جاقىندا وڭتۇستىك قازاقستان وبلىسىندا ءبىر مەكتەپتىڭ 40 تۇلەگى ۇلتتىق بىرىڭعاي تەستىلەۋدى جوعارعى دەڭگەيدە تاپسىرىپ، «التىن بەلگى» يەگەرى اتاندى.

بۇل تۋرالى وقو، ايماقتىق كوممۋنيكاتسيالار قىزمەتىندە بريفينگ وتكىزىپ، ۇبت قورىتىندىسى تۋرالى بايانداما جاساعان وبلىستىق ءبىلىم باسقارماسى باسشىسىنىڭ ورىنباسارى ەرجان بۇرحانوۆ ايتتى.

سونداي-اق، ءوڭىر بويىنشا 6 تۇلەك 125 بالل جيناسا، تاعى 18 وقۋشى 124 بالل العان. بيىل وقو بويىنشا 1439 وقۋشى  «التىن بەلگىگە» ۇمىتكەر اتانسا، ولاردىڭ 575-ءسى سەنىمدى اقتاپتى. سونى ىشىندە، ماقتارال اۋدانىنداعى ب.مومىشۇلى اتىنداعى جالپى ءبىلىم بەرەتىن ورتا مەكتەپتىڭ  40 تۇلەگى  «التىن بەلگى» يەگەرى اتاندى.  ءباسپاسوز ءماسليحاتىندا بەلگىلى بولعانداي  وبلىس بويىنشا بىتىرۋشىلەردىڭ ۇبت-عا قاتىسۋ پايىزى – 73,2 پايىزدى قۇراپ، جالپى وبلىستىڭ ورتاشا بالى 77,7 پايىزدى كورسەتتى.

اتالعان اقپاراتقا قاتىستى ءبىز ۇلتتىق تەستىلەۋ ورتالىعىنا حابارلاسىپ، اتالعان مەكتەپ تۇلەكتەرى تۋرالى تولىق اقپارات الماق بولعان ەدىك، وكىنىشكە وراي ول جەردە تەلەفون تۇتقاسىن كوتەرىپ جاۋاپ بەرەتىن جان تابىلعان جوق.

اۋەلى ۇلتتىق تەستىلەۋ ورتالىعىنىڭ قابىلداۋ بولمەسىندەگى حاتشى قىز (اتى-ءجونىن ايتپادى): «قازىر بىزدە سەمينار ءجۇرىپ جاتىر. 1 ساعاتتان سوڭ حابارلاسىڭىز», - دەدى. ۋاعدالاسقان 1 ساعاتتان سوڭ قايتا قوڭىراۋ شالىپ ەدىك، «بۇل تۋرالى ۇتو-نىڭ «اقپارات ءبولىمى» جاۋاپ بەرەدى», - دەپ ەكىنشى ءبىر بولىمگە سىلتەدى. جونەلتكەن جەرگە  حابارلاسقانىمىزدا ءبولىم قىزمەتكەرى ايگۇل ومىرزاققىزى: «راس، ول تۋرالى ەستىدىك. بىراق سىزگە بۇل تۋرالى جاننا تىلەۋوۆا تولىق جاۋاپ بەرەدى», - دەپ ءۇشىنشى بولىمگە يتەرىپ قويدى. ۇلتتىق بىرىڭعاي تەستىلەۋ جۇمىستارىمەن تىكەلەي اينالىساتىن بۇل بولىمدە بىزگە اۋەلى قىزمەتكەر ايدىن نۇرىپبايقىزى: «مەن ءجاي قىزمەتكەرمىن. قازىر جانار تىلەۋوۆا جوق. 10 مينۋتتان سوڭ حابارلاسىڭىز», - دەدى. ودان كەيىن تاعى ءبىر قىزمەتكەر  ناسيحات وركەنقىزى دا جوعارىداعى ستسەناري بويىنشا تۇستەن كەيىن حابارلاسۋىمىزدى ءوتىندى.

وسىلايشا ۇتو كەڭسەلەرىن تەلەفون ارقىلى شارلاپ ءجۇرىپ، «التىن بەلگى» العان  وقو-لىق 40 تۇلەك تۋرالى مالىمەت بەرەتىن ء بىر ادامدى تابا المادىق.

دەسە دە، وڭتۇستىك قازاقستان وبلىستىق ءبىلىم باسقارماسىنىڭ باسشىسىنىڭ ورىنباسارى ەرجان بۇرحانوۆتىڭ بريفينگتەگى دەرەكتەرىنە قاراپ وتىرىپ، ب.مومىشۇلى اتىنداعى قازاق ءتىلدى جالپى ءبىلىم بەرەتىن ورتا مەكتەپ تۇلەكتەرىنىڭ جەتىستىگىنە سۇيسىندىك.

جوعارىدا ءبىزدىڭ سۇراقتارىمىزعا جاۋاپ بەرەتىن جان تابىلماعان ۇلتتىق تەستىلەۋ ورتالىعىنىڭ دەرەكتەرىنە سۇيەنسەك، بيىل  ۇبت-عا ەلىمىز بويىنشا 84079 ءبىتىرۋشى قاتىسسا، سونىڭ ىشىندە 61739 وقۋشى قازاق تىلىندە، 22340 ءبىتىرۋشى ورىس تىلىندە تەست تاپسىرعان. جالپى ەلىمىز بويىنشا مۇمكىن بولعان 125 بالدى 19 ءبىتىرۋشى جيناسا، ولاردىڭ 6-ۋى وقو-لىق تۇلەكتەر جانە  الماتى قالاسىنان - 6, شىعىس قازاقستان وبلىسىنان – 2, پاۆلودار وبلىسىنان – 2, استانا قالاسىناننان – 1, باتىس قازاقستان وبلىسى – 1, قاراعاندى وبلىسىنان – 1 وقۋشى.

وسىدان ءسال ەرتەرەكتە، قازاقستاننىڭ ءبىلىم جانە عىلىم ءمينيسترى مالىمدەمە جاساپ، ەلىمىزدەگى قازاق ءتىلدى ورتا مەكتەپتەردىڭ ءبىلىم دەڭگەيىنىڭ تىم تومەندىگىن ايتقان ەدى. قازاق مەكتەپتەرى ورىس مەكتەپتەرىمەن سالىستىرعاندا 1,5 جىلعا ارتتا قالىپ قويعان دەگەن مينيستر ساعاديەۆ مىرزا بارلىق ورتا ءبىلىم بەرەتىن مەكتەپتەرگە ۇشتىلدىلىك ەنگىزىلەتىنىن مالىمدەگەن بولاتىن. مەكتەپ وقۋشىلارىنىڭ ءتىلىن شۇبار-الالاۋعا نيەتتى ەكەنىن اڭعارتقان باس پەدوگوگ مونوتىلدىلىك يدەياسىنا ىنتا-شىنتاسىمەن قارسىلىق تانىتقان ەدى.

مينيستر اعىلشىن مەن ورىس ءتىلىن كۇشتەپ ۇيرەتپەك بولعان ورتا مەكتەپتەر جىلدى قورىتىندىلادى. ۇلتتىق بىرىڭعاي تەستىلەۋلەر اياقتالىپ، ونىڭ قورىتىندىسى بويىنشا قازاق ءتىلدى جانە ورىس ءتىلدى مەكتەپ تۇلەكتەرىنىڭ ءبىلىم كورسەتكىشى تارازىعا سالىندى. ءبىر عانا قازاق ءتىلدى ورتا مەكتەپتىڭ 40 تۇلەگى «التىن بەلگى» يەگەرى اتاندى. بۇل رەكوردتىق كورسەتكىش ەكەنىن مينيستر ساعاديەۆ مىرزانىڭ ءوزى تەرىستەي الماسا كەرەك. دەمەك، ءمينيستردىڭ «قازاق مەكتەپتەرىنىڭ ءبىلىم دەڭگەيىن تومەن» دەگەن مالىمدەمەسى شىندىققا جاناسپايتىن، جالعان دەرەك بولعانى عوي؟ ەندى مينيستر ساعاديەۆ قازاق مەكتەپتەرى تۋرالى قاتەلەسكەنىن مويىنداۋى كەرەك. ماسەلە وسىندا- مويىنداي ما؟

نۇرگەلدى ابدىعانيۇلى

Abai.kz