قىرعىزستان پرەزيدەنتى المازبەك اتامباەۆ باستاعان ۇكىمەت مۇشەلەرى مەن ءساۋىر توڭكەرىسى كەزىندە قازا تاپقانداردىڭ تۋىستارى، سول وقيعانىڭ باتىرلارى «اتا-بەيىت» مەموريالدىق كەشەنىندەگى ەسكەرتكىشكە گۇل شوقتارىن قويىپ، دۇعا باعىشتادى.

قىرعىزستاننىڭ بۇرىنعى پرەزيدەنتى قۇرمانبەك باكيەۆ 2010 جىلى 7 ساۋىردە نارازىلىق شاراسىنا شىققان ادامداردى اتۋعا بۇيرىق بەردى. تارتىپسىزدىكتەر كەزىندە 100-گە جۋىق ادام قازا تاۋىپ، 300-دەن استام ادام جارالاندى. قاندى وقيعا تۋرالى سوت ءالى جالعاسۋدا.

پرەزيدەنت المازبەك اتامباەۆ حالىقتىق ءساۋىر رەۆوليۋتسياسىنىڭ كەزەكتى جىلدىعىنا وراي مالىمدەمە جاسادى. مەملەكەت باسشىسى قىرعىزستان تاريحىنداعى 2002 جىلعى 17 ناۋرىز، 2005 جىلدىڭ 24 ناۋرىزى جانە 2010 جىلعى 7 ءساۋىر سەكىلدى ماڭىزدى كۇندەردىڭ ءوزارا بايلانىسىن اتاپ ءوتتى. ونىڭ سوزىنشە، بۇل ءۇش داتا قىرعىزستان حالقىنىڭ ەركىندىك، دەموكراتيا جانە ادىلدىككە ۇمىلعان قيىن دا ەرلىككە تولى جولىنداعى اسۋلار بوپ تابىلادى.

المازبەك اتامباەۆ 7 ءساۋىردى 17 جانە 24 ناۋرىز سەكلدى وزگە تاريحي كۇندەرگە قاراما-قارسى قويعىسى كەلەتىندەردى سىنعا الدى.

«بۇلاي دەۋشىلەر ءىس جۇزىندە ارانداتۋشىلار بوپ تابىلادى. ولار ەلدى سولتۇستىك جانە وڭتۇستىككە بولگىسى، حالىقتى بىرلىگىنەن اجىراتقىسى جانە مەملەكەتتىڭ دامۋىن تەجەگىسى كەلەدى. حالىقتا «يت ۇرەدى، كەرۋەن كوشەدى» دەگەن ءسوز بار. بۇل توبەتتەر قانشا ۇرسە دە، قىرعىزدىڭ كوشى ءوز جولىمەن جۇرە بەرەدى. حالىق كۇرەستە تاپقان جولىمەن جارقىن بولاشاققا قادام باسادى.»، - دەدى ول.

Abai.kz