سيريا مەن يراكقا سوعىسۋعا اتتانعان شەتەلدىكتەردىڭ ءبىرازى ءوز وتاندارىنا قايتا ورالۋى مۇمكىن. ويتكەنى، "يسلام مەملەكەتى" لاڭكەستىك ۇيىمى قارجىلىق داعدارىس سالدارىنان ءوز جاۋىنگەرلەرىنە تولەيتىن قاراجات تاپپاي وتىر دەپ جازادى The Washington Post-قا سىلتەمە جاساعان skifnews.kz.

باسىلىمنىڭ مالىمەتىنشە، بىرنەشە ايعا جالعاسقان اۋە سوققىلارىنىڭ سالدارىنان دايش-تىڭ مۇناي ينفراقۇرىلىمدارى مەن قارجى ينستيتۋتتارى ايتارلىقتاي زاقىمدانعان. ەندى، لاڭكەستىك ۇيىم باسشىلارى ءوز سودىرلارىنا تولەيتىن جالاقىنى تاۋىپ بەرە الماي وتىرعان كورىنەدى. ونىڭ باستى دالەلى - دالا كومانديرلەرى اراسىنداعى ءوزارا تەكەتىرەستەر، جەمقورلىق، باسشىلىققا باعىنباۋ جانە ۇرلىق-قارلىق.

اقشانىڭ جوقتىعى ۇيىمعا جاڭادان قوسىلعان جاۋىنگەرلەردىڭ جالاقىسىن ەكى ەسەگە قىسقارتۋعا ماجبۇرلەگەن. ال، ىشتەگى دەرەككوزدەردىڭ مالىمەتىنشە، لاڭكەستىك ۇيىمعا قاراستى ءبىراز جاساق بىرنەشە ايدان بەرى جالاقى الا الماي كەلەدى. ۇيىم باسشىلارى جوقشىلىقتىڭ ورنىن تولتىرۋ ءۇشىن وزدەرىنە قاراستى ەلدىمەكەن تۇرعىندارىنا سالىقتى بىرنەشە ەسەگە كوبەيتكەن.

بۇعان دەيىن بەلگىلى بولعانداي، "يسلام مەملەكەتى" سيريا مەن يراك جەرىندەگى مۇنايدى تۇركياعا ارزان باعامەن ساتىپ كەلگەن. سونىڭ ناتيجەسىندە ۇيىمنىڭ قارجىلىق جاعدايى الدەقايدا جاقسى بولاتىن. ال، ايماققا رەسەي اسكەرى كىرگەلى بەرى مۇناي ساۋداسى توقتاپ قالدى. رف قورعانىس مينيسترلىگىنىڭ رەسمي وكىلى يگور كوناشەنكوۆتىڭ ايتۋىنشا، قارجى تاپشىلىعىنان "يسلام مەملەكەتى" قاتارداعى ساربازداردىڭ جالاقىسىن ءۇش ەسەگە دەيىن قىسقارتىپ تاستاعان.

باتىس پەن رەسەي ساراپشىلارىنىڭ پىكىرىنشە، "يسلام مەملەكەتىندەگى" داعدارىس سالدارىنان ونىڭ ساپىندا سوعىسىپ جۇرگەن شەتەل ازاماتتارى ەلدەرىنە كەرى قايتۋى ابدەن مۇمكىن. وسى رەتتە ەلىمىزدەن سيرياداعى سوعىسقا 500-دەي قازاقستاندىقتىڭ كەتىپ قالعانىن ايتا كەتۋ كەرەك. ولاردىڭ قاتارىندا ايەلدەر مەن بالالار سانى كوپ.

Abai.kz