اقتوبەدەگى لاڭكەستىڭ ايەلى: ءبىز ەشكىمنىڭ الدىندا اقتالمايمىز، اللا ءبارىن كورىپ تۇر
اقتوبەدەگى تەراكت كەزىندە بەيبىت حالىققا وق اتىپ، اسكەريلەرگە شابۋىلداعان سودىر دارحان قويشيننىڭ اناسى NUR.KZ تىلشىسىنە سۇحبات بەردى. ول بالالارىن پايدالانىپ، بۇلىك جاساۋ ءۇشىن تۇزاق قۇرعان باسقا بىرەۋلەردىڭ بار ەكەنىن ايتادى.
«مەن قازىر بالامدى جوقتاپ، جىلاپ جاتىرمىن. قايعىم جەتەدى. ءالى جەرلەگەن دە جوقپىن، سۇيەگىن الا الماي ءجۇرمىن. بالام سول كۇنى قوناققا كەتكەن ادام»، — دەيدى لاڭكەستىڭ اناسى زاۋرەش.
دارحان قويشيننىڭ ايەلى ەنەسىنىڭ كۇيەۋى تۋرالى ايتقانىن ۇناتقان جوق.
«اللا تاعاللا ءبارىن كورىپ تۇر. ول كىناسىز، ءبىز اقتالمايمىز، اقيقاتتى اللا بىلەدى»،- دەيدى سودىردىڭ ايەلى.
ءبىر ايدان كەيىن وتىز جاسقا تولاتىن دارحان قويشيننىڭ ارتىندا ەكى بالاسى قالدى.
«كوزىممەن كوردىم، بىرەۋ بالامدى تەلەفونعا شاقىردى. ول ونداي بولاتىنىن ءبىلىپ بارعان جوق. قوناققا شاقىرعاندا ەكى كىشكەنتاي بالاسىنا «قايسىسىن الىپ كەتەمىن» دەپ جارماستى. ۇلكەنى «مەن بارام» دەپ جىلاعاسىن، سونى كيىندىرىپ قويدىق. سول كەزدە «بالالاردى تاستاڭدار» دەگەن قوڭىراۋ كەلدى. بالام «قوناققا بالالارىڭدى ەرتپەي كەلىڭدەر دەپ ايتتى» دەدى. ولار جينالعاندا سولاي ايتادى. بالالارىڭدى الىپ كەلىڭدەر، بولماسا تاستاپ كەتىڭدەر دەپ حابارلايدى. ناماز وقىمايتىندار دا بالامەن نە بالاسىز كەلىڭدەر دەپ ايتادى ەمەس پە، تاپ سولاي بولىپ تۇر. اكەسىنە ەرە المايتىنىن ەستىپ، جىلاعان بالاسىن ءوزى جۇباتتى. ونى دۇكەنگە ەرتىپ شىعىپ، «كيندەر سيۋرپريز» شوكولادىن اكەپ بەردى. بالاسى تاتتىگە الدانعان سوڭ،ء وزى شىعىپ كەتتى. ءبىز ونى قوناققا كەتتى دەپ وتىرمىز»، — دەيدى اناسى.
ول «ساقالدىلار اتىسىپ جاتىر» دەگەندە عانا بالاسىنىڭ بالەگە ۇرىنعانىن سەزگەن.
«بۇكىل حالىق اتىس بولىپ جاتىر دەپ شۋلاعاندا ەستىدىك. مەن سول كەزدە بىردەن كۇدىكتەندىم. سەبەبى، ول 5-ءشى مولتەك اۋدانىنا قوناققا باراتىنىن ايتىپ كەتكەن. مەن ول كەزدە كىشكەنتايلاردى ەرتىپ اپامنىڭ ۇيىنە كەتكەن ەدىم. بولعان جايدىڭ ءبارىن سول جاقتان ەستىدىم»، — دەيدى زاۋرەش.
دارحان قويشيننىڭ ۇيىندەگى ءۇش ايەل — شەشەسى، ايەلى جانە قارىنداسى حيدجاب كيگەن. ءۇيدىڭ سىرتقى ەسىگىندە ۇيگە باس سۇققاندا ايتىلاتىن ءسوزدى اراب تىلىندە جازىپ قويعان.
ء«بارى بەلگىلى نارسە. ءبىز ونى جوعالتتىق. ول ەندى جوق. نە ويلاعىلارىڭ كەلسە سونى ويلاڭدار»، — دەدى سودىردىڭ قارىنداسى
ول وسىنى ايتتى دا ەسىكتى جاۋىپ، اناسىن ۇيىنە قاراي سۇيرەدى. ەسىكتىڭ اراسىنان سىعالاعان اناسى: ء«بىز سوعىس بولىپ كەتە مە دەپ قورقامىز. اسپانىمىز اشىق، ەلىمىز تىنىش بولعانعا نە جەتسىن»، — دەدى.
