الماتىدا اتىس بولىپ جاتىر (سوڭعى اقپاراتتار)
الماتىدا المالى اۋداندىق ءىىب ماڭى قورشاۋعا الىندى، - دەپ حابارلايدى Tengrinews.kzء تىلشىسى.
كۋاگەرلەردىڭ ايتۋىنشا، نيكولسكي بازارىنىڭ اۋماعىندا اتىس بولىپ جاتىر. بۇل جەردە اۋداندىق پوليتسيا باسقارماسى ورنالاسقان. سونىمەن قاتار، كۋاگەرلەر كورشى عيماراتتارداعى ادامداردى كەڭسەلەرىنەن شىعارماي وتىر ەكەن.
تاياۋ ماڭدا ورنالاسقان كەڭسەدەگىلەردىڭ ايتۋىنشا، 10 رەت وق اتىلعان. "باستاپقىدا تاپانشامەن ءبىر-بىردەن وق اتىلدى، كەيىن جىلدام اتىلا باستادى. بەلگىسىز بىرەۋ قولىنا اۆتومات ۇستاپ الىپ، بايتۇرسىنوۆ كوشەسىنىڭ بويىمەن جۇگىرىپ ءوتتى، كەيىن ارتىنان پوليتسەيلەر قۋدى", - دەيدى ولار.
قازاقپاراتتىڭ جازۋىنشا قولىنا قارۋ ۇستاعان بەلگىسىز بىرەۋ اباي مەن بايزاقوۆ كوشەلەرىنىڭ قيىلىسىنداعى ۇلتتىق قاۋىپسىزدىك كوميتەتىنىڭ عيماراتىنىڭ الدىندا ەكى ادامدى اتىپ كەتكەن. ادام شىعىنى بار بولۋى مۇمكىن.
قازىرگى ساتتە، قر ۇقك الماتى قالاسى بويىنشا دەپارتامەنتىنىڭ عيماراتى، المالى اۋدانىنىڭ ىشكى ىستەر باسقارماسى اۋماعى، اباي داڭعىلى مەن بايزاقوۆ كوشەسى قيىلىسىندا، ابىلاي حان داڭعىلى مەن قازىبەك بي كوشەسى اۋماعى وقشاۋلاندى.
سونداي-اق، ابىلاي حان مەن تولە بي كوشەسىنىڭ قيىلىسىندا دا ءتارتىپ ساقشىلارىمەن بەلگىسىز بىرەۋلەر اراسىندا اتىس بولعان»، – دەيدى كۋاگەرلەر.
وقيعا بارىسىنان Abai.kz اقپاراتتىق پورتالىنىڭ ءتىلىشىسى مىنا جايتتاردى حابارلادى:
ابىلاي حان مەن تولە بي كوشەلەرىنىڭ قيىلىسىندا اتىس بولدى. ەكى پوليتسيا قىزمەتكەرى وققا ۇشتى. پوليتسەيلەرگە وق اتقان ءبىر بۇلىكشى اۋىر جاراقات الىپ قولعا ءتۇستى. ەندى اتىس ماقاتاەۆ پەن سەيفۋللين كوشەسىندە جالعاسۋدا.
الماتى قالالىق شۇعىل جەدەل كومەك كورسەتۋ اۋرۋحاناسىنا قازىر جارالانعان 5-6 ادامدى الىپ كەلدى. اۋرۋحاناعا الماتى قالاسى اكىمىنىڭ بۇرىنعى ورىنباسارى، ءماجىلىس دەپۋتاتى زاۋرەش امانجولوۆا كەلدى. قاسىندا ءبىر توپ ادام بار. امانجولوۆا داۋىس سالىپ جىلادى.
ءبىزدىڭ ءتىلشىمىز ءماجىلىس دەپۋتاتىنىڭ ءىنىسى قايتىس بولعانىن ول كىسىنىڭ وزىنەن سۇراپ ءبىلدى. زاۋرەش امانجولوۆا الماتى قالالىق شۇعىل جەدەل كومەك كورسەتۋ اۋرۋحاناسىناداعى 5 وتا جاساۋ ءبولىمىنىڭ بوس ەمەستىگىن، وسى جاڭا عانا ەكى پوليتسيا قىزمتەكەرىنىڭ جان تاپسىرعانىن ايتتى.
WhatsApp جەلىسى ارقىلى الماتىداعى اتىستى ۇيىمداستىرۋى مۇمكىن دەگەن كۇدىكتىنىڭ سۋرەتى جاريالاندى.
ىشكى ىستەر مينيسترلىگىنىڭ ءباسپاسوز قىزمەتى تاراتقان بولجام بويىنشا، الماتىدا اتىس ۇيىمداستىرعان ادام قىزىلوردا وبلىسىنىڭ 27 جاستاعى تۋماسى ەكەنى انىقتالدى. بۇرىن سوتتالعان.
قر ءىىم رەسمي سايتىندا بۇگىن الماتىدا بولعان وقيعانىڭ رەسمي نۇسقاسى جاريالاندى.
«18 شىلدەدە ساعات تاڭعى 11 شاماسىندا المالى اۋداندىق ىشكى ىستەر باسقارماسىنا باسا-كوكتەپ كىرگەن كۇدىكتى كەزەكشى پوليتسيا قىزمەتكەرىن اتىپ جارالاپ، اۆتوماتىن قولعا ءتۇسىردى دە، ءىزىن جاسىردى. قىلمىسكەردىڭ سوڭىنان تۇسكەندە، ول قولىنداعى اۆتوماتتان وق جاۋدىرىپ، «بوران» ەكيپاجىنىڭ ەكى قىزمەتكەرىن جارالادى. كوپ كەشىكپەي، پوليتسيا قىزمەتكەرلەرى كۇدىكتىنى «قازاقكونتسەرت» تۇسىندا جارالاپ، قولعا ءتۇسىردى. ونىڭ جەكە باسى انىقتالدى. ۇستاۋ بارىسىندا ەكى پوليتسيا قىزمەتكەرى جارالاندى. وكىنىشكە قاراي، قىلمىسكەر كوشەدە كەتىپ بارا جاتقان كولىكتى تارتىپ الماق بولىپ، ونىڭ يەسىن اتىپ ولتىرگەن ەدى. اۋىر جاراقاتتان اۋرۋحاناعا جەتكىزىلگەن ءۇش پوليتسيا قىزمەتكەرى قايتىس بولدى. الدىن-الا مالىمەت بويىنشا، 27 جاستاعى كۇدىكتى بۇرىن سوتتالعان، قىزىلوردا وبلىسىنىڭ تۇرعىنى. وتكەن جەكسەنبىدە ءبىر ايەلدى ءولتىردى دەپ كۇدىككە ىلىنگەن. قازىر قالادا ۇستالعان قىلمىسكەردىڭ سىبايلاسىن دا قولعا ءتۇسىرۋ ءۇشىن، «سيرەنا» وپەراتيۆتى جوسپارى ەنگىزىلدى»، — دەپ حابارلاعان.
الماتى قالالىق ءىىد ءباسپاسوز حاتشىسى سالتانات ازىربەكتىڭ حابارلاۋىنشا، قالادا قازىر انتيتەررورلىق وپەراتسيا جاريالانعان.
Cونداي-اق، جەلىدە «الماتى - 1» تەمىر جول ۆوكزالىندا جارىلعىش زاتتىڭ بولۋى مۇمكىن دەگەن حابارلاما تاراپ كەتتى.
تجد ءورت تۋرالى اقپاراتتى جوققا شىعاردى. جارىلعىش زات تۋرالى رەسمي مالىمدەمە ءالى جاسالعان جوق.
استانا ۋاقىتىمەن 12:20-دا الماتى قالاسىنىڭ اۋماعىندا تەرروريستىك قاۋىپتىلىكتىڭ قىزىل دەڭگەيى بەلگىلەندى.
«وسىعان بايلانىستى، قالا تۇرعىندارى مەن قوناقتارىن اتالعان دەڭگەيدە قاراستىرىلعان تالاپتاردى ساقتاۋعا شاقىرامىز»، - دەلىنگەن ءىىد تاراتقان حابارلامادا.
ايتا كەتەيڭك، «قىزىل» دەڭگەيلى قاۋىپ ورناعان كەزدە جەكە زاتتارى مەن ترانسپورت قۇرالدارىن تەكسەرۋگە جانە قوزعالىستى ۋاقىتشا شەكتەۋگە نەمەسە توقتاتۋعا مۇمكىندىك بەرەدى. سونداي-اق وسى دەڭگەيدە ەش كەدەرگىسىز تۇرعىن ۇيلەرگە جانە باسقا دا عيماراتتارعا كىرە بەرۋگە رۇقسات بار. تەلەكوممۋنيكاتسيالىق جۇيە كانالدارى ارقىلى بەرىلەتىن اقپارات پەن كەلىسسوزدەردى باقىلاۋ ءتارىزدى شارالار دا قابىلدانادى. بارلىق ارنايى قىزمەتتىڭ اسكەري دايىندىعى كۇشەيتىلىپ، اۋەجايلار، تەڭىز پورتتارى مەن مەتروپوليتەن وبەكتىلەرىن، تەمىر جولدار مەن اۆتوبەكەتتەردى ارنايى قۇرالدارمەن تەكسەرۋ كەزىندەگى رەجيمدەردىڭ قاتاڭداتىلۋى ءتارىزدى شارالار جۇرگىزىلەدى.
اbai.kz
