امەريكانىڭ New York Post گازەتى "جىلقى ەتى مەن قىمىز – حالقىنىڭ ەڭ جەڭسىك تاعامى سانالاتىن ءارى ساشا بارون كوەننىڭ كەيىپكەرى "بورات" تۋعان ورتالىق ازيانىڭ شاعىن ەلىندە سەيسەنبى كۇنى McDonald's ءوزىنىڭ العاشقى مەيرامحاناسىن اشتى" دەپ جازدى. گازەت قازاقستاندا امەريكالىق Starbucks كوفەحانالار جەلىسى مەن فرانتسيانىڭ Carrefour سۋپەرماركەتتەر جەلىسى اشىلعانىن دا حابارلاعان.

ۇلىبريتانيانىڭ Daily Telegraph گازەتى "كەشە قازاقستاننىڭ استاناسىندا العاشقى McDonald's اشىلدى، فري كارتوشكاسى، بيۋرگەر مەن McDonald's جەلىسىنىڭ قۇرامى قۇپيا تۇزدىعىنىڭ ءدامىن العاش تاتىپ كورۋ ءۇشىن جۇرت ۇزاق-سونار كەزەككە تۇردى. بۇل كورىنىس 2006 جىلى كومەديالىق فيلم ايگىلى ەتكەن ويدان شىعارىلعان قازاقستاندىق ءتىلشى بوراتقا "امەريكانى ۇلى ەلگە اينالدىرعان نارسە" رەتىندە ءسوزسىز ۇنار ەدى" دەپ جازادى.

ۇلىبريتانيانىڭ Mirror گازەتىنىڭ "McDonald's جەلىسىنىڭ قازاقستانداعى العاشقى مەيرامحاناسى اشىلۋ راسىمىنە جۇزدەگەن ادام كەلدى، بىراق اس مازىرىندە ۇلتتىق تاعام جوق" دەگەن ماقالاسىندا ەرتەرەكتە قازاقستاندىق McDonald's مەيرامحاناسىنىڭ قوجايىنى بيزنەسمەن قايرات بورانباەۆ ىشىندە جىلقى ەتى بار "قازاقتىڭ ۇلتتىق تاعامدارى" بولادى دەپ ۋادە ەتكەنىن جازادى.

ال ۇلىبريتانيانىڭ Daily Mail گازەتىنىڭ جازۋىنشا، Economist Intelligence Unit ينستيتۋتى الماتىنى الەمدەگى تۇرمىس دەڭگەيى ەڭ ارزان قالالار قاتارىنا قوسقان. ەڭ ارزان قالالار تىزىمىندە الماتىدان بولەك، زامبيانىڭ لۋساكا، ءۇندىستاننىڭ بانگالور مەن بومبەي، الجيردەگى الجير قالالارى ەنگەن. الەمنىڭ ەڭ قىمبات قالالارى قاتارىندا سينگاپۋر، تسيۋريح، گونكونگ، جەنەۆا جانە پاريج اتالعان.

اباي-اقپارات