بۇل تۋرالى بۇعان دەيىن ەشبىر ۇمىتكەردى قولداماي كەلگەن پارتيالىق سەزگە قاتىساتىن ءبىر توپ دەلەگاتتىڭ ترامپقا داۋىس بەرەتىندەرى تۋرالى مالىمدەگەن سوڭ بەلگىلى بولدى.

وسىلايشا ترامپ قولداۋلارىنا يە بولعان دەلەگاتتار سانى پارتيالىق سەزدە ءوزىن ۇسىنۋعا قاجەت 1237 ادامنان استى.

ترامپتىڭ رەسپۋبليكالىقتار اتىنان ۇمىتكەر اتاناتىنى العاشقى سايلاۋلار كەزىندەگى ميللياردەردىڭ بىرقاتار شتاتتاعى جەڭىسىنەن سوڭ، ونىڭ قارسىلاستارى دودادان باس تارتقان مامىر ايىندا اق كۇمانسىز بولعان ەدى.

سوڭعى ساۋالنامالار دونالد ترامپتىڭ سايلاۋشىلار اراسىنداعى تانىمالدىعىنىڭ ءوسىپ كەلە جاتقانىن كورسەتەدى جانە ونىڭ رەيتينگى ءوزىنىڭ ەڭ ىقتيمال قارسىلاسى – دەموكرات حيللاري كلينتونعا جاقىنداپ قالدى.

رەسپۋبليكالىق پارتيانىڭ سەزى كليۆلەندتە شىلدەنىڭ اياعىندا وتەدى. اقش پرەزيدەنتىنىڭ سايلاۋى 8 قاراشاعا بەلگىلەنگەن.