كەزدەيسوقتىق پا، زاڭدىلىق پا ونى پاتشا كوڭىلدى وقىرمان ءوزى پايىمداي جاتاتىن شىعار. ال، ءبىزدىڭ بىلەتىنىمىز – «تاۋ مەن تاۋ كەزدەسپەيدى، ادام مەن ادام كەزدەسەدى» دەگەن حالىقتىڭ قالتقىسىز ايتقان ءسوزى عانا...

جاقىندا  اقتوبە قالاسىنا جاڭادان اكىم تاعايىندالدى. قامال الار شاعىندا ەكەن اكىم. قامالدى باعىندىرىپ، جەرگىلىكتى حالىقتىڭ الەۋمەتتىك جاعدايىن جاقسارتىپ عانا قويماي، سالافيتتەردى دە ساباسىنا تۇسىرەر دەپ ۇمىتتەنەمىز ەندى. ونىڭ بولاشاعىن بولجايتىن بالشى ەمەسپىز، ءبىزدىڭ بىلەتىنىمىز سۋ جاڭا اكىمنىڭ تاسقا باسىلعان ءومىربايانى...

وسىدان قىرىق جىل بۇرىن وڭتۇستىكتىڭ بوگەن اۋدانىندا دۇنيەگە كەلگەن ازاماتتىڭ العان اسۋى ءبىر كىسى ارماندايتىنداي-اق: ەڭبەك جولىن ەسەپشىلىكتەن باستاعان يلياس  يسپانوۆ سوڭعى لاۋازىمى قر جوعارعى سوتىنىڭ سوتتاردىڭ قىزمەتىن قامتاماسىز ەتۋ جونىندەگى دەپارتامەنتتىڭ ديرەكتورلىعىنا دەيىن دارا جولدان ءوتىپتى.

«...ادام اداممەن كەزدەسەدى» دەگەندەي، اقتوبە وبلىسىنىڭ اكىمى بەردىبەك ساپارباەۆپەن دە  يلياس يسپانوۆتىڭ ءيىن تىرەسە جۇمىس ىستەگەن كەزى بولىپتى. بەردىبەك ماشبەكۇلى وڭتۇستىك قازاقستان وبلىسىنىڭ تىزگىنىن ۇستاپ تۇرعان تۇستا (1999-2002) يلياس اۋەلى باس مامان، سوسىن وبلىس اكىمىنىڭ كومەكشىسى قىزمەتىن اتقارىپتى. تالاپشىل ءارى حالىقشىل اكىمنىڭ كوڭىلىنەن شىققان بولۋى كەرەك، ءارى قاراي «دۋەت» جالعاسىن تاۋىپتى دا.  ساپارباەۆ وڭتۇستىكتەن استاناعا اتتانىپ، قر كەدەندىك باقىلاۋ  اگەنتتىگى توراعاسىنىڭ ورىنتاعىنا جايعاسقان ساتتە  كومەكشىلىككە تاعى دا ساپارباەۆ  ساپاربەكتىڭ بالاسىن قولاي كورىپتى. كەيىن بەردىبەك ماشبەكۇلى قارجى ۆيتسە-ءمينيسترى-كەدەندىك باقىلاۋ اگەنتتىگىنىڭ توراعاسى (2002-2006) بولعاندا،  يلياس يسپانوۆ استانا قالاسى بويىنشا كەدەندىك باقىلاۋ دەپارتامەنتى كەدەندىك باسقارماسىنىڭ ورىنباسارى، ءبىرىنشى ورىنباسارى لاۋازىمىندا قىزمەت اتقارىپتى. وسىدان كەيىنگى ءومىر  اعىسى ەكەۋىن ەكى سالادا ەڭبەك ەتۋدى ءناسىپ ەتكەن كورىنەدى.

ءبىر-بىرىنە دەگەن ىقىلاس-پەيىلى ءتۇزۋ، سىيلاستىعى مەن سەنىمى جوعارى جانداردىڭ تۇبىندە  جولى قايتا تۇيىسەتىنى انىق. ءبىزدىڭ سوعان ابدەن كوزىمىز جەتتى. قۇدانىڭ قۇدىرەتى، ەكەۋىنىڭ جولى ون جىلدان كەيىن اقتوبە وڭىرىندە  تاعى دا توعىستى. وسىدان كەيىن دۇنيەنىڭ دوڭگەلەك ەكەندىگىنە، توعىزىنشى تەرريتوريا تۇرعىندارىنىڭ قىتايلىقتار ازىلدەپ ايتپاقشى، ء«بىر-ءبىرىن جاقسى تانيتىندىعىنا» تاڭعالماي كورىڭىز.

ەندىگى جەردە  اقتوبە وبلىسىنىڭ اكىمى بەردىبەك ساپارباەۆ پەن اقتوبە قالاسىنىڭ اكىمى يلياس ساپاربەكۇلىنىڭ وسىنداي ۇيلەسىمدى تاندەمى تالايلارعا ۇلگى بولار دەگەن سەنىمدەمىز.

ايتپاقشى، اقتوبە قالاسىنىڭ اكىمى يلياس يسپانوۆتىڭ اسەم (1997), زەرە (2010) اتتى قىزدارى مەن شىڭعىس (2000), بەردىبەك (2005) اتتى ۇلدارى بار. وسىلايشا بەردىبەكتىڭ اكەسى ەندى بەردىبەك ساپارباەۆتىڭ قۇزىرىندا وبلىستىڭ ورتالىعىن باسقاراتىن بولادى.

P.S. بەردىبەك ماشبەكۇلىنىڭ اقتوبەدەن قالا باسشىسىنا لايىقتى كادر تابا الماي، استانادان اتتاي قالاپ الدىرعانىنا قاراعاندا يلياس يسپانوۆتىڭ ىسكەرلىگى كەرەمەت بولىپ تۇر عوي. جاڭا اكىمنىڭ العىرلىعىنا الداعى ۋاقىتتا كۋا بولا جاتارمىز-داعى. ازىرگە اقتوبە شاھارىنىڭ سۋ جاڭا اكىمىنە، بەردىبەكتىڭ  اكەسىنە اق جول تىلەيمىز.

عابيت ىسكەندەرۇلى

Abai.kz