دۋالدىق ءبىلىم بەرۋ جۇيەسىنىڭ باستى ماقساتى – كاسىپورىنداردىڭ تالابىنا ساي ماماندار دايىنداۋ.

2014 جىلدان باستاپ  ەلىمىزدە تەحنيكالىق جانە كاسىپتىك كادرلاردى دايارلاۋ   ماقساتىندا دۋالدىق ءبىلىم بەرۋ جۇيەسى ەنگىزىلدى. وسىنىڭ ناتيجەسىندە ەلىمىزدىڭ وڭىرلەردەگى تەحنيكالىق جانە كاسىپتىك كوللەدج ستۋدەنتتەرى ءوندىرىس وشاقتارىندا تەوريالىق بىلىمدەرىن شىڭداۋعا مۇمكىندىك

الۋدا.  اسىرەسە، ءبىلىم ورىندارى كوپ شوعىرلانعان الماتى وبلىسىندا دۋالدىق ءبىلىم بەرۋ ساياساتى جۇيەلى جۇرگىزىلە باستادى.  قازىرگى تاڭدا وبلىستا 67 تەحنيكالىق جانە كاسىپتىك ءبىلىم بەرەتىن وقۋ  ورنى بار. وڭىرلىك كاسىپكەرلەر پالاتاسى وسى ءبىلىم وردالارى مەن ايماقتاعى كاسىپورىنداردىڭ ىنتىماقتاستىعىن نىعايتۋ ءۇشىن ىرگەلى جۇمىستار اتقارىپ وتىر.       

الماتى وبلىسى وكپ-نىڭ ادامي رەسۋرستى دامىتۋ ءبولىمىنىڭ باسشىسى الماگۇل وڭعارباەۆانىڭ ايتۋىنشا، الماتى وبلىسىندا دۋالدىق ءبىلىم بەرۋ جۇيەسى اياسىندا ءوندىرىس ورىندارىنا قاجەت مامانداردى  دايىنداۋعا باسىمدىق بەرىلمەك.  «دۋالدىق وقىتۋدىڭ جول كارتاسى» شەڭبەرىندە 18 كوللەدجبەن بىرلەسىپ جۇمىس جاساپ وتىرمىز. بۇگىنگە دەيىن وكپ، كاسىپورىندار جانە  وقۋ ورنىندارى اراسىندا ءۇش جاقتى 90-عا جۋىق كەلىسىمشارت جاسالىپ، دۋالدىق وقىتۋ باعدارلاماسى بويىنشا 90 كاسىپورىن 630 ستۋدەنتتى ءىس-تاجىريبەدەن وتكىزۋگە قابىلدادى.  قازىرگى تاڭدا وندىرىسكە دانەكەرلەۋشىلەر، تىگىن ماشيناسىن جوندەۋشىلەر، جول جوندەۋ جۇمىسشىلارى، تەحنيكالىق كولىكتەردىڭ جۇرگىزۋشىلەرى سەكىلدى ماماندار كوپتەپ قاجەت.  سوندىقتان، وسىنداي تەحنيكالىق كادرلاردى دايىنداۋعا كوڭىل ءبولىپ وتىرمىز»، – دەيدى ول.

قازاقستانداعى  كاسىپورىندار مەن ءوندىرىس وشاقتارىنداعى  ەڭ باستى ماسەلە  – بىلىكتى كادرلاردىڭ جەتىسپەۋشىلىگى.  اسىرەسە كاسىپورىندار شەتەلدەن اكەلىنگەن تەحنولوگيالاردى وندىرىسكە ەنگىزىپ، تەتىگىن تاۋىپ، جۇمىستى الىپ كەتەتىن مامانداردىڭ جوقتىعىنان كوپ زارداپ شەگەدى.

سوندىقتان، كەيبىر كاسىپورىندار وزدەرىنە قاجەتتى كادرلاردى ارنايى ءبىلىمى بار ماماندار شاقىرتىپ وقىتۋدى ءجون سانايدى.  وسى ورايدا، وڭىرلىك كاسىپكەرلەر پالاتاسىنىڭ دانەكەر بولۋىمەن  تەكەلى قالاسىنداعى بىرقاتار كاسىپورىندار  ورتالىق ازيا ۋنيۆەرسيتەتىنەن تەوريالىق ءبىلىم بەرەتىن وقىتۋشىلار شاقىرىپ، بىلىكتىلىكتى ارتتىرۋ كۋرستارىن ۇيىمداستىردى.

«وڭىرلىك كاسىپكەرلەر پالاتاسى 2015 جىلدان باستاپ    «جۇمىسپەن قامتۋ 2020 جول كارتاسى»باعدارلاماسىنىڭ اياسىندا تەكەلىدەگى جەر قويناۋىن پايدالاناتىن بىرقاتار كاسىپورىنداردىڭ ماماندارىنا ارناپ، وقىتۋ كۋرستارىن ۇيىمداستىردى.  شاراعا ورتالىق ازيا ۋنيۆەرسيتەتىنىڭ وقىتۋشىلارى  شاقىرىلىپ، جاڭا تەحنولوگيالار جونىندە دارىستەر وتكىزىلدى. ء سويتىپ، 18 مامان «ۇساتۋ-ۇگىتۋشى جانە سۇرىپتاۋشى ماشينا وپەراتورى» دەگەن سەرتيفيكاتتارعا يە بولدى.  مۇنداي بىلىكتىلىكتى ارتتىرۋ كۋرسىن وتۋگە كەنشىلەر تاراپىنان تاعى 19 ۇسىنىس كەلىپ ءتۇستى.  ايتا كەتەيىك، بۇل مامانداردىڭ وقۋ اقىسىن كاسىپورىنداردىڭ تاراپىنان تولەندى.  سونىمەن بىرگە، تەكەلى تاۋ-كەن كومبيناتىنىڭ 70 كەنشىسى تەمىرتاۋداعى پوليتەحنيكالىق كوللەدجگە وقۋعا جىبەرىلدى.  الداعى ۋاقىتتا تاعى 30 كەنشىنى وقۋعا جىبەرۋ كوزدەلىپ وتىر. بارلىعى دا جۇمىسپەن قامتاماسىز ەتىلەتىن بولادى»، – دەيدى ا.وڭعارباەۆا.

دۋالدىق ءبىلىم بەرۋ جۇيەسىنىڭ باستى ماقساتى – كاسىپورىنداردىڭ تالابىنا ساي ماماندار دايىنداۋ.  وڭىرلىك كاسىپكەرلەر پالاتاسى كاسىپورىن وكىلدەرىمەن اقىلداسا وتىرىپ، قاي باعىتتاعى مامانداردى دايىنداۋ جانە قانداي تالاپتارعا باسىمدىق بەرۋ كەرەكتىگىن ەسەپكە الا وتىرىپ، جۇمىس جاساپ كەلەدى. الداعى ۋاقىتتا ەڭبەك نارىعىنداعى سۇرانىسقا يە ماماندىقتاردى كوللەدجدەرگە ەنگىزىپ، تالاپكەرلەر تارتۋ كوزدەلۋدە.      

وسىلايشا، دۋالدىق وقىتۋ اياسىندا الماتى وبلىسىنداعى كوللەدج ستۋدەنتتەرى كاسىپورىنداردا وندىرىستىك تاجىريبەدەن وتۋگە مۇمكىندىك السا، كاسىپورىن ماماندارى بىلىكتىلىكتى ارتتىرۋ جونىندەگى سەرتيفيكاتتارعا يە بولدى.

Abai.kz