- دەرەككە قاراعاندا، تەرروريستىك اكتىنى راديكال جالعان ءدىني اعىم وكىلدەرى ۇيىمداستىرعان، ولار نۇسقاۋدى شەتەلدەن العان، - دەيدى قازاقستان پرەزيدەنتى 8 ماۋسىم كۇنى جاريالانعان مالىمدەمەسىندە. پرەزيدەنت نازارباەۆ "كەز-كەلگەن سيپاتتاعى ەكسترەميزم مەن تەرروريزمگە قارسى زاڭداردى قايتا قاراپ، بۇل قۇبىلىسقا قاتاڭ تويتارىس بەرۋ جايىن ويلاستىرۋ كەرەك" ەكەنىن ءسوز ەتتى.

- قولىنا قارۋ الىپ، كىسى ولتىرگەن ادام ءولىم جازاسىنا كەسىلۋى قاجەت، - دەيدى ول.

قازاقستاندا ءولىم جازاسىنا 2003 جىلى موراتوري جاريالانعان.

قازاقستان پرەزيدەنتى اقتوبەدەگى شابۋىلعا قاتىستى سوزىندە "ەلدىككە سىنا قاعاتىن زۇلىمدىقتاردىڭ ىمىراسىز جولىن كەسۋ" جايلى، "الەمدىك داعدارىستان ءوتۋ ءۇشىن ەل تىنىشتىعىن ساقتاۋ" تۋرالى دا ايتتى.

- ەل ىشىنە بۇلىك سالۋدىڭ، ء"تۇرلى-ءتۇستى رەۆوليۋتسيالاردىڭ" تالايىن باسقا ەلدەردەن كورىپ، ءبىلىپ وتىرمىز. ول لاڭكەستىك ارەكەتتەردەن، كوشەگە شىعىپ شۋلاۋدان باستالادى. ودان كونستيتۋتسياعا قارسى شىعادى دا، اياعىندا مەملەكەت كۇيرەپ، حالىق اش-جالاڭاش قالادى. مۇنىڭ ءبارىن ءبىز كورىپ، ءبىلىپ، بايقاپ وتىرمىز، - دەدى ول.

پرەزيدەنت نازارباەۆ مالىمدەمەسىنىڭ ورىس تىلىندە ايتىلعان بولىگىندە ء"تۇرلى-ءتۇستى رەۆوليۋتسيا" جايلى ويىن ودان ءارى تارقاتقان.

- ءبىز ء"تۇرلى-ءتۇستى رەۆوليۋتسيا" دەگەندەردىڭ ءتۇرلى ادىستەرى بارىن جانە ولار ويدان شىعارىلعان ميتينگ، كىسى ءولىمى، بيلىكتى باسىپ الۋدان باستالاتىنىن بىلەمىز. بۇل بەلگىلەر بىزدە دە كورىندى، - دەيدى نازارباەۆ.

پرەزيدەنت نازارباەۆ اقتوبەدە 5 ماۋسىمداعى شابۋىلداردا قازا تاپقان بەيبىت تۇرعىنداردىڭ تۋىستارىنا كوڭىل ايتىپ، 9 ماۋسىمدى قازاقستان بويىنشا ازا تۇتۋ كۇنى دەپ جاريالادى.

وتكەن جەكسەنبىدە اقتوبەدە بەلگىسىز ادامدار ەكى قارۋ-جاراق دۇكەنىن توناپ، اسكەري بولىمگە شابۋىلداعان. رەسمي مالىمەت بويىنشا، شابۋىل مەن اتىستان بارلىعى 21 ادام مەرت بولدى. ولاردىڭ 13-ءى - شابۋىل جاسادى دەگەن كۇدىكتىلەر، 8-ءى - بەيبىت تۇرعىن. اقتوبە وبلىستىق ىشكى ىستەر دەپارتامەنتى جەتى كۇدىكتىگە ىزدەۋ جاريالاپ، بۇگىن ونىڭ بىرەۋى ۇستالعانىن حابارلاعان.

قازاقستان بيلىگى شابۋىل جاساعاندار "راديكالدىق ءدىني توپ جاقتاستارى" دەپ مالىمدەگەن.

اباي-اقپارات