شىمكەنتتەگى وبلىستىق قان ورتالىعىندا «ەل تاۋەلسىزدىگىنىڭ 25 جىلدىعىنا 25 يگى ءىس» شاراسىنىڭ «دەنى ساۋدىڭ جانى ساۋ» ايلىعى اياسىندا «وزگەگە ءومىر سىيلا» اكتسياسى ءوتتى. وعان وبلىسىمىزدىڭ بەلسەندى جاستارى مەن پوليتسەيلەرى، سپورتشىلار مەن مادەنيەت مايتالماندارى جانە مەشىت يمامدارى، سونداي-اق، قالا تۇرعىندارى قاتىستى. جالپى، بۇل كۇنى «وزگەگە ءومىر سىيلا» اكتسياسىنا 200-دەن استام ازامات كەلىپ، 100 ليتردەي قان تاپسىردى.

ماسەلەن، قان تاپسىرۋعا العاش رەت كەلگەن سپورتشى، «قازاقستان بارىسى» سايىسىنا قاتىسۋشى نۇرسۇلتان مىڭعىشەۆ وسىناۋ يگى ىسكە ءوزىنىڭ دە اتسالىسىپ، وزگەنىڭ ءومىرىن ساقتاپ قالۋعا ۇلەس قوسىپ جاتقانىنا ءدان ريزا. تاۋەلسىزدىكتىڭ ءتول قۇرداسى بۇگىنگى مەديتسينا مەكەمەسىندەگى سوڭعى زاماناۋي قۇرىلعىلاردى كورىپ، بۇل دا بولسا، ەگەمەندى ەلىمىزدىڭ شيرەك عاسىرداعى جەتكەن جەتىستىگى ەكەنىنە كۋا بولدى.

ال «بىزبەن بىرگە» ەرىكتىلەر مەكتەبىنىڭ جەتەكشىسى بوتاگوز ىزتىلەۋدىڭ سوزىنشە، وبلىستاعى بەلسەندى جاستاردىڭ بۇلايشا قان تاپسىرۋى ءداستۇرلى شاراعا اينالعان. بۇگىنگى شاراعا قاتىسقان 40 شاقتى بەلسەندى جاس قان تاپسىرۋ ارقىلى وزگە بىرەۋدىڭ ءومىرىن ساقتاۋعا سەبەپشى بولسا، بۇل ازاماتتىق پارىزىنىڭ ورىندالعانى دەپ ەسەپتەۋگە بولادى.

نەگىزىنەن، 18 جاستان اسقان، دەنساۋلىعى دۇرىس، قايىرىمدى، ەڭ باستىسى، ادام ءومىرىن ساقتاپ قالۋعا كومەگىن بەرۋگە دايىن كەز كەلگەن ازامات دونور رەتىندە قان تاپسىرىپ، دارىگەرلەردەن كەڭەس الا الادى. قان قۇيۋ ارقىلى عانا ءومىردى ساقتاپ قالۋعا بولاتىن اۋرۋ ءتۇرى وتە كوپ. بۇعان گەموفيليا، قان ازدىعى، باۋىر قاتەرلى ىسىگى پەن كۇيىك الۋ ت.ب. دەرتتەردى قوسۋعا بولادى. اياقاستى اپات جاعدايىندا نەمەسە كۇردەلى وپەراتسيا كەزىندە دونور قانىن قۇيۋ قاجەتتىلىگى دە ءجيى كەزدەسەدى. اسىرەسە، دونور قانى بوسانعان انانىڭ ءومىرىن ساقتاپ قالۋعا وتە ءجيى قاجەت.

 وقو اكىمىنىڭ ءباسپاسوز قىزمەتى

اباي-اقپارات