ەلباسى سونداي-اق، حالىق اراسىندا ءتۇسىندىرۋ جۇمىستارىنىڭ دۇرىستاپ جۇرگىزىلمەگەنىن دە ايتتى. 

«حالىققا اشىق ۇكىمەتتى ءتۇسىندىرۋ جۇمىستارى اقساپ جاتىر. ءبىز وندىرەتىن، جاسايتىن ىستەردى حالىققا ءتۇسىندىرۋ قاجەت. بارلىعى بىردەي كەشكە قاراي تەلەديدار الدىندا وتىرمايدى. ولارعا جۇمىس ىستەۋ كەرەك. بارلىعى بىردەي گازەت تە وقىمايدى. بىزدە «نۇر وتان» پارتياسى، اسسامبلەيا، جەرگىلىكتى اتقارۋشى ورگاندار بار. ولار اۋىلداردا، اۋدانداردا مۇنىڭ نە ءۇشىن قابىلدانعانىن ءتۇسىندىرۋى كەرەك. الدىمەن قر ءبىلىم جانە عىلىم مينيسترلىگى اتالعان ماسەلەلەردى وقىتۋشىلارمەن تالقىلاۋى قاجەت. مەنىڭ ويىمشا، قازاق ءتىلى مەن ادەبيەتىن ءبىر ءپان جاساۋعا، ورىس ءتىلى گراماتيكاسى مەن ادەبيەتىن، تاريح پەن گەوگرافيانى ءبىر ءپان رەتىندە قوسقان دۇرىس»، - دەيدى ن.نازارباەۆ.

ايتا كەتەيىك، جۋىردا قر ءبىلىم جانە عىلىم ءمينيسترى ەرلان ساعاديەۆ جاڭا وقۋ جىلىنان باستاپ مەكتەپتەر 5 كۇندىك وقىتۋ جۇيەسىنە كوشەتىنىن جانە جازعى دەمالىستىڭ ۋاقىتى ءبىر ايعا قىسقاراتىنىن ايتقان بولاتىن. سونداي-اق، رەفورماعا سايكەس، 2019 جىلدان باستاپ بۇكىل مەكتەپتەر ءۇشتىلدى ءبىلىم بەرۋ جۇيەسىنە كوشۋى ءتيىس. الايدا، اتالعان رەفورمالار حالىق اراسىندا قولداۋ تاپپاي، اتا-انالار ەلباسىنىڭ اتىنا قارسىلىق پەتيتسياسىن جازعان ەدى.

ەندى قالىڭ بۇقارا قازاق ءتىلى مەن ادەبيەتى پاندەرىنىڭ بىرىكتىرىلگەنىن قولداي ما؟ ءۇش ءتىلدى مەكتەپتەر جۇيەسىن قالىپتاستىرعان كەزدە نەگىزگى تەحنيكالىق پاندەر اعىلشىن تىلىندە وتەتىنى بەلگىلى. قازاق تىلىندە وتەتىن ەكى بىردەي ءپان ءبىر پانگە قىسقارىپ قالسا، مەكتەپتەگى قازاق ءتىلىنىڭ اياسى تاعى دا تارىلا تۇسپەي مە؟ گەوگرافيا مەن تاريح پاندەرى دە ءبىر ءپان بولۋى مۇمكىن. باستاپقىدا گەوگرافيا ءپانى اعىلشىنشا، قازاقستان تاريحى ءپانى قازاقشا وتەتىنى ايتىلعان. بۇل ءپان سوندا اعىلشىنشا وتە مە، قازاقشا ما؟ اعىلشىنشا وتسە، قازاق تىلىندە وقيتىن ءپان قالمايىن دەپ تۇر.

ءشارىپحان قايسار

Abai.kz