كەشە جازدىق، قر اۋىلشارۋاشىلىق ءمينيسترى اسقار مىرزاحمەتوۆ پرەمەر-ءمينسيتردىڭ ورىنباسارى بولىپ تاعايىندالدى. ەندى اسقار يسابەكۇلى پرەمەردىڭ ورىنباسارلىعىمەن قاتار، پرەزيدەنت پارمەنىمەن قۇرىلعان جەر رەفورماسى تۋرالى كوميسسيانىڭ تىزگىنىن ۇستايتىن بولدى. ءبىرىنشى ۆيتسەپرەمەر باقىتجان ساعىنتاەۆ ءوزىنىڭ ورنىندا قالدى.  ال، پرەمەر-ءمينيستردىڭ تاعى ءبىر ورىنباسارى داريعا نازارباەۆا – سوڭعى ۋاقىتتا باق-تان دا، باسقا مىنبەرلەردەن دە كورىنبەي كەتتى. «جەر رەفورماسى»، «بەيبىت شەرۋلەر»، «اقتوبەدەگى تەراكتى» سەكىلدى وقيعالارعا قاتىستى بىردە-ءبىر مالىمدەمە جاساماعان داريعا نۇرسۇلتانقىزى «ۆيتسە پرەمەرلىكتەن بوساتىلىپتى» دەگەن قاۋەسەت تە جوق ەمەس.

قر پرەمەر-ءمينيسترىنىڭ رەسمي سايتىنداعى (primeminister.kz) اقپاراتتار حرونولوگياسىنا كوز جۇگىرتسەك، داريعا نۇرسۇلتانقىزىنىڭ ەسىمى ەڭ سوڭعى رەت 6-ماۋسىمدا اتالىپتى. ۇكىمەتتەگى داريعا نازارباەۆانىڭ توراعالىعىمەن وتكەن جيىن – مەملەكەتتىك قىزمەتتەرگە تۇرۋ تاقىرىبىنا ارنالعان. وسىدان كەيىن داريعا نازارباەۆا حانىم ءبىراز ۋاقىت كورىنبەي كەتكەن.

سونىمەن داريعا نۇرسۇلتانقىزى قازىر قايدا ءجۇر؟

استاناداعى اۋىس-تۇيىستەرگە قاتىستى اقپاراتتاردىڭ راس-وتىرىگىن بىلمەك بولىپ،  قر پرەمەر-ءمينيسترىنىڭ كەڭسەسىنە حابارلاسقان ەدىك. كەڭسەنىڭ قابىلداۋ بولىمىندەگى حاتشى قىز: «ول كىسىلەر بار، قازىر ءىس-ساپاردا ءجۇر. ول كىسى بۇل سۇراقتارىڭىزعا جاۋاپ بەرە المايمىن دەدى. جالپى بۇعان پرەمەر-ءمينيستردىڭ ءباسپاسوز قىزمەتىنەن تولىق ماعلۇماتتار الا الاسىز. ەرتەڭ حابارلاسىڭىز، مىندەتتى تۇردە»,-دەپ جاۋاپ قايتاردى.

الداعى ۋاقىتتا، داريعا نازارباەۆانىڭ قايدا جۇرگەندىگى تۋرالى پرەمەر-ءمينيستردىڭ ءباسپاسوز قىزمەتىنىڭ مالىمدەمەسىن جاريالايتىن بولامىز.

نۇرگەلدى ابدىعانيۇلى

Abai.kz