(ساتيرا)

جاس شەنەۋنىك ەمىزدىگىن تىستەلەپ،

بولمەسىندە ءتاتتى-ءتاتتى ءتۇس كورەد:

ءتۇرى ازيات روبوتتار جاساپتى،

ميى ۇشەۋ، جۇرەگى دە ءۇش بولەك.

جاي جاتا ما جال بىتسە ەگەر پەندەگە،

قولبالاسىن قويدى الەمدىك كورمەگە،

بولماسا دا جولداماسى ارنايى،

پارا بەرىپ جايعاستى كەپ تورگە دە.

“قۇپياسى ءۇش ايىرلى تىلىندە” -

دەپ ءبوسىپ تۇر، قىمسىنۋ جوق تۇرىندە.

ايتىپ-ايتپاي ءتۇرى ازيات روبوتتىڭ،

بولەك-بولەك مىنەز - تەك بار ۇنىندە.

كۇلكىگە جۇرت قارىق بولدى جينالعان،

وتىرىگىنە ءوزى ەرەك يلانعان،

ورتا ميى ءبىرىنشى بوپ ءسوز الىپ،

دەدى: ء“بارىڭ تارالعانسىڭ يۆاننان”.

سول جاق ميى جۇيرىك سانعا، تەڭدەۋگە،

وڭ جاق ميى شال سياقتى شەر كەۋدە،

باسىپ Aققۋ، شورتان، شايان جىرىنا،

بارىن سالدى ءوزارا دەس بەرمەۋگە.

ءۇش ءتىل - ءۇش مي: قازاق، ورىس، اعىلشىن،

ءبىر-بىرىنە قالاي عانا باعىنسىن؟!

تاپقىرلىققا القاۋ ەمەس، ىشىنەن،

نالەت ايتتى جيىلعان جۇرت، قاۋىم شىن.

وڭ جاق ميى قايتپاق اتا قونىسقا،

ورتا ميى اتتانباقشى ورىسقا،

ورتاسىندا قاسارىستى سول جاق مي،

ەكەۋىنىڭ ەشبىرىنە بولىسپاي...

ەسبول ۇسەنۇلى

Abai.kz