قوستاناي وبلىسى اكىمىنىڭ بۇرىنعى ورىنباسارى فرۋنزيك اراكەليان پارا الدى دەپ ايىپتالىپ، جەتى جىلعا باس بوستاندىعىنان ايىرىلدى.

قوستاناي اكىمدىگىنىڭ تۇرىن ءۇي-كوممۋنالدىق شارۋاشىلىعى ءبولىمىنىڭ بۇرىنعى باستىعى جەڭىس شينكين مەن «سمۋ-2010» كومپانياسىنىڭ ديرەكتورى الەكساندر بوبروۆنىي وزدەرىنە سەنىپ تاپسىرىلعان مۇلىكتى تالان-تاراجعا ءتۇسىردى جانە جەكە باسىنا يەمدەندى دەگەن ايىپپەن توعىز جانە جەتى جىلعا سوتتالدى.

تەرگەۋ ورىندارى بىلتىرعى جىلدىڭ 20 ساۋىرىندە اراكەليان شينكينمەن بىرگە جەكەمەنشىك كومپانيانىڭ جەتەكشىسىنەن مۇز قالاشىقتارىن تۇرعىزۋعا قاتىستى سايىستا جەڭىپ شىعۋدى قامتاماسىز ەتۋ ءۇشىن، 300 مىڭ تەڭگە الدى دەپ ايىپتاعان. سونىمەن بىرگە، شينكين پارا الدى جانە بەردى، زاڭسىز كاسىپكەرلىكپەن اينالىستى دەپ ايىپتالدى.

بىلتىرعى جىلدىڭ تامىزىندا فرۋنزيك اراكەليان قاماۋعا الىنعاننان كەيىن، قوستانايدىڭ بۇرىنعى اكىمى احمەتبەك احمەتجانوۆ ۇستالعان ەدى. ول پارا العانى، قىزمەت بابىن تەرىس پايدالانعانى جانە كاسىپكەرلىككە كەدەرگى كەلتىرگەنى ءۇشىن ايىپتالادى. ونىڭ ءىسىن قاراۋدى سوت 25 قاڭتاردا باستادى.

Abai.kz