كەشە، ياعني،13 ماۋسىمىندا قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىمەن قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى اراسىندا ىنتىماقتاستىق جونىندەگى مەموراندۋمعا قول قويىلدى. مەموراندۋم مەملەكەتتىك قىزمەتشىلەردىڭ تىلدىك قۇزىرەتىن ارتتىرۋداعى ءوزارا ىنتىماقتاستىقتى كوزدەيدى.

قول قويۋ راسىمىنە تىلدەردى دامىتۋ جانە قوعامدىق-ساياسي جۇمىس كوميتەتىنىڭ توراعاسى اسىلوۆ قۋانىش جۇمابەكۇلى جانە مەملەكەتتىك باسقارۋ اكادەمياسىنىڭ رەكتورى ءابدىراسىلوۆ بولاتبەك سەرىكبايۇلى قاتىستى.

مەموراندۋمعا قول قويۋ بارىسىندا، قۋانىش اسىلوۆ بۇگىندە كاسىبي مەملەكەتتىك اپپارات تىلدەردى، اسىرەسە مەملەكەتتىك ءتىلدى مەڭگەرۋسىز مۇمكىن ەمەس ەكەنىن اتاپ ءوتتى.

-      ەلىمىزدە تىلدەردى مەڭگەرۋگە جانە دامىتۋعا ۇلكەن نازار اۋدارىلۋدا. ءبىز وزگەلەردى جابىرلەمەي، قازاقستان حالقىنىڭ بارلىق تىلدەرىن دامىتۋعا جاعداي جاساي وتىرىپ مەملەكەتتىك ءتىلدى دامىتۋىمىز كەرەك، - دەدى تىلدەردى دامىتۋ جانە قوعامدىق-ساياسي جۇمىس كوميتەتىنىڭ توراعاسى.  

قورىتىندى سوزىندە قۋانىش اسىلوۆ مەموراندۋمعا سايكەس                   وسى جىلى  العاش رەت «مەملەكەتتىك قىزمەتشىلەردىڭ تىلدىك قۇزىرەتىن ارتتىرۋ» پيلوتتىق جوباسى ۇيىمداستىرىلعانىن، بۇل جوبا ورتالىق مەملەكەتتىك ورگاندارداعى قىزمەتكەرلەردى مەملەكەتتىك تىلدە ىسكەرلىك تىلدىك قارىم-قاتىناس داعدىسىنا وقىتۋدى كوزدەيتىندىگىن اتاپ ءوتتى.

مەملەكەتتىك قىزمەتشىلەردى وقىتۋ كەزىندە قارقىندى-ترەنينگتى جانە قاشىقتىقتان وقىتۋدىڭ جاڭا نىسانى قولدانىلاتىن بولادى. جالپى بۇل باستاما مەملەكەتتىك ءتىلدىڭ دامۋىنا جانە مەملەكەتتىك اپپاراتتى نىعايتۋعا جاڭا ستيمۋل بەرەدى.

اباي-اقپارات