تانىمال تەلەجۇرگىزۋشى دانا نۇرجىگىت وتكىر سىننىڭ استىندا قالعان "91" توبىنا قاتىستى Instagram جەلىسىندە ءوز كوزقاراسىن ءبىلدىردى.

"ەربولات بەدەلxانعا ايتارىم: ون جىلدان استام تاڭداعان جولىنان جاڭىلادى، تاباندى ەڭبەك ەتىپ، ءبىر كۇن كول، ءبىر كۇن ءشول بولاتىن ءناسىبىن بۇكىل توبىنا جۇمساپ جۇرگەن ەربولاتقا ورنىمنان تۇرىپ قول سوعام. وعان دا كەزىندە قانشا ادام لاپ بەرىپ، "مىنا ىستەپ جۇرگەنىڭ قاتە" دەگەن ەدى، ول ءوزىنىڭ ماقساتىنان باس تارتقان جوق. بىرجاقتى قىڭىرلىق، ستەرەوتيپتىك سانا-دامۋدىڭ جولى ەمەس. اسىرەسە ونەردە!", - دەپ جازدى دانا نۇرجىگىت.

بۇدان كەيىن تەلەجۇرگىزۋشى رينات زايىتوۆتىڭ وكتەم سوزدەرىنە سابىرلىق تانىتقان ەربولاتتى قولدايتىنىن ايتتى.

"زايىتوۆتىڭ "91" توبىنىڭ سىرت كەلبەتىن سىناپ، ءتىل تيگىزىپ، "جيىركەنەمىن" دەگەن اۋىر ءسوزىن سابىرلىقپەن تىڭداپ، جۇدىرىق الا جۇگىرمەي (ونى ىستەسە دە تۇسىنەر ەدىم) ميىعىنان عانا كۇلىپ قويىپ ەموتسياعا، اشۋعا جول بەرمەي جاۋاپ بەرىپ وتىرعان ەربولات مەن ءۇشىن وپپونەنتىنەن الدەقايدا جوعارى، مادەنيەتتى", - دەپ ويىمەن بولىسكەن جۇرگىزۋشى كوپشىلىكتىڭ سىنى ارقىلى پروديۋسەر توبىن شىڭداپ الدى دەگەندى مەڭزەدى.

"ول قول استىنداعى توپتى وسىلايشا سپارينگكە شىعارىپ الدى. مۇزداي دۋشتىڭ استىنا تۇرعىزدى. سىنادى. "...شىدايسىڭ با مەنىمەن دوستاسۋعا، جالاڭ اياق سۋ كەشىپ، تاس تاسۋعا", دەپ مۇقاعالي اقىنشا سەرىكتەستەرىنە سۇراقتى توتەسىنەن قويدى. شاش وسەر، بوياۋى جۋىلار، تريكو شالبار بوپ وزگەرەر. بىراق، اراق ءىشىپ، ەسىرتكى تارتىپ ەسىرمەگەن، ونەردە ءوز جولىن ىزدەپ، ءوسىپ كەلە جاتقان جاستاردى وسىنشاما تالاپ، مۇسىركەتىپ "مەن سياقتى كوستيۋم شالبار كيمەيسىڭ بە، شاشتى دۇرىستاپ قىسقارتپايسىڭ با؟" - دەپ جەر شۇقىتىپ قويۋ، قاز-قاز تۇرىپ كەلە جاتقان بالاعا،"نەگە جۇگىرىپ كەتپەيسىڭ؟" دەگەنمەن تەڭ", - دەيدى تەلەجۇرگىزۋشى.

اۆتور كورەرمەن ءبىر كەزدەرى Ninety one توبى سياقتى  "ا-ستۋديو" توبىن دا تۇسىنبەگەنىن مىسالعا كەلتىردى.

"كونفورميستەر قاشان دا بولعان، بولا دا بەرەدى. ولاردى تىڭداساق، ەلدەن ەرەك، الىستان اساۋ مىنەزىن بىلدىرەتىن ۇزىن شاش قويعان ءانشى، اقىندارىمىز - باتىرxان، جاراسقاندار، قادىرلار قايدا بىزگە؟ كونفورميستەردى تىڭداساق، سىعان قىزى كارمەندى وپەرانىڭ باس كەيىپكەرى ەتىپ، كورەرمەننىڭ ىزاسىن تۋدىرعان بيزە تۋماس ەدى. "جالاڭ اياق سىعاننىڭ سايقالىن وپەراعا ارقاۋ ەتكەن دارىنسىز" دەگەن جامان اتقا قالعان بيزە - بۇگىن ەل اۋىزىنداعى كلاسسيك. "ارايدان" كەتىپ، "الما-اتا ستۋديو" بولعان سەركەباەۆ بايعاليدىڭ ءوزى مۇندايدى باستان وتكەرگەن. احبك سارايىنىڭ كونتسەرت زالىنداعى العاشقى پرەمەراسىنان xالىق تۇرىپ-تۇرىپ كەتىپ قالعان. تۇسىنبەگەن. شاشى جالبىراعان جىگىتتەر، مايكىشەڭ تۇرىپ ءان سالعان باتىرxاندى بىرەۋ ەسكە السا، سول بىزدەر. ءبىزدىڭ ۇرپاق. ايتا بەرسە كوپ قوي", - دەپ جالعاستىردى ويىن جۋرناليست.

سونداي-اق دانا نۇرجىگىت قوعام وكىلدەرىنە جاس ءانشى جىگىتتەردى سىناسا، نامىسقا ءتيىپ ەمەس، مادەنيەتتى سىناۋدى ۇسىندى.

"ونەردە ۇقساستىقتان جامانى جوق! سىناساق "جيىركەنەمىن" دەگەن ادامي نامىسقا تيەتىن، كوشەدەگى بەتجىرتىستىڭ لەكسيكونىنا سۇيەنىپ ەمەس، كونسترۋكتيۆتى، مادەنيەتتانۋ دەگەن عىلىمعا جۇگىنىپ وتىرىپ دايەكتى دالەل كەلتىرىپ وتىرىپ سىنايىق!" - دەدى نۇرجىگىت.

دەرەككوز: Nur.kz

Abai.kz