بىرلىگى جاراسقان بەيبىت ەلىمىزدە بەسىكتەگى ءسابي شوشىپ وياناتىنداي شەتىن وقيعا بولدى. بۇرىن «تەراكت» دەگەن قورقىنىشتى ءسوزدى تەك الىستان ەستيتىن ەدىك. «بۇل سۇمدىقتىڭ ىرگەسى بىزدەن اۋلاق»، «بۇنداي پالەكەت ءبىزدىڭ ەلگە جۋىمايدى» دەپ ءبىلۋشى ەدىك. الايدا، 2011-2012 جىلدارى اتىراۋدا، اقتوبەدە، تارازدا، الماتىنىڭ بورالداي اۋىلىندا «سودىرلار» اتالىپ جۇرگەن الدەكىمدەر سويقان شىعارىپ، اقىرى تىنىم تاپقانداي  ەدى. ەندى مىنە، اقتوبەدەن تاعى دا مىلتىقتىڭ ءۇنى ەستىلدى.

اقتوبە – ەلىمىزدەگى دونور وبلىستاردىڭ ءبىرى. ماگيسترالدى ءوڭىر. ناعىز توعىز جولدىڭ تورابىندا تۇر. قازاقستاننىڭ باتىسى مەن ورتالىعىنا، سولتۇستىگى مەن شىعىسىنا قاراي جۇك ارقالاپ، جولاۋشى تاسىعان پويىزدىڭ اقتوبەگە سوقپاي كەتەتىنى كەم. اقتوبە جەرىندە مۇنايدان وزگە دە كەنورىندارى از ەمەس. اقتوبەنىڭ وسىنداي الەۋەتىنە قىزىقتى ما، الدە باسقا دا سەبەبى بار ما، 6 ماۋسىم كۇنى قالادا اتىس بولدى. رەسمي دەرەككوزدەرى بۇل جايت تۋرالى «بيلىكتى باسىپ الىپ، مەملەكەتتىك توڭكەرىس جاساماق بولعان كۇشتەر» دەگەن سىڭايدا اقپارات تاراتىپ جاتىر. توتەنشە وقيعاعا شىمكەنتتىك كاسىپكەر توقتار تولەشوۆتىڭ دە قاتىسى بار بولىپ شىقتى.

«تولەشەۆ مىرزانىڭ نارازىلىق اكتسيالارىن ۇيىمداستىرۋ ارقىلى  بيلىكتى كۇشپەن باسىپ الۋعا باعىتتالعان شاراعا قاتىسى بار ەكەندىگى انىقتالۋدا. سونداي-اق ول التەرناتيۆتى بيلىك قۇرۋعا ارەكەتتەنگەن»، - دەپ مالىمدەدى قر ۇقك ءباسپاسوز قىزمەتىنىڭ وكىلى رۋسلان كاراسەۆ باس پروكۋراتۋرادا وتكەن بريفينگتە.

ال، ىشكى ىستەر مينيسترلىگىنىڭ ءباسپاسوز قىزمەتى تاراتقان دەرەكتەرگە جۇگىنسەك، اقتوبە قالاسىنداعى قارۋ-جاراق دۇكەنى مەن اسكەري بولىمشەگە ء«دىني راديكالدار توبى» جاساعان شابۋىلدار مەن ودان كەيىنگى وپەراتسيالار بارىسىندا قازا تاپقاندار سانى 17 ادامعا جەتكەن. ء«دىني راديكالدار توبىنىڭ» بىرقانشاسى بوي تاسالاپ قاشىپ ءجۇر. قازىر مەملەكەتتىك اۋقىمدا ساقتىق شارالارى ەسكەرىلىپ، اقتوبە وبلىسى «قىزىل بەلدەۋدىڭ»، قالعان وبلىستار «سارى بەلدەۋدىڭ» شەگىندە تۇر. وقيعاعا بايلانىستى رەسمي ورىندار، ساياسي ساراپشىلار، ءدىنتانۋشىلار، قمدب پىكىر ءبىلدىرىپ، ەلدى تىنىشتىققا، سابىرعا شاقىرۋدا. بىراق، ءۇش كۇن بولدى قر پرەزيدەنتى، قر اسكەرىنىڭ باس قولباسشىسى ن. نازارباەۆ ءۇنسىز.  لاڭكەستەردىڭ ىسىنەن قازا تاپقانداردىڭ وتباسىنا بارىپ كوڭىل ايتقان «نۇر وتان» پارتياسىنىڭ ءبىرىنشى ورىنباسارى  مۇحتار قۇل-مۇحاممەد قانا ەلباسىنىڭ ەل ىشىندەگى وقيعادان قۇلاعدار ەكەندىگىن ءبىلدىرىپ: «پرەزيدەنت ەشكىمدى مەملەكەت نازارىنان تىس قالدىرماۋدى اتاپ تاپسىردى»، - دەدى. الايدا، ەل ءىشى ەلباسىنىڭ ءوزى كورىنىپ، پارمەندى ءسوز ايتۋىن ەكى ءۇش كۇننەن بەرى ەلەڭدەپ كۇتۋلى. بۇنداي كەزدە مەملەكەت باسشىلارى بۇقارالىق اقپارات قۇرالدارى ارقىلى حالىققا ۇندەۋ جاساپ، قايرات تانىتادى. الدە... قر پرەزيدەنتى وقيعاعا قاتىستى دەرەكتەردى تۇگەل ساراپتاپ، قاۋىپسىزدىك كەڭەسىنىڭ بۇگىنگى وتىرىسىندا ءبىر-اق سويلەمەك بولدى ما ەكەن؟.. سويتەتىن شىعار.

Abai.kz