ءبىزدىڭ ادامدارىمىزدىڭ زاڭ بىلۋدەن جۇرداي ەكەنىن اڭعارعان الاياقتاردىڭ  ءبارى وڭاي ولجاعا كەنەلىپ ءجۇر. اسىرەسە، ۇلەسىڭدى قوسىپ ءۇي سالۋدا قۇرىلىس كومپانيالارى الدايدى. ال ادامداردىڭ قۇقى بۇزىلماۋىن قاداعالاۋعا ءتيىستى ورگاندارىمىز ولارعا جانى اشىپ زاڭدى تۇرعىدان قورعالۋىنا مۇمكىندىك تۋعىزۋعا مويىن بۇرمايدى.  وزدەرىن ءوزى قورعاسىن، سوت ءبارىن شەشەدى دەيدى ولار. 

ءماجىلىستىڭ جۋىردا بولعان پلەنارلىق وتىرىسىندا حالىقتىڭ ىسىنە قاي كۇندە جانى شىرىلداي ارالاسىپ جۇرەتىن كوممۋنيست دەپۋتات ايقىن قوڭىروۆ ءبىراز فاكتىلەردى جايىپ سالدى. 2013 جىلى 22 ساۋىردە پرەزيدەنت ۇلەسكەرلەر داۋىنا وراي ولاردىڭ قۇرىلىس كومپانيالارىمەن جاسالاتىن كەلىسىمشارتتارى «ۇلەسىمەن قاتىسۋشى» فورماسىندا جاسالۋى كەرەكتىگىن ەسكەرتكەن ەكەن. سوعان قاراماي انا قۋلار كەلىسىمشارتتى «ينۆەستيتسيا سالۋشى كەلىسىمشارتى» فورماسىندا بەكىتىپ الاتىن كورىنەدى. بۇل ەكەۋىنىڭ ايىرماسى كوپ. اتتارى دا باسقا عوي: «ۇلەسكەر» نەمەسە «ينۆەستور». ء سويتىپ ءبىزدىڭ زاڭدارىمىزداعى ۇلەسكەرلەردى قورعايتىن باپتار بۇل مامىلەگە جۇرمەي قالاتىن كورىنەدى. ونىڭ ۇستىنە قۇرىلىس كومپانياسى ۇلەسكەرلەرمەن مامىلە جاساۋعا بايلانىستى زاڭ بويىنشا تالاپ ەتىلەتىن كەم دەگەندە 25 پايىز بولۋعا ءتيىستى ءوزىنىڭ ۇلەسىن دە سالماي كەتەتىن كورىنەدى.

ەلىمىزدىڭ زاڭ قاداعالاۋشى ورگاندارى الاياق قۇرىلىس كومپانياسىنىڭ الدىن كەسىپ، ونى بۇلتارتپايتىنداي ەتىپ، ۇلەسكەرمەن ەكەۋىنىڭ اراسىنداعى كەلىسىمشارتتىڭ تيپتىك ۇلگىسىن جاساپ بەرۋى كەرەك ەدى عوي. ونداي جاسالماعان. «ۇلەسكەر داۋى» دەگەن الەۋمەتتىك سىلكىنىس تۋعىزعان نارازىلىقتارعا ولار ءالى كۇنگە كوز جۇما قاراپ وتىرعان سياقتى.  وزدەرىنە تيمەسە بولدى...

وسىنىڭ كەسىرىنەن استانا قالاسىندا عانا 15 مىڭنان ارتىق ۇلەسكەر ماڭداي تەر، تابان اقىمەن تاپقان اقشالارىن سالعان ۇيلەردەگى پاتەرلەرىنە قول جەتكىزە الماي وتىرعان كورىنەدى. كوممۋنيست دەپۋتات ولاردىڭ اتىن اتاپ، ءتۇسىن تۇستەي وتىرىپ، باس پروكۋرور جاقىپ اسانوۆتىڭ اتىنا دەپۋتاتتىق ساۋال جولدادى. ساۋالدا ۇلەسكەرلەردى الداپ جۇرگەن قۇرىلىس كومپانيالارىن تەكسەرىپ، حالىقتىڭ زاڭدى مۇلىكتەرىن الۋعا قول جەتكىزۋىنە كومەك بەرۋ سۇرالعان. ءسويتىپ، بۇل ىسپەن ەندى جاڭا باس پروكۋرور باس قاتىراتىن بولدى. ناتيجەسىن كورەمىز.

س.ەلەۋ، ساراپشى

Abai.kz