بۇل تۋرالى «ورتالىق ازياداعى ادام قۇقىقتارى» قاۋىمداستىعىنىڭ جەتەكشىسى نادەجدا اتاەۆا حابارلادى. كەي دەرەك بويىنشا، "نۋريك" ەسىمدى لاقاپ اتىمەن تانىمال نۇرمۇحامماد سادىقوۆ ۇزاق جىلدار بويى وزبەكستان پرەزيدەنتىنىڭ ۇلكەن قىزى گۇلنار كاريموۆانىڭ جەكە ەسەپشىسى بولعان.

ء​ۇش جىل بۇرىن سادىقوۆ بىرىككەن اراب امىرلىكتەرىنەن ۇشىپ كەلگەن بەتتە تاشكەنت اۋەجايىندا تۇتقىندالدى. وعان قارجىلىق الاياقتىق جاسادى دەگەن ايىپ تاعىلدى.

ەستەرىڭىزگە سالا كەتەيىك، ەكى جىل بۇرىن وزبەكستاننىڭ تەرگەۋ ورىندارى پرەزيدەنت قىزىنىڭ ءىرى تەلەكوممۋنيكاتسيالىق كومپانيالاردان پارا الۋىنا قاتىستى جەمقورلىق ىستەرىنە بايلانىسى بار دەگەن ايىپپەن گۇلنار كاريموۆانىڭ بىرقاتار جاقىن ادامىن ۇستاعان ەدى. بۇل جەمقورلىق داۋىمەن قۇراما شتاتتار جانە ەۋروپانىڭ بىرقاتار ەلىنىڭ تەرگەۋ ورىندارى اينالىسۋدا. تۇتقىندالعانداردىڭ اراسىندا گۇلنار كاريموۆانىڭ ازاماتتىق كۇيەۋى رۋستام مادۋماروۆ پەن ونىڭ جەكە كومەكشىسى گايانە اۆاكيان بار.

2014 جىلدىڭ مامىرىندا مادۋماروۆ پەن اۆاكياندى وزبەكستاننىڭ اسكەري سوتى ادام ۇرلادى دەگەن ايىپپەن 9 جانە 6 جىلعا سوتتادى.

ۇرلانعان ادام ءدال وسى نۇرمۇحامماد سادىقوۆ بولاتىن. نادەجدا اتاەۆانىڭ ايتۋىنشا، سادىقوۆ جانە گۇلنار كاريموۆانىڭ ءىستى بولعان وزگە دە جاقىن ادامدارىنا قاتىستى بارلىق سوت وتىرىسى جابىق جاعدايدا وتكەن.