1983 جىلى كازگۋ-ءدىڭ ستۋدەنتتەر وتريادىندا بولعانبىز. جۋرناليستەر وتريادى الماتى قالاسىندا ءال-فارابي مەن گاگارين كوشەلەرىنىڭ قيىلىسىندا جۇمىس ىستەپ جاتتىق. سەيىتحان زەبەرحانۇلى ەكەۋمىزگە جولعا جاقىن جەردەگى قۇدىقتى تەرەڭدەتۋدى تاپسىرعان. قازىپ جاتىرمىز. ءبىر ۋاقىتتا سەيىتحان:

- سەرىك، مىنانى قارا، - دەيدى. قۇدىقتىڭ جاقتاۋىنان نايزانىڭ ۇشى ءتارىزدى بىردەڭە شىعىپ تۇر. جۇلىپ الدىم. كونە نايزانىڭ ۇشى. قولادان قۇيىلعان ءتارىزدى. مىنا سۋرەتتەگىدەي. "بۇل كەرەمەت دۇنيە بولدى! بالكىم، بۇل جەردە قالا بولعان شىعار؟ مىنانى مۋزەيگە تاپسىرايىن" دەدىم دە، نايزانىڭ ۇشىن قالتاما سالىپ قويدىم.

"انە تاپسىرامىن، مىنە" دەپ جۇرگەندە ۋاقىت وتە بەردى. ءبىر كۇنى كونە نايزانىڭ ۇشى شابادانىمنان جوعالىپ كەتتى. قولدى بولعانى انىق. كىم العانىن بىلمەيمىن. ءىشىمنىڭ ۋداي اشىعانى-اي! ماسەلە ونىڭ باعاسىندا ەمەس، قۇنىندا ەدى. وتە قۇندى جادىگەر ەكەنىن جۇرەگىم سەزەتىن. "قاپ!" دەپ قالا بەردىم. شىنىندا دا سول جەردە كونە قالانىڭ ورنى بار شىعار؟

ارحەولوگيامەن "اۋىراتىن" ازاماتتارعا ايتارىم، ەگەر بىرەۋ-مىرەۋ سول جەردى كورەيىن دەيتىن بولسا، گاگارين كوشەسىنىڭ بويى، ءال-فارابيدەن ەكى ءجۇز مەتردەي تومەن. جولعا تاياۋ. تومەن ءتۇسىپ كەلە جاتقاندا - وڭ قاپتالدا. قازىر ول ماڭايعا ۇلكەن ۇيلەر ءتۇسىپ كەتكەن. بىراق، جولدىڭ بويى اشىق قوي. كىم بىلەدى...

سەرىك جانبولات

Facebook-تەگى پاراقشاسىنان