نەمتسوۆتىڭ اتى كوشەگە نەمەسە سكۆەرگە بەرىلۋى مۇمكىن
ۆيلنيۋس قالالىق كەڭەسى (سەيم) رەسەيلىك وپپوزيتسيالىق ساياساتكەر بوريس نەمتسوۆتىڭ ەسىمىن كوشە نەمەسە سكۆەرگە بەرۋ تۋرالى شەشىم قابىلدادى
قالالىق كەڭەس قابىلداعان قاراردا دەموكراتيالىق رەسەي ءۇشىن كۇرەسكەن ادامنىڭ اتىمەن ليتۆا استاناسىنداعى كوشە نەمەسە سكۆەردى اتاۋ ۆيلنيۋس قالالىق باسشىلىعىنىڭ «ەركىن، اشىق جانە دەموكراتيالىق الەم جاعىندا» ەكەنىن كورسەتەتىنى تۋرالى جاريالانعان.
نەمتسوۆتىڭ ەسىمىن تاريحتا قالدىرۋ تۋرالى كيەۆ پەن ۆارشاۆا باسشىلىعى دا ويلاپ وتىر.
ال، ماسكەۋ بيلىگى كرەملگە جاقىن جەردەگى ۇلكەن موسكۆورەتسك كوپىرىندەگى بوريس نەمتسوۆ قازا تاپقان جەردە ەسكەرتكىش ورناتۋ تۋرالى وپپوزيتسيا ۇسىنىسىن قابىلدامادى. ول جەردەگى حالىق ورناتقان ەستەلىك تاقتانى قالالىق قىزمەت جۇمىسشىلارى ۇنەمى الىپ تاستايدى، ال پوليتسيا ونى قورعايتىن بەلسەندىلەردى تۇتقىندايدى. بيىلدىڭ وزىندە وسىنداي ءتورت وقيعا بولدى. 12- اقپاندا «ۇلت-ازاتتىق قوزعالىسىنىڭ» وكىلدەرى نيجني نوۆگورودتاعى بوريسۋ نەمتسوۆ مەموريالىن تالقاندادى.
بوريس نەمتسوۆ 2015 جىلى 28 اقپاندا ءولتىرىلدى. ساياساتكەردىڭ ءولىمىنىڭ بىرجىلدىعىنا وراي وپپوزيتسيا ماسكەۋ مەن رەسەيدىڭ وزگە قالالارىندا ەسكە الۋ شاراسىن وتكىزۋدى جوسپارلاۋدا.
ماسكەۋ بيلىگى مەن وپپوزيتسيا وكىلدەرى 27 اقپانعا بەلگىلەنگەن بوريس نەمتسوۆتى ەسكە الۋ شەرۋىنىڭ قالاي وتەتىنىن تالقىلادى.
وڭىرلىك قاۋىپسىزدىك جانە جەمقورلىققا قارسى استانالىق دەپارتامەنتتىڭ باسشىسى الەكسەي مايوروۆ "ينتەرفاكسقا" شەرۋدى وتكىزۋدىڭ ءتارتىبى تولىق انىقتالعانىن حابارلادى.
ونىڭ ايتۋىنشا، 27 اقپانداعى شەرۋدىڭ ستراستنىي بۋلۆارىنان سرەتەنسك بۋلۆارىنا دەيىن، ءارى قاراي ساحاروۆ داڭعىلىنا دەيىن ءجۇرىپ وتەتىنى تۋرالى بەلگىلەنگەن.
رەسەيدەگى ەو وكىلدىگىنىڭ باسشىسى ۆيگاۋداس ۋشاتسكاس جانە ەۋرووداققا مۇشە 28 ەلدىڭ ەلشىلەرى بوريس نەمتسوۆتىڭ ءولىمىنىڭ بىرجىلدىعىنا وراي، ول قازا بولعان جەرگە گۇل شوقتارىن قويادى.
اباي-اقپارات
