استانا قالاسىندا قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجىۇلى جاڭادان قۇرىلعان ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆپەن كەزدەستى، - دەپ حابارلايدى قمدب ءباسپاسوز قىزمەتى .

كەزدەسۋگە، سونىمەن قاتار قر مادەنيەت جانە سپورت ۆيتسە ءمينيسترى مارات ءازىلحانوۆ، ءدىن ىستەرى كوميتەتىنىڭ توراعاسى عالىم شويكين، قمدب ءدىني ىستەر ءبولىمىنىڭ باسشىسى كامالجان تۇردىباەۆ جانە قمدب ءباسپاسوز ءبولىمىنىڭ باسشىسى اعابەك قوناربايۇلى قاتىستى.

رەسمي كەزدەسۋدە جاستارعا دۇرىس ءدىني اقپارات جەتكىزۋ، ءدىني وقىتۋ-اعارتۋ جۇيەسىن جەتىلدىرۋ، يمامداردىڭ ءبىلىمى مەن تاجىريبەسىن شىڭداۋ، ەلىمىزدە قالىپتاسقان دىنارالىق كەلىسىمدى ودان ءارى نىعايتۋ، حالىققا ءدىننىڭ ادامگەرشىلىك، جالپىعا بىردەي مەيىرباندىق قۇندىلىقتارىن ناسيحاتتاۋ، ت.ب. ماسەلەلەر جان-جاقتى تالقىلاندى.

مينيستر نۇرلان بايۇزاقۇلى قازاقستان مۇسىلماندارى ءدىني باسقارماسىنىڭ ەلىمىزدەگى دىنارالىق كەلىسىمدى نىعايتۋعا قوسىپ جاتقان ۇلەسى ءۇشىن العىسىن ءبىلدىرىپ، وسى باعىتتا ءدىن قىزمەتكەرلەرى تاراپىنان ناتيجەلى جۇمىس جۇرگىزىلە بەرەتىنىنە سەنىم ءبىلدىردى.