جاقىندا بەلارۋسيا پرەزيدەنتى الەكساندر لۋكاشەنكو رف پرەزيدەنتى ۆلاديمير پۋتين مەن پرەمەر-مينيستر دميتري مەدۆەدوۆتىڭ اتتارىن شاتاستىرىپ الدى. بۇل تۋرالى رەسەيلىك بۇقارالىق اقپارات قۇرالدارى حابارلايدى.

بۇل قىزىق جايت ەكى ەل باسشىسىنىڭ مينسكدەگى كەزدەسۋىندە بولىپتى.

بەلارۋس «باتكاسى» ۆوۆا اعايدىڭ جىنىنا تيەتىن بۇنداي ءسوزدى ءبىرىنشى رەت ايتىپ وتىرعان جوق.   ەستەرىڭىزدە بولسا، وسىعان دەيىن الەكسادر گريگوريۇلى رەسەيدىڭ جارتى تەرريتورياسى قازاقستان مەن موڭعولياعا تيەسىلى دەپ، پۋتين مىرزانىڭ قىرىمدى اننەكتسيالاۋىنا اشىق قارسىلىق بىلدىرگەن-ءتىن. لۋكاشەنكو بۇنداي قىلىعىن اندا-ساندا قايتالاپ تۇرادى. بىردە، رەسەيدىڭ تەرريتورياسىنا شۇيلىكسە، ەندى بىردە ۆلاديمير ۆلاديميرۇلى مەن ونىڭ كولەڭكەسىندەگى سەنىمدى سەرىگى ءام ايتقانىن بۇلجىتپايتىن پرەمەرى دميتري ءاناتوليچتى كەكەتىپ قويادى.

«كارتوپ كورولىنىڭ» بۇنداي باتىلدىعىن اككى ساياساتكەرلەر تۇرلىشە جورامالدايدى. نە دەسەكتە، بەلارۋسيا پرەزيدەنتى وسى جولى پرەزيدەنت پەن پرەمەردىڭ اتتارىن ادەيى شاتاستىرعان سياقتى. پرەزيدەنت ءپۋتيننىڭ «زاپاستاعى» تاق مۇراگەرى - دميتري اناتوليچ وسىعان دەيىن ءبىر مارتە ۆلاديمير ۆلاديميرۇلىنىڭ ورنىنا پرەزيدەنتتىك كرەسلوعا وتىرىپ كورگەن-ءتىن. ءدال وسى دميتري مىرزانىڭ ەل باسقارعان 4 جىلى ىشىندە رەسەيلىك باق پەن قوعامدىق ورتادا جاڭا ساياسي قىزمەت اتاۋى پايدا بولدى. پرەمەر-پۋتينگە قاراتىپ ايتىلعان بۇل اتاۋ – «پرەمەرزيدەنت» ەدى. باتكا وسىنى كەكەتىپ وتكىسى كەلسە كەرەك، ءوز ەلىنىڭ استاناسىنداعى ەاەو باسشىلارىنىڭ كەزدەسۋىندە ءپۋتيننىڭ اتىن ول دميتري دەي بەردى.  

وقيعا ەۋرازيالىق ەكونوميكالىق وداققا مۇشە ەلدەردىڭ جوعارعى مەملەكەتتىك كەڭەسىنە كەلگەن رەسەيلىك دەلەگاتتارمەن ەكى جاقتى كەزدەسۋ بارىسىندا بولعانىن قايىرا ەستەرىڭىزگە سالامىز.

-قۇرمەتتى، دميتري اناتولەۆيچ، -دەپ باستاعان الەكساندر لۋكاشەنكو، دەرەۋ ءوز ءسوزىنىڭ ارتىن ازىلگە اينالدىرىپ جىبەرگەن.

كوردىڭىز بە، مەن سىزگە ايتتىم عوي (كۇلدى).

لۋكاشەنكونىڭ ءازىلىن رەسەي پرەزيدەنتى دە جالعاپ اكەتىپ، «رەسەيدىڭ بارلىق اقشاسى ءدميتريدىڭ قولىندا عوي، سوندىقتان ءسىزدىڭ ايتقانىڭىز دۇرىس»، - دەپ ىرجيدى.

وسى ءبىر دراماتيزاتسيالانعان كورىنىستەن كەيىن ەكى ەل باسشىلارى ادەتتەگىدەي رەسمي اڭىگىمەگە اۋىستى. بەلارۋس پرەزيدەنتى كوپتەن بەرى رف پرەزيدەنتى ۆلاديمير ۆلاديميرۇلىن كۇتكەن ەكەن. بۇل تۋرالى ءوزى ايتتى. ال پرەزيدەنت پۋتين ءوز كەزەگىندە مينسكىگە كەلگەنىنە قۋانىشتى ەكەندىگىن جەتكىزدى.

مينسكىدە بەلارۋس-رف باسشىلارى جۇزدەسىپ، الگىندەي ءازىل ايتىسىپ جاتقان تۇستا استانادا  قر پرەزيدەنتى نازارباەۆ ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيانمەن كەزدەسىپ "ەاەو بىزگە ءتۇبى پايداسىن تيگىزەدى" دەگەن پىكىر ايتتى. 

Abai.kz