ەل تاۋەلسىزدىگىنىڭ 25 جىلدىعىنا وراي، سوزاق اۋدانى شولاققورعان اۋىلىندا 280 ورىندىق «ايشۋاق» بوبەكجاي-بالاباقشاسى اشىلىپ، ەل يگىلىگىنە پايدالانۋعا بەرىلدى.

اشىلۋ سالتاناتىنا وبلىس اكىمىنىڭ ورىنباسارى ج.بوكەنباەۆ پەن قازترانسويل» اكتسيونەرلىك قوعامىنىڭ باس ديرەكتورى د.دوسانوۆ قاتىسىپ، تۇرعىنداردىڭ قۋانىشىمەن ءبولىستى.

«قازترانسويل» اكتسيونەرلىك قوعامىنىڭ دەمەۋشىلىك قارجىسى ەسەبىنەن سالىنعان بوبەكجايدا بالالارعا بارلىق جاعداي قاراستىرىلعان. مۇندا بۇگىندە جالپى سانى 83 قىزمەتكەر جۇمىسپەن قامتىلىپ وتىر.  

قۇرىلىس الاڭىنىڭ جالپى اۋماعى 3281 شارشى مەتردى قۇراسا، ونىڭ ىشىندە 1822 شارشى مەترى بالاباقشا عيماراتى، ال 1459 شارشى مەترى كوركەيتۋ-كوگالداندىرۋ الاڭى بولىپ وتىر.

ەلباسىنىڭ جىل سايىنعى قازاقستان حالقىنا جولداۋى مەن ساليحالى ساياساتىن جۇزەگە اسىرۋ ءۇشىن وبلىس پەن اۋدان،قالا اكىمدەرىنىڭ قولداۋىمەن ءبىلىم بەرۋ جۇيەسىندەگى وڭ وزگەرىستەرگە ەرەكشە ءمان بەرىلىپ كەلەدى.

جالپى سوزاق اۋدانىندا 36 مەكتەپكە دەيىنگى ءبىلىم بەرۋ ۇيىمى بار، ونىڭ ون ءبىر شاعىن  ورتالىق، سەگىز جەكە مەنشىك نىساندا قىزمەت كورسەتەدى. وسى جىلدىڭ وزىندە ءتورت بالاباقشا اشىلسا، جىل سوڭىنا دەيىن ءۇش بالاباقشا اشىلادى دەپ كۇتىلۋدە. وسىلايشا، بالاباقشامەن قامتىلعاندار سانى بيىل 3530-گە جەتىپ، 88,8 پايىزدى قۇرادى.

وقو اكىمىنىڭ ءباسپاسوز قىزمەتى