اتىراۋدا ءوتىپ جاتقان جەر رەفورماسى بويىنشا رەسپۋبليكالىق كوميسسيانىڭ وتىرىسىندا ءسوز سويلەگەن كوميسسيا مۇشەسى اقىلبەك كۇرىشباەۆ اۋىل شارۋاشىلىعىنداعى جەرلەردى قازاقستاندىقتارعا جالعا بەرۋدى جالعاستىرۋ قاجەتتىگىن مالىمدەدى.

«ۇكىمەت ۇسىنعان زاڭ جوباسىندا جەردى جەكەمەنشىككە بەرۋگە باسىمدىق بەرىلگەن. ءتىپتى، جەردى جالعا الۋشىلار 49 جىلدىق مەرزىم اياقتالعان سوڭ نە جەردى ساتىپ الۋى كەرەك نەمەسە مەملەكەتكە قايتارۋى ءتيىس. بۇل – بولاشاقتا جەردى جالعا الۋ مەرزىمى اياقتالعان سوڭ جەردىڭ ءبارى جەكەمەنشىكتە بولادى دەگەن ءسوز. ءبىز مۇنىمەن كەلىسپەيمىز. سەبەبى اۋىلدىق جەرلەردە تۇراتىن ازاماتتاردى قولداۋ ءۇشىن جەردى جالعا بەرگەندە جەرگىلىكتى تۇرعىندارعا، اۋىل شارۋاشىلىعى ءبىلىمى بار ازاماتتارعا باسىمدىق بەرۋ كەرەك» دەدى ول.

اقىلبەك قاجىعۇلۇلى وسى جيىندا قازاقستاندا جەردى جالعا بەرۋ جانە ونى مەملەكەتكە قايتارىپ الۋ ماسەلەسى جەكە زاڭنامالىق قۇجات رەتىندە بەكىتىلمگەنىنە توقتالدى. ول جەردى جالعا بەرۋ تۋرالى ەرەجەنى زاڭنامالىق تۇردە بەكىتۋدى ۇسىنىپ، وعان 5 ناقتى تالاپتى ەنگىزۋدى جاريا ەتتى. بىرىنشىدەن، جەردى جالعا بەرۋدى اكىمدەر ەمەس، حالىق وكىلدەرىنەن قۇرالعان جەرگىلىكتى جەردەگى كوميسسيا شەشۋى ءتيىس. ەكىنشىدەن، جەردى جالعا بەرۋ تۋرالى اقپارات حالىققا اشىق بولۋى شارت. «قازىرگى كەزدە مۇنداي مالىمەتتەردى اكىمدەردىڭ جانىندا جۇرەتىن ادامدار كوبىرەك بىلەدى. ءبىز جالعا بەرۋ تۋرالى اقپاراتتى ءارتۇرلى باق ارقىلى حالىققا 30 كۇن بۇرىن تاراتۋدى ۇسىنامىز. ياعني، قاراپايىم حالىق قاي جەردە قانشا جەر اۋماعى جالعا بەرىلەتىنى تۋرالى اشىق حاباردار بولۋى كەرەك» دەدى ا. كۇرىشباەۆ.

جالپى العاندا رەسپۋبليكالىق كوميسسيا وسى كەزگە دەيىن ءتيىمدى، ساپالى جۇمىس ىستەگەنىن كورسەتە ءبىلدى. وعان ەلىمىزدىڭ ءار ايماعىنداعى تۇرعىنداردىڭ بەرگەن باعاسى دالەل. مىسالى، اتىراۋدا وتەتىن جيىنعا دەيىن وبلىس اكىمدىگى جانىنان اشىلعان cal-lورتالىققا حالىقتان 100 قوڭىراۋ ءتۇسىپتى. سونىڭ ىشىندە 65-ءى – جەكە تۇرعىن ءۇي قۇرىلىسىنا جەر ءبولۋ، 20-سى – اۋىل شارۋاشىلىعى جەرلەرى ماسەلەسى، 16-سى – جەر رەفورماسى بويىنشا ساۋالدار. دەمەك ءاربىر قازاقستاندىقتىڭ جەر رەفورماسىنا قاتىستى ماسەلەگە ءۇن قوسۋى – اتالعان كوميسسيانىڭ جۇمىسىنىڭ اشىقتىعىنىڭ، قولجەتىمدىلىگىنىڭ، جۇمىسىنىڭ تيىمدىلىگىنىڭ كورسەتكىشى.

ءامىرلان ءالىمجان

Abai.kz