اقسۋلىق فەرمەر گۇلميرا ۇلىقپانوۆا جۇمىس كۇنىن قولىنا ءبىر ۋىس توپىراق الىپ، قاسيەتتى جەرمەن سىرلاسۋدان باستايدى. 

گۇلميرا ۇلىقپانوۆا مىنە بىرنەشە جىلدىڭ ءجۇزى بولدى، فەرمەر شارۋاشىلىعىن جۇرگىزۋدە ايەلدەردىڭ ەرلەردەن كەم تۇسپەيتىنىن دالەلدەپ كەلەدى.  ديقانشىلىقتى جاڭادان باستاعان ول وسىدان 5 جىل بۇرىن كارتوپ ەگۋدى قولعا الدى. العاشقى كەزدە بيزنەس جۇرگىزۋدە كوپ قيىنشىلىققا  كەزىككەنى دە راس. الايدا باستاعان ءىسىن ءتاستامايتىن قايسار مىنەزدى قىز  العاشقى قيىندىقتارعا مويىماي العا ۇمتىلدى.

ەندى مىنە، كاسىپكەرلىكتىڭ العاشقى ناتيجەلەرى دە جەمىسىن بەرە باستادى. گۇلميرا بۇل بۇل تابىستارىمەن توقمەيىلسىمەي، بيزنەسىن ودان ءارى كەڭەيتۋدى جوسپارلاۋدا. وسى باعىتتا ول اقسۋ قالاسىنداعى كاسىپكەرلەر پالاتاسىنىڭ فيليالىنا بارىپ، بيزنەستى دامىتۋدىڭ مەملەكەتتىك باعدارلاماسى تۋرالى جاي-جاپسارعا قانىقتى. ەندى كاسىپكەر ايەل مەملەكەت ۇسىناتىن مۇمكىندىكتەردى پايدالانىپ، كاسىپكەرلىكتى وركەندەتۋدىڭ ءادىس-تاسىلدەرىن قولدانباق.

 «جەر ەرەكشە، قامقور يەسىن كۇتەدى. بۇرىن بۇل جەر تىڭ جاتقان جەر ەدى. ءبىز يگەرە باستادىق. العاشقى جىلدارى ءونىم الا المادىق. سوڭعى ءۇش جىلدان بەرى ەڭبەگىمىزدىڭ جەمىسىن كورىپ كەلە جاتىرمىز»، – دەيدى فەرمەر. 

گۇلميرا ۇلىقپانوۆا جۇمىس كۇنىن قولىنا ءبىر ۋىس توپىراق الىپ، قاسيەتتى جەرمەن سىرلاسۋدان باستايدى. كوزىن تاپساڭ، قاسيەتتى جەردىڭ بەرمەيتىنى جوق ەكەنى ايان. ول جۇمىس جاساعاندا ەشكىمنەن قالىسپايدى، توپىراقتى ايالاپ، وڭدەيدى جانە الار استىعى دا جاقسى.

وتكەن جىلى گۇلميرا باستاعان ديقاندار مول ءونىم الىپ، ەتكەن ەڭبەكتەرى ەش كەتپەي، ناتيجەسى كوڭىلدەن شىقتى. گەكتارىنا 300-400 تسەنتنەردەن كارتوپ الدى. ءسابىز 45-50-دەن. الداعى جوسپاردا ەگىن القابىن  كەڭەيتۋ تۇر.

گۇلميرا – وسى وڭىردەگى اسا ەڭبەكقور ديقان ايەل. ءوز ىسىنە مىعىم جان. اگروتەحنيكانى ۇتىمدى جۇرگىزەدى. ۇنەمى توپىراق وڭدەۋدىڭ جاڭا تاسىلدەرىن ەنگىزەدى. ونىڭ اۋىل شارۋاشىلىعى تەحنيكاسىنا ارىپتەستەرى دە قىزىعا قارايدى.

مەحانيزاتوردىڭ كومەكشىسى ءادىل ساماتوۆ:ء «بىز وتكەن جىلى ساتىپ العان ءسابىز تۇقىمىن سەپكىش قۇرال وتە ءتيىمدى بولىپ شىقتى. تۇقىمدى ساپالى سەبەدى، ءدان ريزامىز»،- دەيدى.

گۇلميرا ۇلىقپانوۆانىڭ ارمانى – ەگىنى جايقالعان دالادا تۇرىپ، ءومىر ءسۇرۋ. وسى جەردەن ءۇي سالماقشى. تاڭمەن تالاسا تۇرىپ، دالاعا اسىعاتىن كاسىپكەر ايەل جەر-انانىڭ ەڭبەك ەتىپ، ەگىن ەككەن ادامعا قاشاندا جومارتتىق تانىتاتىنىن جاقسى بىلەدى. تۇگىن تارتساڭ، مايى شىعاتىن قاسيەتتى جەردە ءومىر ءسۇرۋ دە – ءبىر باقىت ەمەس پە. گۇلميرانىڭ بۇل ارمانى ورىندالاتىنىنا ءبىزدىڭ دە سەنىمىمىز زور.

Abai.kz