ەسىرگەپوۆتىڭ ايتۋىنشا، قازاقستان بيلىگى "جاڭاوزەن-2011" حالىقارالىق كوميتەتىنىڭ جەر ماسەلەسىنە قاتىستى ميتينگ قارساڭىندا ۇستالىپ، قىلمىستىق ءىس قوزعالعان ازاماتتىق بەلسەندىلەر ماكس بوقاەۆ، تالعات ايان، جانات ەسەنتاەۆ، عاتاۋعالي بوحان، ساعىنعالي قاپيزوۆ، قۇبايدوللا شولاق، ماحامبەت ءابجاندى 20 ماۋسىمعا دەيىن قۋدالاۋدى توقتاتۋ تۋرالى مالىمدەمەسىنە "سىرعىتپا جاۋاپ" قانا العان. ونىڭ سوزىنشە، بيلىك ورىندارىنان كەلگەن جاۋاپتا بەلسەندىلەرگە قاتىستى ءىستى ىشكى ىستەر مينيسترلىگى، ۇلتتىق قاۋىپسىزدىك كوميتەتى قاراپ جاتقانى عانا ايتىلعان.

"بيلىككە مالىمدەمەمىزدە 20 ماۋسىم - بۇۇ ادام قۇقىعى جونىندەگى كوميتەتىنىڭ 117-سەسسياسىنىڭ اشىلاتىن كۇنى اتالعان بەلسەندىلەردىڭ قۇقىعى مەن باس بوستاندىقتارىنا قاتىستى ادىلەتتى، زاڭ شەڭبەرىندە شىنايى جاۋاپ بەرىلمەسە شەكسىز مەرزىمگە اشتىق جاريالايتىنىمىزدى ەسكەرتتىك" دەيدى رامازان ەسىرگەپوۆ ازاتتىققا. ول اشتىقتى ءوزى باس رەداكتور بولعان "الما-اتا ينفو" گازەتىنىڭ كەڭسەسىندە ۇستاپ جاتقانىن ايتتى.

ەسىرگەپوۆ سونىمەن قاتار حالىقارالىق ۇيىمدار مەن حالىقارالىق قۇقىق قورعاۋ ۇيىمدارى شاڭىراق وقيعاسىنا قاتىستى سوتتالعان اقىن ارون اتابەك (ەدىگەەۆ), وپپوزيتسياشىل ساياساتكەر ۆلاديمير كوزلوۆ، قۇقىق قورعاۋشى ۆاديم كۋرامشين، جۋرناليست گۋزيال بايدالينوۆا زاڭسىز سوتتالدى دەپ تانىعانىن ايتادى.

رامازان ەسىرگەپوۆ بۇعان قوسا قازاقستان بيلىگى بۇۇ ادام قۇقىعى جونىندەگى كوميتەتىنىڭ "قازاتوموندىرىس" ۇلتتىق كومپانياسىنىڭ بۇرىنعى پرەزيدەنتى، تۇرمەدە وتىرعان مۇحتار جاكىشەۆكە جانە وزىنە قاتىستى شىعارعان شەشىمدەرىن ورىنداماي وتىر دەيدى.

اbai.kz