قر پرەزيدەنتى ن.نازارباەۆتىڭ نازارىنا!

38 جىلدىق تاريحى بار رەسپۋبليكالىق كىتاپ مۋزەيى جابىلماقشى. مۋزەيدى تاراتىپ، ورنىنا مادەنيەتتەردى جاقىنداستىرۋ ورتالىعىن قۇرۋ جونىندە ۇكىمەت باسشىسىنىڭ قاۋلىسى 2015 جىلى 27 جەلتوقساندا شىعىپتى. بۇعان دەيىن «قازاقكونتسەرتتىڭ» جابىلعانى بەلگىلى. ماڭىزدى مادەني وشاقتاردىڭ بىرىنەن سوڭ ءبىرىنىڭ جابىلۋى مادەنيەتكە جاسالىپ وتىرعان  شابۋىل  دەمەسكە شارا جوق.

كىتاپ مۋزەيىنىڭ توڭىرەگىندە قالىپتاسقان جاعدايدىڭ جاي-جاپسارىن ءبىلۋ ءۇشىن ءجۇرسىن ەرمان مىرزاعا حابارلاسقان ەدىك.

ءجۇرسىن ەرمان، رەسپۋبليكالىق كىتاپ مۋزەيىنىڭ ديرەكتورى:

-          كىتاپ مۋزەيى وسىدان 38 جىل بۇرىن قۋات قۇلمانوۆ، شەريازدان ەلەۋكەنوۆ، مۇقان ماماجانوۆ سىندى قازاقتىڭ ۇلتشىل، مادەنيەتكە جاناشىر ازاماتتارىنىڭ باستاماسىمەن، قوناەۆتىڭ قولداۋىمەن قۇرىلعان ەدى. مۇنداي كىتاپ مۋزەيى تمد كولەمىندە ۇشەۋ-اق. ءبىرى – پەتەربوردا، كيەۆتە جانە الماتىدا. بۇل مۋزەي – قازاق باسپا ونەرىنىڭ تاريحى. مۋزەيدە ابايدىڭ العاشقى كىتابىنان باستاپ، تاشكەنت، ىستامبۇل، قازان، پەتەربوردا شىققان كونە كىتاپتار، قولجازبالار، كوشىرمەلەر تاعى باسقا قازاق باسپا جانە ءباسپاسوز تاريحىنا قاتىستى مۇرالارمەن قوسا، 70 مىڭ كىتاپ قورى ساقتاۋلى تۇر. مۋزەي قىزمەتكەرلەرى اي سايىن وقۋشىلار مەن ستۋدەنتتەردى ۇيىمداستىرىپ، مۋزەيدى ارالاتىپ، مۇرالاردىڭ تاريحىمەن تانىستىرىپ وتىرادى. شەتەلدىكتەر دە كەلىپ تۇرادى.

سۋرەتتە: ۇلتتىق اكادەميالىق كىتاپحانا ديرەكتورى ءۇمىتحان مۇڭالباەۆا

2014 جىلى 1-جەلتوقساندا تۇڭعىش پرەزيدەنت كۇنىنە بايلانىستى ۇلتتىق اكادەميالىق كىتاپحانا ديرەكتورى ءۇمىتحان مۇڭالباەۆا مينيسترلىك ارقىلى حات ۇيىمداستىرىپ، كورمەگە قويۋ ءۇشىن كىتاپ مۋزەيىنەن 130-150 سيرەك جادىگەرلەردى بەرە تۇرىڭىزدار دەپ سۇرادى. ءبىز بەردىك. بىراق، كورمەدەن كەيىن سۇراپ العان كىتاپتارىمىزدى قايتارماي قويدى. ول كىسى ءوزى پىسىق ادام ەكەن، بىزدەن العان كىتاپتاردى كىتاپحانادان اشقان كىتاپ مۇراجايىنا قالدىرامىن دەپ شۋ شىعاردى. مۇنىڭ اياعىن «كىتاپ مۋزەيىنىڭ كىتاپ ساقتايتىن جاعدايى جوق» دەگەن اڭگىمە جەتكىزدى. بۇل اڭگىمەنى مينيستر ارىستانبەك ءمۇحاماديۇلىنىڭ قۇلاعىنا ابدەن قۇيعان عوي، ءسويتىپ، مەن مينيسترگە كىتاپحانا مەن كىتاپ مۋزەيى ەكەۋى ەكى باسقا نارسە ەكەنىن ءتۇسىندىرىپ، حات جازدىم. سوتتاسۋعا دەيىن باردىق. ءسويتىپ، اقىرى مينيستر ارىستانبەك ءمۇحاماديۇلى 2015 جىلدىڭ 27 جەلتوقسان كۇنى پرەمەر-مينيست كارىم ءماسىموۆتىڭ قولىمەن «كىتاپ مۋزەيى تاراتىلىپ، مادەنيەتتەرى جاقىنداستىرۋ ورتالىعىنا اينالسىن!» دەگەن قاۋلى شىعارتتى. بىزبەن اقىلداسقان ەشكىم جوق. ءبارىن سول ءۇمىتحان مۇڭالباەۆا، ارىستانبەك ءمۇحاماديۇلى – وزدەرى كەسىپ-ءپىشىپ، ۇكىمەتكە قاۋلى قابىلداتىپ شەشىپ تىنعان. بۇل تۋرالى ءبىز كەشە عانا بىلدىك.

سۋرەتتە: مادەنيەت جانە ونەر ىستەرى كوميتەتىنىڭ ءتورايىمى اقتوتى رايىمقۇلوۆا

اۋرۋحانادان شىققان بويدا مادەنيەت جانە ونەر ىستەرى كوميتەتىنىڭ ءتورايىمى اقتوتى رايىمقۇلوۆا شاقىرىپ الىپ، قاۋلىنى كورسەتتى.

سۋرەتتە: قر پرەزيدەنتى ن.نازارباەۆتىڭ قابىلداۋىندا وتىرعان مادەنيەت جانە سپورت ءمينيسترى ارىستانبەك ءمۇحاماديۇلى، 2014 جىل.

بۇل جەردە ەڭ سوراقىسى، ارىستانبەك ءمۇحاماديۇلى مەن اقتوتى رايىمقۇلوۆانىڭ بۇل ءىس تۋرالى ايتايتىنى «ەلباسىنىڭ تاپسىرماسى» دەيدى.  سوندا نەمەنە، ەلباسى كىتاپ مۋزەيىن تاراتىڭدار، جابىڭدار دەدى مە؟ بۇل كىسىلەر وسىنداي جامان شارۋالاردى پرەزيدەنتتىڭ اتىن جامىلىپ ىستەپ الىپ، جاماناتىن ەلباسىعا يتەرە سالادى. بۇل ۇيات قوي! ەلباسى مۇنداي ءىس بولىپ جاتقانىن بىلمەيدى دە.

مۋزەيدە جيىرمادان استام ادام جۇمىس ىستەيدى.  ءبارىنىڭ بالا-شاعاسى، بانكتەن العان نەسيەلەرى بار.  ولار قايدا بارادى ەرتەڭ؟ كىتاپ مۋزەيىن جاۋىپ تاستاعاندا، ولاردىڭ ادام تۇسىنبەيتىن مادەنيەتتەردى جاقىنداستىرۋ ورتالىعى دەگەن دۇنيەلەرىنىڭ كىمگە كەرەگى بار؟! مۋزەيدەگى جادىگەرلەردى ۇشكە بولمەكشى: ءال-فارابي اتىنداعى ورتالىق كىتاپحاناعا، ۇلتتىق اكادەميالىق كىتاپحاناعا جانە ورتالىق مۋزەيگە... سوندا جىلدار بويى جيناقتالىپ، ۇلبىرەپ تۇرعان سيرەك كەزدەسەتىن جادىگەرلەردىڭ توز-توزى شىقپاي ما! مادەنيەتتى دامىتقاننىڭ ورنىنا ءبارىن توزدىرىپ، تاراتىپ جاتقان نەعىلعان مينيستر بۇل؟!

رەداكتسيادان: ء جۇرسىن ەرمان مىرزانىڭ سۇراعىنا وراي جانە جوعارىداعى ماسەلەگە بايلانىستى اتالعان قۇزىرەتتى ورگان باق-قا ناقتى جاۋاپ بەرەدى دەپ كۇتەمىز.

Abai.kz