بيىل الماتىنىڭ 1000 جىلدىق مەرەيتويىن تويلاۋعا ورتا ازيا، الىس جاقىن شەتەلدەن كەلەتىن سۋرەتشىلەر دە ءوز ۇلەسىن قوسپاق، - دەپ جازادى قازاقپارات سايتى.

مەرەيتويدى تويلاۋ جوسپارى اياسىندا ساۋىردە «مۋرالى الماتى» عيماراتتاردىڭ قاسبەتىن كوركەم سۋرەتپەن بەزەندىرۋ فەستيۆالى باستالادى.

ءساۋىر بويى قالاداعى كورنەكتى عيماراتتار مەن تۇرعىن ۇيلەردىڭ قاسبەتتەرى سۋرەتشىلەردىڭ تۋىندىلارىمەن بەزەندىرىلەتىن بولادى. ونىڭ ىشىندە جاس سۋرەتشىلەردىڭ ونەرى دە سىنالادى.

جوبا بويىنشا بارلىق اۋداندار قامتىلماق. شىعارماشىلىق تاقىرىبى قازاقستاننىڭ تاۋەلسىزدىگىنە 25 جىل تولۋىن، ۋنيۆەرسيادا مەن ەكسپو حالقارالىق شارالارىن، الماتىنىڭ 1000 جىلدىق مەرەيتويىن قامتيتىن بولادى.

ايتا كەتۋ كەرەك، وسى ماقساتتا قالاعا قازاقستاننىڭ تۇكپىر-تۇكپىرىنەن جۇزدەگەن بالا جينالدى. «كونە دە جاس الماتى» فەستيۆالى بارىسىندا بالالار بەينەلەۋ ونەرىنەن ءوز شەبەرلىكتەرىن تەك قاعاز بەتىندە عانا ەمەس، قالالىق نىسانداردا دا باقىلاپ كورمەك.

بۇعان دەيىن دە الماتىدا وسى تەكتەس مادەني شارالار وتكەنىن ايتا كەتۋ كەرەك.

«بۇل فەستيۆال بۇرىنعى وتكەن مادەني شارالاردىڭ ءداستۇرلى جالعاسى. مەدەۋ مەن شىمبۇلاقتىڭ اراسىن كوركەم بەزەندىرۋ تۋرالى يدەيا اكىمگە ەسەپتى كەزدەسۋ كەزىندە ايتىلدى. اكىم يدەيانى قولدادى. اكتسيا «سۇيكىمدى بالالاردان  سۇيىكتى الماتىعا» دەپ اتالدى. ەگەر، بۇرىن تەك عيماراتتاردىڭ قورشاۋىن، قابىرعالاردى عانا بەزەندىرسەك، بيىل عيماراتتاردىڭ قاسبەتىن دە ارلەيتىن بولامىز. بۇل جۇمىسقا ارينە، كاسىبي سۋرەتشىلەر كىرىسەدى»، - دەدى «بالالار بەيبىتشىلىكتى بەينەلەيدى» قوعامدىق قورىنىڭ ديرەكتورى ءمولدىر بەكجان.

جاس سۋرەتشىلەردىڭ جۇمىسىن مەدەۋدەن شىمبۇلاققا باعىتتالعان جولدا، №2 بالالار كلينيكالىق اۋرۋحاناسىنىڭ سىرتىندا، وقۋشىلار سارايىنىڭ ەرتەگىلەر زالىندا، №2 بالالار ءۇيىنىڭ ىشكى دالىزىندە، ء«ۇمىت» ءۇيىنىڭ تابيعي بۇرىشىندا، ءا.قاستەەۆ اتىنداعى بەينەلەۋ ونەرى جانە تەحنيكالىق ديزاين مەكتەبىنىڭ سىرتقى قاسبەتىنەن كورۋگە بولادى.

اتالعان جوبا «بالالار بەيبىتشىلىكتى بەينەلەيدى» قوعامدىق قورى مەن يۋنەسكو-نىڭ مادەنيارالىق جانە شىعارماشىلىق ءبىلىم وبسەرۆاتورياسىنىڭ، الماتى اكىمدىگى مەن «Tikkurila» كومپانياسىنىڭ قولادۋىمەن جۇزەگە اسادى.

ەستەرىڭىزگە سالا كەتسەك، يۋنەسكو باس كونفەرەنتسياسىنىڭ 38-ءشى سەسسياسىنىڭ شەشىمىمەن الماتى قالاسىنىڭ 1000 جىلدىعىن مەرەكەلەۋ يۋنەسكو-نىڭ 2016 جىلعى مەرەيتويلىق جانە اتاۋلى كۇندەر كۇنتىزبەسىنە رەسمي ەنگىزىلدى. وسىعان بايلانىستى الماتى قالاسىنىڭ مادەنيەت باسقارماسى جىل بويى وتەتىن مادەني شارالاردىڭ ءتىزىمىن جاسادى. بيىل ۇزىن سانى 100-گە تارتا مادەني شارا وتپەك.

اباي-اقپارات