اقتوبە قالاسىنداعى قۇقىق قورعاۋ جانە ارناۋلى ورگاندارى ۇلتتىق گۆارديانىڭ اسكەري ءبولىمى مەن قارۋ-جاراق دۇكەندەرىنە قارۋلى شابۋىل جاساعان قىلمىسكەرلەردى انىقتاۋ، ىزدەۋ جانە ۇستاۋ شارالارى بويىنشا بىرلەسكەن جەدەل-ىزدەستىرۋ ءىس-قيمىلدارىن جاساپ جاتىر. قالادا  انتيتەررورلىق وپەراتسيالار رەجيمى ارەكەت ەتۋدە.

قالىپتاسقان جاعدايدى ەسكەرە وتىرىپ، سونداي-اق  بولۋى ىقتيمال كۇشتەۋ اكتسيالارىنا الدىن الا ارەكەت جاساۋ ماقساتىندا قازاقستان رەسپۋبليكاسى انتيتەررور ورتالىعىنىڭ باسشىسى – ۇقك توراعاسى گەنەرال-لەيتەنانت ۆ.ز.جۇماقانوۆ قر پرەزيدەنتىنىڭ 2013 جىلعى 9 تامىزداعى № 611  جارلىعىنا سايكەس 6 ماۋسىمدا  تەرروريستىك قاۋىپتىلىكتىڭ  «سارى» (بىرقالىپتى) دەڭگەيىن جاريالادى. اتالعان دەڭگەي  ەلىمىزدىڭ بارلىق اۋماعى بويىنشا 40 تاۋلىككە ەنگىزىلدى.

 «سارى» دەڭگەي كۇشتىك قۇرىلىمدارمەن جانە مەملەكەتتىك ورگاندارمەن ۇيىمداستىرۋشىلىق، اكىمشىلىك جانە جەدەل ءىس-شارالار كەشەنىن وتكىزۋدى بولجايدى، ونىڭ ىشىندە:

 - بولۋى ىقتيمال تەرروريستىك جانە ەكسترەميستىك كۇشتەۋ اكتسيالارى تۋرالى اقپاراتتاردى جيناۋ، باعالاۋ جانە تەكسەرۋ;

- تەروررعا قاتىستى باسقا دا  وسال وبەكتىلەردى جانە تۇرعىندار جاپپاي جينالاتىن ورىنداردى تەكسەرۋ;

-  ارنايى تەحنيكالىق قۇرالداردى پايدالانا وتىرىپ، كولىكتەردى قاراپ-تەكسەرۋ ءىس-شارالارىن كۇشەيتۋ;

- كوشەلەردە، الاڭداردا، ستاديونداردا جانە تۇرعىندار جاپپاي جينالاتىن باسقا دا ورىنداردا، ماگيسترالدىق تەمىر جول جۇيەلەرىندە جانە وزگە دە كولىك ينفراقۇرىلىمىنىڭ وبەكتىلەرىندە كۇشەيتىلگەن پاترۋلدەردى قويۋ;

- بولۋى ىقتيمال تەرروريستىك قاۋىپ-قاتەرلەر مەن قاۋىپ قاتەرلەر بولا قالعان قاجەتتى ارەكەت تۋرالى تۇرعىنداردى الدىن الا اقپاراتتاندىرۋ.

ۇلتتىق قاۋىپسىزدىك كوميتەتى ازاماتتارعا سابىرلىلىق ساقتاپ،  مەملەكەتتىك جانە قۇقىق قورعاۋ ورگاندارىنىڭ ارەكەتىنە تۇسىنىستىكپەن قاراپ، سونداي-اق، ولارعا قاجەتتى كومەك كورسەتۋدى ءوتىندى.

قاۋىپسىزدىكتىڭ ءبىرىنشى كەزەكتەگى شارالارى رەتىندە  ساقتىق تانىتىپ، يەسىز جاتقان، اسىرەسە سىمدار مەن تەحنيكالىق قۇرىلعىلارى بار نارسەلەرگە (سومكەلەر، قوراپتار، بۋمالار، قاپتار، شاباداندار مەن ت.ب.), نازار اۋدارۋدى تالاپ ەتەدى، بۇنداي جاعدايدا وعاش كورىنگەن زاتتارعا تايانباي، قۇقىق قورعاۋ ورگاندارىنا تەز ارادا حابارلاۋ قاجەت. 

سونىمەن قوسا، قوعامدىق ورىندار مەن كولىكتەردە كۇدىكتى ادامدارعا نازار اۋدارىپ، ولاردان بەلگىسىز زاتتار مەن سالەمدەمەلەردى ساقتاۋعا، بەرۋگە جانە تاسىمالداۋعا الماۋ كەرەك.

قر انتيتەررور ورتالىعى مەن ۇلتتىق قاۋىپسىزدىك كوميتەتى جەكە ادامدى، قوعامدى جانە مەملەكەتتى تەرروريستىك جانە ەكسترەميستىك قاۋىپ-قاتەرلەردەن قورعاۋ بويىنشا قاجەتتى شارالاردى قولدانۋدا.

ۇقك ءباسپاسوز قىزمەتى ۇلتتىق قاۋىپسىزدىك ورگاندارى احۋالدىڭ وزگەرۋى مەن جۇرگىزگەن ءىس-شارالار ناتيجەسى تۋرالى حابارلاپ وتىرادى. 

قازاقستان رەسپۋبليكاسىنىڭ ۇقك ءباسپاسوز قىزمەتى

اباي-اقپارات