“مۇزارت” توبىنان ماقسات بازارباەۆ كەتكەن كەزدە جۇرت اراسىندا ءتۇرلى قاۋەسەت تارادى. ءبىرى ونى ءوز ەركىمەن كەتتى دەسە، ەندى ءبىرى مەيرامبەكپەن سىيى جاراسپاعانىن تىلگە تيەك ەتتى. الايدا ءانشى ارادا ەش كيكىلجىڭ بولماعانىن، توپتان ءوز ەركىمەن كەتكەنىن ايتتى. بۇل تۋرالى Stan.kz 31 ارناعا سىلتەمە جاساپ حابارلايدى.

ماقسات بازارباەۆ توپتان كەتكەن سوڭ 9 اي بويى كۇيزەلىستە بولعان. كوپكەدەيىن قينالىپ، كەنجەبەكتى ەڭ العاش كورگەن كەزدە جينالۋ كەرەكتىگىن تۇسىنگەن.وسى ساتتەن باستاپ ءوزىن-ءوزى قولعا الىپ، جەكە شىعارماشىلىعىن دامىتۋعا كىرىسكەن.

“ونەر بولعان سوڭ بارلىعى دا بولادى. مۇمكىن بۇل توپتا جۇرە بەرسەم، حالىق بىزدەن جالىعىپ كەتەر مە ەدى؟! مەرەيتويدا ساكەن، مەيرامبەك ۇشەۋىمىز ەڭ العاشقى اندەرىمىزدىڭ ءبىرىن ورىندادىق. ول مۇقاعالي ماقاتاەۆتىڭ “سەنىڭ كوزىڭ” اتتى ءانى بولعان. بويىمدى ساعىنىش وتى كەرنەپ، ۋاقىت 15 جىل ارتقا جىلجىعانداي بولدى. قۇددى 25 جاسىمىز قايتا كەلىپ جاتقانداي. ول كەزدە وت ەدىك قوي. (كۇلدى.)

ءبىر شەتىنەن مۇزارتتان كەتكەنىم دە دۇرىس بولدى. سەبەبى، وتباسىڭمەن، اتا-اناڭمەن جايشىلىقتا قىدىرىپ، كوشەدە ەركىن جۇرگىڭ كەلەدى. مۇزارتتا ءجۇرىپ ەشۋاقىتتا جۇلدىز اۋرۋىمەن اۋىرعان ەمەسپىن. مەن بۇل اۋرۋدى مەكتەپ قابىرعاسىندا باسىمنان وتكەرگەن ەدىم”، – دەيدى ماقسات بازارباەۆ.

كوپشىلىك سول ۋاقىتتا ءانشىنى مەيرامبەكپەن سىيى جاراسپاي كەتتى دەپ ويلاعان-دى. بازارباەۆ اتالعان ارنانىڭ تىلشىلەرىنە بولعان جايدى اشىپ ايتتى.

“بىلمەگەن ادامدار ءارتۇرلى ايتىپ جاتادى. مەن بار بولعانى ءوزىمنىڭ جەكە شىعارماشىلىعىمدى جالعاستىرعىم كەلدى. ارامىزدا ەشقانداي ۇرىس، تۇسىنىسپەۋشىلىك بولمادى. ارينە، كوكەيىمدە وكىنىش بار. وكىنبەيتىندەي تاس جۇرەك ەمەسپىن عوي. قارىم-قاتىناسىمىزدا ەش سىزات جوق. ءالى كۇنگە دەيىن قۋانىشىمىز بەن قايعىمىز ورتاق”، – دەيدى ءانشى.

الايدا ارىپتەسى ساكەن مايعازيەۆ ونىڭ بۇل سوزدەرىن جوققا شىعارعانداي بولدى.

“بۇل توپتىڭ ورتاق شەشىمى بولدى. اسپاننان تۇسكەندەي بولماي-اق قويايىن. سول كەزدە بىرەۋلەر بىرەۋدى جازعىرىپ تا، كىنالاپ تا جاتتى. ونىڭ بارلىعىن اللا كورىپ تۇر. سولاي بولۋى كەرەك بولعاندىقتان بولدى. بۇدان ماقسات تا، مەيرامبەك تە حاباردار”، – دەيدى ساكەن مايعازيەۆ.