قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن "وي-سانا" بايقاۋى وتەدى، - دەپ حابارلايدى اباي-اقپارات مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.

بۇل شارانى «ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى» رمكق «قازاقستان  رەسپۋبليكاسىندا تىلدەردى دامىتۋ مەن قولدانۋدىڭ  2011-2020 جىلدارعا ارنالعان مەملەكەتتىك باعدارلاماسى» اياسىندا  ۇيىمداستىرىپ وتىر. ورىس ءتىلى بىلگىرلەرىنىڭ VIII رەسپۋبليكالىق «وي-سانا» بايقاۋى استانا قالاسى، اباي داڭعىلىنىڭ بويىندا ورنالاسقان «ىسكەر» بيزنەس ورتالىعىندا 23 قىركۇيەك كۇنى وتەدى دەپ جوسپارلانعان.  

بايقاۋدىڭ ماقساتى – قازاق تىلىندە وقيتىن جاستاردىڭ اراسىندا ورىس ءتىلىن وقۋعا دەگەن قۇلشىنىسىن ارتتىرۋ، ريتوريكالىق داعدىلارىن دامىتۋ، سويلەۋ مادەنيەتىنىڭ دەڭگەيىن كوتەرۋ، ورىس ءتىلىن ەركىن مەڭگەرگەن دارىندى جاستاردى ناسيحاتتاۋ جانە ولارعا قولداۋ كورسەتۋ.

بايقاۋعا وبلىستىق جانە قالالىق ىرىكتەۋ كەزەڭدەرىنىڭ جەڭىمپازدارى بولعان، 18-22 جاس ارالىعىنداعى جوعارعى وقۋ ورىندارىنىڭ ستۋدەنتتەرى، جالپى ءبىلىم بەرۋ مەكەمەلەرىندە، ورتا جانە ورتا ارناۋلى وقۋ ورىندارىندا قازاق تىلىندە ءبىلىم الاتىن جاستار قاتىسادى.

بايقاۋ شارتى:

-  ءبىرىنشى نوميناتسيا بويىنشا جاڭىلتپاشتاردى مۇدىرمەستەن وقۋ ءارى انىق ايتۋ;        

- ەكىنشى نوميناتسيا بويىنشا بەرىلگەن تاقىرىپقا ورىس تىلىندە ەسسە جازۋ (جازباشا), ديالوگ قۇراستىرۋ (اۋىزشا);  

- ءۇشىنشى «شابىت جۇلدىزى» نوميناتسياسى بويىنشا: ورىستىڭ حالىق ءانىن (زاماناۋي ءانى) ورىنداۋ نەمەسە  تەاترلاندىرىلعان ينتەرپرەتاتسياداعى  كوركەم شىعارمادان ءۇزىندى قويۋ (پەسا، ەرتەگى جانە ت.ب.).

قازىلار القاسىنىڭ شەشىمىمەن جەڭىمپازدار انىقتالىپ،  ديپلوم، العىسحات جانە باعالى سىيلىقتارمەن ماراپاتتالادى.

بايقاۋ مارەسى جەڭىمپازداردى سالتاناتتى ماراپاتتاۋ راسىمىمەن اياقتالادى.

بايلانىس تەلەفوندارى: 8/7172/ 40-83-97, 87023768400

اباي-اقپارات