانىڭ جۇمىسىن توقتاتپاي، لاتيفۋنديستەردەن جەردى قالاي قايتارۋ ماسەلەسىن اقىرىنداپ شەشىپ الارمىز.

Cەرىك جانبولات

Facebook-تەگى پاراقشاسىنان