وتكەن اپتادا تۇركيانىڭ ىستامبۇل قالاسىنىڭ حالىقارالىق «اتاتۇرىك» اۋەجايىندا تەراكتى بولىپ، 50-دەن استام ادامنىڭ قازا بولعاندىعىن جانە 200-گە جۋىق ادامنىڭ جاراقات العاندىعىن حابارلاعان ەدىك.

اتالعان لاڭكەستىك وقيعاعا قاتىستى تۇركيا پرەزيدەنتى رەجەپ تايىپ ەردوعان جاقىندا مالىمدەمە جاسادى. ءوز مالىمدەمەسىندە تۇركيا پرەزيدەنتى «اتاتۇرىك» اۋەجايىنداعى تەراكتىنى جاساعاندار داعىستاننىڭ، قىرعىزستاننىڭ جانە تاجىكستاننىڭ ازاماتتارى ەكەنىن ايتتى. لاڭكەستىك وقيعاعا قاتىسى بار دەگەن كۇدىكپەن بارلىعى 30 ادام تۇتقىندالىپتى.

رەجەپ تايىپ ەردوعان، تۇركيا پرەزيدەنتى:

- تەراكتىگە قاتىسى بار دەگەن كۇدىكتىلەردىڭ سانى 30 ادامنان استى. كۇدىكتىلەردى تەرگەۋ بارىسىندا ول ادامداردىڭ ناقتى كىم ەكەندەرى جانە قاي ەلدىڭ ازاماتارى ەكەندەرى انىقتالدى. تەرگەۋ جۇمىستارىنىڭ قورىتىندىسى كورسەتكەندەي، «اتاتۇرىك» اۋەجايىندا جارىلىس جاساعان لاڭكەستەردىڭ بارلىعى قىرعىزستان، تاجىكستان جانە داعىستان رەسپۋبليكالارىنىڭ ازاماتتارى بولىپ شىقتى. وكىنىشكە وراي ءبىز بۇل ەلدەرمەن تىعىز قارىم-قاتىناستامىز جانە بىزگە كورشىلەس مەملەكەتتەر بولىپ تابىلادى.

سونداي-اق، تۇركيا پرەزيدەنتى ىستامبۇلداعى تەراكتىنى «يشيم» (يسلام مەملەكەتى – قازاقستان اۋماعىندا تىيىم سالىنعان ەكستريميستىك توپ) سودىرلارى جاساعانىن دا ايتقان.

ەستەرىڭىزگە سالا كەتەيىك، ماۋسىمنىڭ 28-كۇنى ىستامبۇل قالاسىنداعى «اتاتۇرىك» حالىقارالىق اۋەجايىنىڭ تەرمينالىندا جارىلىس بولىپ، 50-دەن استام ادام قازا تاپقان جانە 239 ادام جاراقات العان. قازا تاپقانداردىڭ 19-ى شەتەلدىك تۋريستەر ەكەندىگى دە انىقتالدى.

سونىمەن قاتار، «اتاتۇرىكتەگى» تەراكتىنى ۇيىمداستىرۋشى نەگىزگى كۇدىكتى – رەسەي ازاماتى، ەتنيكالىق شەشەن احماد چاتاەۆ ەكەندىگى دە انىقتالعان.

(شەشەنستاندىق سودىر - احماد چاتاەۆ)

احماد چاتاەۆ شەشەنستانداعى «يمرات كاۆكاز» قىلمىستىق توبىنىڭ مۇشەسى بولعان. اتالعان قىلمىستىق توپتىڭ جەتەكشىسى دوكۋ ۋماروۆ ولتىرىلگەننە كەيىن، احماد «يشيم»-ءنىڭ رەسەيدەگى باس وكىلى بولعان. رف انتيتەرروريستىك ۇيىمىنىڭ حابارلاۋىنشا، چاتاەۆ يشيم ليدەرىنىڭ نۇسقاۋىمەن  رەسەي جانە ەۋروپا ەلدەرىندە تەراكتى جاساۋدى جوسپارلاعان ەكەن.

ءتۇيىن: جاقىندا رەسەي مەن تۇركيا اراسىنداعى داۋ-جانجالعا اراعايىندىق ايتقان قازاقستان پرەزيدەنتىنىڭ پارمەنىمەن پۋتين مەن ەردوعان قايتا قۇشاق قابىستىرعان-تىن. ەكى ەلدىڭ دە ەكونوميكاسى اراداعى كيكىلجىڭنەن كەيىن ەداۋىر قۇلدىراي باستاعاننان سوڭ، ۆلاديمير پۋتين مەن تايىپ ەردوعان تاتۋلاسىپ، اراداعى ءتۋرزيمدى قايتا جاڭعىرتاتىنىن مالىمدەگەن. بىرقاتار رەسەيلىك جانە پرو-رەسەيلىك باسىلىمدار ەردوعان كرەملدىڭ الدىندا ەڭكەيىپ تۇرىپ، كەشىرىم سۇرادى دەپ سۇيىنشىلەدى. دەسە دە بۇل شىندىققا جاناسپايتىن اقپارات ەكەنىن حابارلاعانبىز (http://abai.kz/post/view?id=8589).

ەندى بۇگىن ەلۋدەن استام ادامنىڭ ءومىرىن جالماپ، ەكى جۇزدەن استامىن جاراقاتتاعان جارىلىستى ۇيىمداستىرعان نەگىزگى قىلمىسكەر - رەسەي ازاماتى بولىپ شىقتى. بۇل ءوز كەزەگىندە ەندى عانا ىمىرا تاۋىپ  كەلە جاتقان رف مەن تۇركيا اراسىنداعى داۋدى قايتا تۇتاتا ما؟

تۇركيا تەرريتورياسىنا رۇقساتسىز كىرگەن رەسەيلىك سۋ-24 ۇشاعىن، دالىرەك ايتساق، ونىڭ جالعىز ۇشقىشىن اتىپ قۇلاتقانى ءۇشىن ەردوعان كرەملدەن كەشىرىم سۇراعان بولسا، "اتاتۇرىك" حالىقارالىق اۋەجايىندا جارىلىس جاساپ، بىرنەشە مەملەكەتتىڭ ازاماتتارىن ولتىرگەن رەسەي ازاماتى ءۇشىن پۋتين ەردوعاننان جانە وزگە مەملەكەتتەردەن كەشىرىم سۇراۋى ءتيىس!

نۇرزات توعجان

Abai.kz