اۋەزحان قودار سسسر جانە قازاقستان جازۋشىلار وداعىنىڭ مۇشەسى بولعان، قازاقستان جازۋشىلار وداعى جانىنداعى كوركەم اۋدارما جانە ادەبي بايلانىس جونىندەگى باس رەداكتسيالىق كوللەگيانىڭ رەداكتورى قىزمەتىن اتقارعان. 1994 جىلدان بەرى «التىن عاسىر» قازاقستان حالىقتارى مادەنيەتىن قورعاۋ جونىندەگى وداقتاستىقتىڭ پرەزيدەنتى، 1999 – 2001 جىلدارى “سوروس-قازاقستان” حالىقارالىق قورىنىڭ باسقارما مۇشەسى، 2002 جىلدىڭ جەلتوقسانىنان قازاقستان رەسپۋبليكاسى پرەزيدەنتى جانىنداعى باق جونىندەگى كەڭەستىڭ مۇشەسى، 2006 جىلدان «ەۋرازيالىق زەرتتەۋلەر ينستيتۋتى» رەسەي-قازاقستان قورى باس ديرەكتورىنىڭ كەڭەسشىسى، 2006 جىلدىڭ مامىرىنان – مادەني ساياسات جانە ونەرتانۋ ينستيتۋتىنىڭ ديرەكتورى بولعان ەدى. «پاراسات» وردەنىمەن ماراپاتتالعان.

قازاق تىلىندە اۋەزحان قوداردىڭ ەكى كىتابى شىققان: «قاناعات قاعاناتى» (1994), جانە «ورالۋ» (2006), ورىس تىلىندە شىققاندارى: «كرىلاتىي ۋزور» (1990), «اباي (يبراگيم) كۋنانباەۆ (1996), «كرۋگي زابۆەنيا» (1998), «وچەركي پو يستوري كازاحسكوي ليتەراتۋرى» (1999), «ستەپنوە زنانيە: وچەركي پو كۋلتۋرولوگي» (2002), «زوۆ بىتيا» (2006) جانە قازاق پوەزياسىنىڭ بەس عاسىرىن قامتىعان «انتولوگيا كازاحسكوي پوەزي ۆ پەرەۆوداح اۋەزحانا كودارا» (2006); اعىلشىن تىلىنە اۋدارىلعانى – «تسۆەتى رۋين» (2004). ولەڭدەرى اعىلشىن، كارىس، ۋكراين تىلدەرىنە اۋدارىلعان.

اۋەزحان قودار قازاق جانە ورىس تىلدەرىندە جازاتىن بيلينگۆاليست جانە ۇلتتىق كلاسسيكانىڭ اۋدارماشىسى رەتىندە تانىمال. ورىس تىلىنە ورتاعاسىرلىق جىراۋلاردىڭ پوەزياسىن، ابايدىڭ، ماعجاننىڭ، جۇماتاي جاقىپباەۆتىڭ شىعارمالارىن اۋدارعان. قازاق تىلىنە ە.زامياتيننىڭ «اتيللا» دراماسىن، م. حايدەگگەردىڭ، ج. دەلەزدىڭ، ح.ورتەگا-ي-گاسسەتتىڭ جانە «باتىس فيلوسوفياسى انتولوگياسى» جيناعىنا كىرگەن وزگە شەت ەل فيلوسوفتارىن اۋدارعان (2002). قازاق تىلىندە شىققان «مادەنيەتتانۋ سوزدىگىنىڭ» (2001) اۆتورلارىنىڭ ءبىرى. «مادەني مۇرا» مەملەكەتتىك باعدارلاماسىنىڭ اياسىندا قازاق تىلىنە الەمدىك مادەني تانىمنىڭ ەكى تومىن اۋدارعان.

اباي-اقپارات