ايجان تۇرمىسقا شىقتى. ۇيلەنگەنىنە 5 جىل بولعاندا كەزدەسىپ قالدىق. شاشتارى سيرەپ، كوزدەرى كىرتيىپ، شارشاڭقى كورىندى.

- ءبىز ەمدەلمەگەن جەر قالمادى. كىنا مەنەن ەكەن. ءوز اكە-شەشەم "كۇيەۋىڭنىڭ باعىن بايلاما، اجىراس" دەپ جاتىر. قالاي اجىراسامىن؟! مەن ونى سۇيەمىن، قيمايمىن... ول مەنى قانشا جەردەن سۇيسە دە جاسى 40-قا تايادى. بالا كەرەك قوي وعان. كەلەسى جازدى كۇتىپ ءجۇرمىن. جازدا ءبىر جاڭالىق بولاتىنداي مەن اجىراسۋدى جازعا ىسىرا بەرەم ايتەۋىر... - دەدى. ارادا بىرنەشە اي ءوتتى. تاعى ءبىر جىل ءوتتى. ءبىز تاعى كەزدەستىك. 

ايجاننىڭ ماڭدايىن ءاجىم تورلاپ الىپتى. ول سونداي جۇدەۋ كورىندى. لەزدە قارتايىپ كەتكەنىنە تاڭداندىم.

- كۇيەۋىم دە مەنى قيمايدى. بۇل جازدى دا بىرگە وتكىزەمىز. كەلەسى جازدا اجىراساتىن بولىپ شەشتىك، - دەدى ول جىلامسىراپ.

ولاردىڭ ۇيلەنگەنىنە بيىل 7 جىل تولدى. بۇل جازدى مەن دە ىشتەي ۇرەيلەنە كۇتتىم. سەبەبى بۇل جاز تاعدىرى توعىسقان جاقىن جانداردى ەكى ايىرماق... ايجاننىڭ اجىراسۋعا دايىندالىپ جۇرگەنى تۋرالى قاۋەسەت ەل ىشىندە گۋلەپ تۇردى. كۇن كۇزگە تاياپ قالعان شاق ەدى. جاپىراقتاردىڭ رەڭى وزگەرىپ، سارعىش تۇسكە بويالا باستاعان.

ايجان قوڭىراۋ شالىپ، ۇيگە كەلە جاتقانىن ايتتى. باسپالداقتان كوتەرىلگەن اياق دىبىسىن ەستىپ تۇرمىن. تۇك-تۇك-تۇك. ەسىكتى ۇرىپ جاتىر. انە-مىنە ول كىرىپ كەلمەك. ال مەن قازىر ونىڭ كۇيەۋىن قيماي، سۇيەتىنىن ايتىپ سولقىلداپ جىلايتىنىن، ءوزىمنىڭ ونى نە دەپ جۇباتاتىنىم تۋرالى ءسوز تاپپاي قينالدىم. تۇك-تۇك-تۇك. ول ەسىكتى ەكىنشى رەت قاققاندا بارىپ اشتىم. ۇيگە كۇلىمسىرەپ كىرىپ كەلە جاتقان اياعى اۋىر ايجاندى كورۋ قانداي باقىت ەدى دەسەڭشى! مەن مۇنداي اجارلى ايەلدى العاش رەت كورىپ تۇردىم...

قۇرالاي سەيسەنبەكقىزى

Facebook-تەگى پاراقشاسىنان