قازاق ونەرى مەن مادەنيەتى ورنى تولماس اۋىر قازاعا دۋشار بولدى. ايگىلى كومپوزيتور، ءانشى، ۇستاز تۇرسىنعازى راحيموۆ 65 جاسقا قاراعان شاعىندا دۇنيە سالدى.

تۇرسىنعازى راحيموۆ - قازاق اسپانىن انمەن بيىكتەتكەن تاۋ تۇلعا. ءار قازاق بالاسىنىڭ جۇرەگىندە ويناپ تۇراتىن ءبىر ءان بولسا، ول - تۇرسىنعازى راحيموۆ اندەرى. ونىڭ اندەرى ءومىردىڭ ءار كەزەڭىنىڭ تەرەڭ فيلوسوفياسى، قات-قابات بولمىسىن نازىك يىرىمدەرمەن اشقان ءار جۇرەكتەگى ءان ساندىق. ولمەيتىن ونەر تۋدىرۋ اركىمنىڭ ماڭدايىنا جازىلىپ، باعىنا بۇيىرماعان دەسەك، تۇرسىنعازى راحيموۆ سول ولمەيتىن ونەر يەسى. ءومىر ەسىگىن انمەن اشىپ، از كۇن جالعاندا بار قازاقتى ءان بەسىگىندە تەربەپ، سول انمەن، اياۋلى جۇرەگى ءان سالعان بويدا ماڭگىلىككە كەتتى. اسپان مەن جەردىڭ اراسىندا اۋەلەگەن ءان قالدى. جەتىم قالعان جوق. بارشا قازاقتىڭ كۇمبىرلەگەن كەۋدەسىنىڭ تورىندە تۇر. انگە اينالعان تۇرسىنعازى راحيموۆ ماڭگىلىك جاساي بەرمەك.

الاشتىڭ اياۋلى تۇلعاسىنىڭ قازاسىنا وراي، وتباسىنا، تۋعان-تۋىسىنا، دوس-جارانىنا، ونەردەگى شاكىرتتەرى مەن اعا-باۋىرلارىنا جانە ميلليونداعان تىڭدارماندارىنا قايعىرىپ، كوڭىل ايتامىز.

اللا يمان بايلىعىن بەرىپ، پەيىشتە نۇرى شالقىسىن!

باقۇل بولىڭىز، تۇرسىنعازى اعا!

Abai.kz

ۇلىقبەك ەسداۋلەت

قوش

«قازاعىم-اي!..» دەگەندە 
كوكىرەگىڭ
قارس ايرىلىپ، قابارجىپ وت رەڭىڭ،
قۇلىن داۋسىڭ قۇدايعا جەتكەنمەنەن
قايدان ۇعام - ساڭىراۋ، سوقىر ەدىم؟!.

تۇرسىنعازى راحيموۆ 1951 جىلى 15 قازاندا دۇنيەگە كەلگەن. الماتىداعى ەسترادالىق-تسيرك كوللەدجىن ءبىتىردى. 1994 جىلى ء«سابي بولعىم كەلەدى» دەگەن اتپەن اندەر جيناعى شىقتى. «داريعا، دومبىرامدى بەرشى ماعان»، «وتىزدان اسىپ بارامىن»، «مەن سەنى ساعىنعاندا»، «ساناۋلى كۇن، ساناۋلى اي، ساناۋلى جىل»، ء«سابي بولعىم كەلەدى» سەكىلدى اندەردى جازعان كومپوزيتوردىڭ بارلىعى جۇزگە تارتا ءانى بار. م.ماقاتاەۆ اتىنداعى سىيلىقتىڭ يەگەرى. رەسپۋبليكالىق دەڭگەيدەگى ءبىرتالاي ونەر بايقاۋلارىنىڭ لاۋرەاتى.