قىرعىزستانداعى "جۇما داۋى"
قىرعىزستان پارلامەنتىنە جۇما نامازى كەزىندە تۇسكى استىڭ ءۇزىلىسىن 12.30-دان 14.30-عا دەيىن سوزۋدى كوزدەيتىن زاڭ جوباسى ءتۇستى. باستاماعا قارسى بولعاندار قىرعىزستاننىڭ زايىرلى مەملەكەت ەكەنىن ەسكە سالادى.
پارلامەنت دەپۋتاتتارىنىڭ كوپشىلىگى زاڭ جوباسى مەملەكەتتىك ورگاندار مەن جەكە كاسىپورىندارداعى قىزمەتكەرلەر مەن جۇمىسشىلاردىڭ قۇقىقتارىن ەسكەرە وتىرىپ ازىرلەنگەنىن ايتادى. زاڭ جوباسىنا قارسىلار زايىرلى مەملەكەتتىڭ ءدىني ەرەجەلەرمەن ەمەس، ازاماتتىق زاڭدارمەن ءومىر سۇرەتىنىن ەسكەرتۋدە.
قىرعىزستان مۇسىلماندارى ءدىني باسقارماسى زاڭ جوباسىنا قولداۋ ءبىلدىردى.قىرعىزستان ءمۇفتيىنىڭ ورىنباسارى اكىمجان ەرگەشوۆ ءدىن ۇستانتىنداردىڭ ءدىن تالاپتارىن ورىنداۋى كەرەكتىگىن، بىراق وسى ءۇشىن زاڭدى بۇزۋعا ءماجبۇر ەكەندەرىن ايتادى. جۇما نامازىنا قاتىسام دەپ جۇمىستان كەشىگىپ، اياعىندا جۇمىسىنان، تابىسىنان ايىرىلىپ جاتقاندار از ەمەستىگىن مىسالعا كەلتىرىپ، زاڭ جوباسى وسى ولقىلىقتىڭ ورنىن تولتىرار ەدى دەگەن سەنىم ءبىلدىردى.
قازىر قوعامدا جۇما نامازىنا قاتىستى پىكىرتالاس قىزعان. كوپشىلىك مەملەكەتتىك مەكەمەلەردە نامازحانا بارىن ايتىپ، شەنەۋنىكتەرگە بولماسا كابيناتتەرىندە ناماز وقۋعا كەڭەس بەرۋدە. ونىڭ ۇستىنە جۇما كۇنى تۇستەن كەيىن دەپۋتاتتار مەن شەنەۋنىكتەردى جۇمىس ورنىنان تابۋ مۇمكىن ەمەس. قاراپايىم انىقتاما الۋ ءۇشىن مەملەكەتتىك مەكەمەگە كەلگەندە كوپ ماماننىڭ ورنىن سيپاپ قالامىز دەيدى جۇرتشىلىق.
اباي-اقپارات
