قوعام قايراتكەرى، ساياساتتانۋشى دوس كوشىم مەكتەپتەرگە ۇشتىلدىلىكتى ەنگىزۋ رەفورماسىن ورىس ءتىلىن ساقتاپ قالۋ ماقساتىندا جاسالىپ وتىرعان تەحنولوگيا ەكەنىن ايتتى دەپ حابارلايدى NUR.KZ ءتىلشىسى.

قازاقستان مەكتەپتەرىنە ۇشتىلدىلىكتى ەنگىزۋ ماسەلەسىنە ارنالعان IQ Studio ساراپتامالىق جيىنى بولىپ ءوتتى. وعان اكادەميك اسقار جۇمادىلداەۆ، جۋرناليست ءامىرجان قوسانوۆ، قوعام قايراتكەرى دوس كوشىم شاقىرىلىپ، ەنگىزىلگەلى وتىرعان رەفورماعا قاتىستى پىكىرلەر مەن ويلار ورتاعا سالىندى.

اتالعان ۇلت زيالىلارى بۇل رەفورمانىڭ تولىقتاي قاراستىرىلماعان جانە ءپىسىپ جەتىلمەگەنىن ءبىراۋىزدان ايتتى. بۇل تۇستا ولار ءۇش تۇعىرلى تىلگە ەمەس، ءۇش ءتىلدى باستاۋىش سىنىپتان باستاپ وقىتۋ ماسەلەسىنە نارازى ەكەندىكتەرىن اتاپ ايتتى.

"بۇل سوڭعى ۋاقىتتاردا قازاق تىلدىلەردىڭ كوبەيىپ كەلە جاتقانىنا ورىس ءتىلىن سان-ءتۇرلى ايلا-تاسىلدەرمەن ساقتاپ قالۋ ءۇشىن جاسالعان تەحنولوگيا دەپ ويلايمىن", - دەدى دوس كوشىم.

دوس كوشىم جيىن مودەراتورى راسۋل جۇمالىنىڭ:

"بۇعان دەيىن ايتىلىپ كەلگەن ماسەلە - ەكىتىلدىلىك ساياسات. سول ەكىتىلدىلىك ساياساتى ءوزىنىڭ قورىتىندىسىنا كەلدى مە، ەكىنشىدەن وسى ەكىتىلدىلىك ساياساتتى بىتىرمەي جاتىپ، ۇشتىلدىلىك تۇعىرعا كوشۋ قانشالىقتى قيسىندى؟", - دەگەن سۇراعىنا:

"بۇل شوپان دا، بازاردا وتىرعان قازاقتار دا تالقىلاپ جاتقان ماسەلە. سوندىقتان ءبىز مۇنى جۇيە دەپ اتايىق. بۇل جەردە ءۇش ناقتى ماسەلە بار. ءبىرىنشىسى، بالانىڭ باسىن اتالا قىلىپ، ءتورت-بەس جاستان قازاقشا، ورىسشا، اعىلشىنشا ۇيرەتۋ. ەكىنشىدەن جوعارعى سىنىپتاردا نەگىزگى پاندەر، نەگىزگى فيزيكا، حيميا، ماتەماتيكانىڭ اعىلشىن تىلىندە ءوتۋى. بۇل ءبىزدىڭ قابىلداي الماي جاتقان ەكىنشى ماسەلەمىز. ءۇشىنشى ماسەلە بار، بۇل - جالپى تاريحتى ورىس تىلىندە بەرۋ", - دەيدى ول.

"جيىرما جەتى جىل بويى ءورىستىلدى بالالارعا قازاق ءتىلىن وقىتىپ، "سالەمەتسىز بە" دەگەن ءسوزدى بىلمەيتىن بالالاردى تاربيەلەپ شىعارعان مينيسترلىك، قالايشا ءۇش تىلدە وقىتادى. بۇل مينيسترلىككە قالاي سەنۋگە بولادى. نەلىكتەن مەكتەپتە تاريح پانىنەن ساباقتى ورىس تىلىندە بەرۋىمىز كەرەك، وسىعان ءۋاج بار ما؟ نەگىزدەمە بار ما؟ دۇنيەجۇزى مەكتەپتەرى ورىسشا وقىتىپ جاتىر دەسە تۇسىنەر ەم", - دەدى ول.

دوس كوشىمنىڭ ايتۋىنشا، مۇنداي شەشىم شىعارۋعا ءبىلىم مينيسترلىگىنىڭ ەش نەگىزدەمەسى بولماعان.

Abai.kz