بۇگىن وڭتۇستىك قازاقستان وبلىسىندا «ەل تاۋەلسىزدىگىنىڭ 25 جىلدىعىنا 25 يگى ءىس» شاراسى باستاۋ الدى. ءوڭىر باسشىسى ب.اتامقۇلوۆتىڭ باستاماسىمەن ءوتىپ جاتقان باستاۋ العان بۇل يگى ءتۇرلى ايلىق شارالارىمەن ۇيىمداستىرىلۋدا.

اتاپ ايتقاندا، «دەنى ساۋدىڭ جانى ساۋ»، «الەۋمەتتىك قولداۋ»، «وتباسىن قولداۋ»، «بىرلىگى جاراسقان تاۋەلسىز قازاقستان!» جانە «يگى ءىس جاساۋعا اسىق» اتتى بەس ءتۇرلى ايلىق شارالارى كەزىندە بارلىق سالالار بويىنشا جەلتوقسان ايىنا دەيىن يگى ىستەر ۇيىمداستىرىلىپ، وتكىزىلەتىن بولادى. 

ماقساتى – ەلىمىزدىڭ شيرەك عاسىرداعى تاۋەلسىزدىك جىلدارىندا ەڭسە تىكتەپ، ازات ەلگە اينالعان حالقىمىزدىڭ قۋانىشىنا ورتاقتاسىپ، ءاربىر قازاقستاندىقتىڭ مەرەكەنى سەزىنۋىنە اتسالىسۋ بولىپ تابىلادى. 
وسىعان بايلانىستى، بۇگىن «دەنى ساۋدىڭ – جانى ساۋ» ايلىق شاراسى ءوتىپ، «اشىق ەسىك كۇنى» ۇيىمداستىرىلدى. شارا وبلىستاعى بارلىق مەديتسينا ۇيىمدارىندا - وبلىستىق، قالالىق، اۋداندىق، جالپى سانى 120 ەمدەۋ مەكەمەلەرىندە ءوتىپ، «اشىق ەسىككە» كەلگەن 7 مىڭعا جۋىق تۇرعىن ارتەريالىق قان قىسىمىن ولشەۋ، قان قۇرامىنداعى گليۋكوزا دەڭگەيىن، حولەستەريندى، ارتىق دەنە سالماعىن (كەتلە يندەكسى ارقىلى) انىقتاۋ، كوز جانە ءتىس اۋرۋلارى، ونكولوگيالىق اۋرۋلار سىندى دەرت تۇرلەرى بويىنشا 30 ءتۇرلى تەكسەرۋ مەن كەڭەس الۋدان تەگىن ءوتتى. 

جالپى، ەلىمىز ەگەمەندىك العان شيرەك عاسىردا مەديتسينا سالاسى ءبىرتالاي جەتىستىكتەردى باعىندىردى. تارقاتىپ ايتساق، دەنساۋلىق ساقتاۋ ۇيىمدارىنىڭ ماتەريالدىق-تەحنيكالىق بازاسى جاڭارىپ، مەديتسينا ۇيىمدارىنىڭ جابدىقتالۋى 25,3 پايىزدان 65,35 پايىزعا دەيىن ءوستى. وسى جىلدار ىشىندە 347 جاڭا نىساندار سالىنىپ، وبلىستىق دەڭگەيدەگى ناركولوگيالىق اۋرۋحانا، سالاۋاتتى ءومىر سالتىن قالىپتاستىرۋ ورتالىعى، كارديولوگيالىق ورتالىق، وبلىستىق بالالاردى وڭالتۋ ورتالىعى، «مەيىرىم» وڭالتۋ ورتالىعى، «انا مەن بالا» وڭالتۋ ورتالىقتارى اشىلدى. ال «100 مەكتەپ، 100 اۋرۋحانا» باعدارلاماسى اياسىندا وبلىستىق قان ورتالىعى، شىمكەنتتەگى № 3 ەمحانا، شىمكەنت جانە تۇركىستان قالالارىندا 2 بالالار اۋرۋحانا مەن تولەبي اۋدانىندا لەنگىر قالالىق اۋرۋحاناسى ەمحاناسىمەن سالىنىپ، پايدالانۋعا بەرىلدى. سونىمەن قاتار، تاۋەلسىزدىك العان 25 جىلدا وبلىس حالقىنىڭ جالپى ءولىم-ءجىتىم كورسەتكىشى 6,9-دان 5,5 دەيىن تومەندەسە، انا ءولىمى 7 ەسەگە، نارەستەلەر ءولىم-ءجىتىمى 3 ەسەگە دەيىن ازايعان.

اباي-اقپارات