سوڭعى كەزدەرى ەستىر قۇلاققا ەرسى حابارلار تىم كوبەيىپ بارادى. كەزەكتى جامانات جاڭالىقتى «informburo.kz» سايتى تاراتتى. اتالمىش سايت اقتوبە وبلىسىندا وقۋشى قىزداردى جەزوكشەلىككە جەگىپ جۇرگەندەر تۋرالى ماقالا جاريالادى.

ينتەرنەت باسىلىمنىڭ جازۋىنشا اقتوبە وبلىسىندا الدەكىمدەر مەكتەپ جاسىنداعى قىز بالالاردى ساباق ۋاقىتىسىندا جەزوكشەلىكپەن اينالىسۋعا ماجبۇرلەپ كەلگەن. ءتىپتى، وقۋشى قىزداردىڭ كورسەتكەن سەكس-قىزمەتى ءۇشىن،  قازاقستاننىڭ بارلىق وڭىرلەرىنە ارنايى ۇشاقپەن اپارىپ-اكەلىپ ءجۇرىپتى-ءمىس.  ال وبلىستاعى پوليتسيا وكىلدەرى بۇل وقيعاعا قاتىستى ەشبىر پىكىر بىلدىرمەگەن. بار بولعانى تەرگەۋ جۇمىستارى جۇرگىزىلىپ جاتقانىن ايتقان.

ال وڭىرلىك «اقتوبە-تايمس» گازەتىنە سىلتەمە بەرگەن باسىلىمنىڭ مالىمەتتەرىنە سۇيەنسەك، اقتوبە قالاسىندا جاس قىزداردى جەزكوشەلىكپەن اينالىسۋعا ماجبۇرلەپ جۇرگەن ارنايى قىلمىستىق توپ بولۋى بەك مۇمكىن. «اقتوبە-تايمس» گازەتى اتا-انالاردىڭ پىكىرىنە سىلتەمە بەرە وتىرىپ، اتالمىش قىلمىستىق توپ قالاداعى بىرقاتار مەكتەپتەردەگى قىزداردى جىنىستىق قۇلدىققا جەگىپ جۇرگەنىن ايتادى.

سۇمدىعى سول، جاپ-جاس قىزداردى جىنىستىق قىزمەت كورسەتۋ ءۇشىن قازاقستاننىڭ بارلىق وڭىرلەرىنە ارنايى ۇشاقتارمەن، ەلىمىزدىڭ تەرريتورياسىنان تىس جەرلەرگە جۇك كولىكتەرىمەن جەتكىزەدى ەكەن-ءمىس.

– ءبىزدىڭ بالامىز اقتوبە قالاسىنداعى مەكتەپتەردىڭ بىرىندە وقيدى. سوڭعى كەزدەرى ءوزىن وزگەشە ۇستاي باستاعانىن بايقادىق. ءبىر رەت جوعالىپ كەتىپ تابىلدى. كۇندەگىدەي مەكتەپكە جىبەرگەن ەدىك. ەكىنشى ساباقتان كەيىن ءىز-ءتۇسسىز جوعالىپ كەتكەن. كەيىن انىقتالعانداي، مەنىڭ قىزىمدى بىرەۋلەر «سچەتقا» وتىرعىزىپ قويىپتى، - دەيدى «اقتوبە-تايمس» گازەتىنە بەرگەن سۇحباتىندا اتى-ءجونىن كورسەتپەۋدى وتىنگەن  جەرگىلىكتى اتا-انالاردىڭ ءبىرى.

ال بۇل ماسەلەگە قاتىستى «مەگاپوليس» ءتىلشىسى اقتوبە وبلىستىق ءىىد-ءنىڭ ءباسپاسوز قىزمەتىنە حابارلاسقان. الايدا پوليتسيا وكىلدەرى كوممەنتاري بەرۋدەن باس تارتقان.

– قازىرگى تاڭدا اتالمىش شاعىمعا قاتىستى تەرگەۋ جۇمىستارى جۇرگىزىلۋدە. بار ايتا الاتىنىم وسى، – دەپتى پوليتسيا وكىلى.

سوڭعى كەزدەرى قازاقستان مەكتەپتەرىندەگى «سەكس ساباعىن» جۇرگىزۋ تۋرالى باستاما كوتەرىلە باستادى. سول باستاماشىلار «مەكتەپتەگى قىزدار «جەزوكشە» بولىپ بارادى» دەگەن داقپىرتتى تاراتىپ، ءوز يدەيالارىن جۇزەگە اسىرماق سياقتى. قىزدارىمىز جايلى مۇنداي جاعا ۇستاتارلىق جاڭالىق نەگە تاراپ جاتىر؟ كىمدەر تاراتۋدا؟ قازاق قىزدارىنان «جەزوكشە» جاساپ شىعارۋ كىمدەرگە ءتيىمدى؟

وتكەندە سايتىمىزدا «مەكتەپ جاسىنداعى قىزىڭىز توسەكتە توياتتاپ ءجۇر مە؟» اتتى ماقالا جاريالاعان ەدىك (http://abai.kz/post/view?id=6912). وندا «قازاستاندىقتاردىڭ 64 پايىزى العاشقى جىنىستىق قاتىناسقا مەكتەپ جاسىندا تۇسەتىندى» دەپ بايبالام سالعانداردىڭ نەنى كوكسەيتىنىن سوقىرعا تاياق ۇستاتقانداي دالەلدەپ بەرگەن ەدىك.

مەكتەپ جاسىنداعى قىزىڭ توسەكتە توياتتاپ ءجۇر دەگەنگە ارلانبايتىنىمىز سول كەزدە-اق، بەلگىلى بولعان-تىن. ەندى كەلىپ، مەكتەپتەگى قىزدار «بعم» بەلگىلەپ بەرگەن پاندەردەن وزگە  بەيرەسمي «سەكس ساباعىن» وقيتىن بولعانى ما؟ ەگەر بۇل اقپارات راس بولسا، ءبىلىم جانە عىلىم مينيسترلىگى نە قاراپ وتىر؟

ازىرگە انىعى، اقتوبەلىك جاپ-جاس جەتكىنشەكتەردىڭ جىنىستىق قىلمىستارى تۋرالى ماقالا جازعان باسىلىمداردىڭ ەشبىرى ناقتى دالەلدەر كىلتىرمەگەن. دەمەك، «مەكتەپ جاسىنداعى قىزدار جۇرگىش، بۇزىلعان» دەگەن قوعامدىق پىكىردى قالىپتاستىرعىسى كەلەتىندەر بار دەگەن ءسوز.  

نۇرگەلدى ابدىعانيۇلى

Abai.kz