ەلدەگى ورىس ءباسپاسوزى (ورىس ءتىلدى دەپ باق دەپ سيپاتتالادى) الماتىدا جالعىز ادام جاساعان قارۋلى شابۋىلدى جارىسا جازدى. قازىر باسپاسوزدە اقپاراتتىق قاۋىپسىزدىك جانە شەتىن وقيعا كەزىندە اقپارات تاراتۋ/الۋ ماسەلەسى قىزۋ تالقىلانىپ جاتىر. ونىڭ ۇستىنە ىشكى ىستەر ءمينيسترى قالمۇحانبەت قاسىموۆ جالعان اقپارات تاراتقان جۋرناليستتەر مەن بلوگەرلەر جاۋاپ تارتىلادى دەدى. ءسويتىپ، اقپاراتتىق كەڭىستىكتە باق پەن بيلىك اراسىندا ادەتتەگىدەي ءبىرىن-ءبىرى كىنالاۋ، ايىپتىنى ىزدەۋ سياقتى جاعداي قايتا ورىن العانداي...

سونىمەن:

RATEL.KZ: «جەر كولەمى جاعىنان الەمدە 9 ورىندا، جەر قويناۋىندا بايلىعى جاعىنان مەندەلەەۆ تابليتساسى تۇگەل تابىلاتىن، حالقىنىڭ سانى كەيبىر ەلدەردەگى كىشىگىرىم قالانىڭ تۇرعىندارىمەن شامالاس قازاقستان نەگە ءالى كۇنگە كەدەيلىكپەن كۇرەسىپ كەلەدى؟» وسىنداي ساۋال تاستاعان ەرمەك تۇرسىنوۆ «ولار - مەملەكەت» (گوسۋدارستۆو – ەتو وني) ماقالاسىندا جوعارىداعى سۇراعىنا «بۇل جەردە باس قاتىرۋدىڭ قاجەتى جوق شىعار: ءبىز كەزدەيسوق ادامدار باسقاراتىن ەلدە ءومىر سۇرەمىز» دەپ جاۋاپ بەرەدى. ءارى قاراي بيلىك پەن حالىقتىڭ اراسىنداعى ساياسي-ەكونوميكالىق جاعداي ءوز ويىن ايتادى.

RADIOTOCHKA.KZ: «وقيعا تۋرالى قاندايدا ءبىر رەسمي اقپارات بەرۋ ءۇشىن مەملەكەتتىك جۇيەگە ءۇش ساعات ۋاقىت قاجەت بولدى». «الماتىداعى اتىس: بيلىكتىڭ كەزەكتى اقپاراتتىق ساتسىزدىگى» (پەرەسترەلكا ۆ الماتى: وچەرەدنوي ينفورماتسيوننىي پروۆال ۆلاستي) اتتى تالداۋ ماتەريالدا جۋرناليست مارينا ميحتاەۆا اتىس كەزىندەگى رەسمي اقپاراتتىڭ كەش شىققانىنا توقتالادى. سونداي-اق، ماقالادا ۆلاديمير رەريحتىڭ دە وقيعا كەزىندەگى اقپاراتتىق جاعدايعا قاتىستى پىكىرى بەرىلگەن. «كۇشتىك قۇرىلىمدارعا سۇراعىم كوپ. تۇسىنبەيمىن، كۇزەتتە تۇرعان پوليتسەيدەن قالاي اۆتوماتىن تارتىپ الۋعا بولادى؟  پوليتسيانىڭ رايوندىق بولىمشەسىندە  پوليتسەيلەر جۇرگەندە كۇزەتتە تۇرعان پوليتسەيدى ەكى رەت اتىپ، اۆتوماتىن الىپ كەتۋگە بولادى؟ بۇل قالاي بولۋ مۇمكىن؟ مۇنى دا تۇسىنە المادىم» دەپ رەريح كوكەيىندەگى ساۋالدارىن ايتادى.

الايدا، ءدال وسى ماتەريالدا ايتىلعان وقيعا كەزىندەگى رەسمي اقپارات تاراتۋدىڭ كەشەۋىلدەۋىنە بايلانىستى اقپارات جانە بايلانىس ءمينيسترى داۋرەن اباەۆ ءوزىنىڭ facebook الەۋمەتتىك جەلىسىندەگى پاراقشاسىندا: "الايدا، جۋرناليست ماتەريالدا جازىلعانداي رەسمي اقپارات 3 ساعاتتان كەيىن ەمەس، ودان ەرتە (12:28) قالالىق ءىىب تۇرعىنداردى انتيتەررورلىق وپەراتسيالار ءجۇرىپ جاتقانىن ۇيدەن شىقپاۋعا، ادام كوپ جينالعان جەرلەرگە بارماۋ تۋرالى مالىمەت تاراتقانىن ايتپاعان. ال، 15 مينۋتتان كەيىن قىزىل دەڭگەي ەنگىزىلدى" دەپ ماقالادا كورسەتىلگەن ماسەلەلەرگە ناقتى توقتالىپ، رەسمي جاۋاپ قاتقان.

NEWTIMES.KZ: «شەنەنۋنىكتەر 328 وتباسىنىڭ استانا ماڭىنان العان جەرلەرىن تارتىپ الماقشى » (زەمليۋ ۆ پوسەلكە پود استانوي پىتايۋتسيا وتنيات چينوۆنيكي ۋ 328 سەمەي) – «سۇلۋشاش ابدىكەرىموۆانىڭ وتباسى استانادا جاتاقحانانىڭ ءبىر بولمەسىن جالداپ تۇرادى. بۇل وتباسى ءۇي ماسەلەسىن شەشۋ ءۇشىن بانكتەن 5 جىلعا 2 ميلليون تەڭگە الىپ، استانادان 20 شاقىرىم جەردەگى تايتوبە دەگەن جەردەن ون سوتتىق جەر ساتىپ الادى. ەندى پروكۋرورلار جەرگىلىكتى اكىمشىلىك جەردى زاڭسىز بولگەن دەپتى. جۇرت جەرىنەن ايىرىلعىسى كەلمەيدى». ماتەريالدا قازاقستانداعى ءجيى كەزدەسەتىن ءارى كوپتەگەن وتباسىلاردىڭ باستى ماسەلەسىنە اينالعان جەكە ءۇي سالۋعا ارنالعان جەر ماسەلەسى كوتەرىلەدى. «بىزگە الدەبىر جۋرنال بار دەيدى. ول جۋرنالدا بۇل جەر تۋرالى جازىلماعان دەيدى. بىراق، بۇل قۇپيا جۋرنالدى ەشكىم كورمەگەن». تاپ وسى «سيقىرلى» جۋرنالدا جازىلماعان جەردەن جەر العان 328 وتباسى ادىلدىك ىزدەپ، استاناداعى قۇزىرلى ورىنداردىڭ تابالدىعىن توزدىرىپ ءجۇر.

شولۋ جاساعان - نۇرا ماتاي

abai.kz