ۆيدەودا: اقمولا وبلىسى، قورعالجىن اۋدانى، وركەندەۋ اۋىلىنىڭ تۇرعىندارىنىڭ شۋماحەر تۋرالى ايتقاندارى

جەر رەفورماسى جونىندەگى كوميسسيا جۇمىسى اياقتالدى. الايدا، قازاق جەرىن اتا-باباسىنان قالعان مۇراداي قالاۋىنشا بيلەپ-توستەگەن شەتەلدىك شۋماحەردىڭ شۋى تولاستار ەمەس. گەرمانيا ازاماتى – شۋماحەردىڭ اقمولا وبلىسى اۋماعىنان 34 مىڭ گەكتار جەردى يەمدەنىپ قانا قويماي، سول ماڭداعى اۋىل قازاعىن «جىلقى ۇرلايدى» دەپ دالەل-ايعاقسىز ۇرى اتاندىرعانى قاي قازاقتى بولماسىن اشىندىراتىنى حاق. مىنە، ەندى ايدىڭ-كۇننىڭ امانىندا ناقاقتان «ۇرى» اتانىپ شىعا كەلگەن اقمولا وبلىسى، قورعالجىن اۋدانى، وركەندەۋ اۋىلىنىڭ تۇرعىندارى وزدەرىن شۋماحەرگە باسىندىرىپ قويا المايتىندارىن ايتىپ، باس پروكۋراتۋراعا ارىز جازىپتى (سۋرەتتە).

سۋرەتتە: 47 ادام قول قويعان وركەنداۋ اۋىلى تۇرعىندارىنىڭ نەمىس كاسىپكەرى روبەرت شۋماحەردىڭ ۇستىنەن باس پروكۋراتۋراعا جازعان ارىزدارى

«شۋماحەر اتا-بابامىزدىڭ سۇيەگىن قورلادى»

سۋرەتتە: وركەندەۋ اۋىلىنىڭ تۇرعىندارى

شۋماحەر قازاق جەرىنىڭ ءبىر پۇشپاعى - 34 مىڭ گەكتار جەرگە قوجالىق ەتىپ قانا قويماي، جەردىڭ اينالاسىنان ۇزىندىعى ءبىر مەتر، تەرەڭدىگى ءبىر جارىم مەتر ۇرا قازىپ تاستاعان.

«ۇرا قازۋ كەزىندە تەحنيكا مولالاردى كۇرەپ كەتتى. ادام سۇيەكتەرى تابىلدى. ول ءبىزدىڭ اتا-بابامىزدىڭ سۇيەگى. «ۇرا قازۋدى توقتاتىڭدار!» دەگەن ءبىزدىڭ سوزىمىزگە ەشكىم قۇلاق اسپادى. روبەرت شۋماحەر وسىنداي ادامدىققا شەت ارەكەتىمەن اتا-بابامىزدى قورلادى» دەپ زارلاپ وتىر وركەندەۋ اۋىلىنىڭ تۇرعىندارى. بۇل از دەسەڭىز، جۋىقتا شۋماحەردىڭ وكىلدەرى كەلىپ، شۋ بولعان ماسەلەنى جۋرناليستتەرگە تۇسىندىرمەككە تالپىنىپ، شۋماحەرگە شاڭ جۋىتپاي كەتكەن ەدى. سوندا زاڭگەر سترۋچكوۆ: «ول جەرگە جىلقى وسىرىلەدى. جەرگىلىكتى تۇرعىندارعا مال وسىرگەننەن گورى «اق قۇلىننىڭ» مالىن ۇرلاۋ جەڭىل ەدى. مال ۇرلىعىن بولدىرماۋ ءۇشىن ور قازىلعان ەدى» دەگەن بولاتىن. ال، اۋىل اقساقالدارى  سترۋچكوۆتىڭ ايتقاندارى تاپ-تازا جالا، ۇرلىق تۋرالى جەرگىلىك ءىىب دا بىردە ءبىر ارىز جوق، ءىس قوزعالىپ كورمەگەنىن ايتادى.

شەتەلدىكتىڭ قازاقتىڭ جەرىن الىپ، اتا-باباسىنىڭ سۇيەگىن كۇرەپ، قورلاپ، ونىمەن قويماي سول ماڭداعى قازاقتى ۇرى اتاندىرعانىن جەرگىلىكتى بيلىك نەگە كورمەي وتىر؟ نەگە ارەكەت ەتپەيدى؟

قورعالجىن اۋدانىنىڭ اكىمى  پرەزيدەنت جارلىعىنا پىسقىرماي ما؟

جەر رەفورماسى جونىندەگى كوميسسيا جۇمىسى ءجۇرىپ جاتقان تۇستا باسپساوزدە كوتەرىلگەن شۋماحەردىڭ ءىسى جۇرت نازارىنا ءتۇسىپ، قىزۋ تالقىلانعان. سودان كەيىن «جالماۋىزعا دا جان كەرەك» دەگەندەي، شۋماحەردىڭ وكىلدەرى زاڭگەر سترۋچكوۆ، ەسماعامبەتوۆ جانە قورعالجىن اۋدانىنىڭ اكىمى قايىر رىسكەلدينوۆ شۋماحەردىڭ يەلىگىندەگى جەر تىركەلگەن «اق-قۇلىن» جشس-نىڭ ديرەكتورى شايحان قاسىمباەۆقا قىسىم جاساپ، 49 جىلعا بەرىلگەن جەردى 10 جىلعا، 20 جىلعا بەرىلگەن جەردى دە 10 جىلعا، ياعني، جالعا الۋ مەرزىمىن دەرەۋ قىسقارتىپ، كەلىسىمشارتتى قايتا قاراۋ جونىندە ءوتىنىش جازدىرعان. بۇل ءوتىنىش ءبىر كۇننىڭ ىشىندە قاناعاتتاندىرىلىپ، بارلىق قۇجات راسىمدەۋ ماسەلەلەرى ءبىر-اق كۇننىڭ ىشىندە شەشىلگەن. استىن سىزىپ ايتاتىن نارسە مىناۋ: قورعالجىن اۋدانى اكىمى مەن نەمىس كاسىپكەرىنىڭ وكىلدەرى بۇل ءىستى قر پرەزيدەنتىنىڭ «جەر كودەكسىنىڭ كەيبىر باپتارىنا 2016 جىلدىڭ 31 جەلتوقسانىنا دەيىن موراتوري جاريالاۋ» تۋرالى 06.05.2016  قول قويىلعان №284  جارلىعى جاريالانعاننان كەيىن ىسكە اسىرعان. پرەزيدەنت جارلىعىن بۇزۋ – زاڭعا باعىنباۋ! جارلىققا پىسقىرماۋ – پرەزيدەنتكە ونىڭ جارلىقتارىنا مويىنۇسىنباۋ! وسىلايشا، قورعالجىن اۋدانى اكىمى جارلىققا پىسقىرماي، ءوزىن قازاق جەرىنىڭ قوجايىنى سەزىنىپ، شۋماحەردىڭ شاشباۋىن كوتەرىپ ءجۇر.

قىسىم جاسالعان سوڭ، امالسىز پرەزيدەنت ن.نازارباەۆتىڭ جارلىعىنا قايشى، زاڭسىز ارەكەتكە بارعان «اق-قۇلىن» جشس-نىڭ ديرەكتورى شايحان قاسىمباەۆ باسىن اراشالاۋ ءۇشىن باس پروكۋراتۋراعا ارىز جازعان. وندا قاسىمباەۆ بارلىق جاعدايدى جازا كەلىپ، باس پروكۋراتۋرادان اقمولا وبلىسى، قورعالجىن اۋدانى اكىمى قايىر رىسكەلدينوۆ پەن شۋماحەردىڭ وكىلدەرى سترۋچكوۆ، ەسماعامبەتوۆتەردىڭ ارەكەتتەرىنىڭ زاڭدىلىعىن تەكسەرىپ، جاۋاپقا تارتۋدى سۇرايدى (سۋرەتتە).

"اق-قۇلىن" جشس-نىڭ ديرەكتورى شايحان قاسىمباەۆتىڭ اقمولا وبلىسى، قورعالجىن اۋدانىنىڭ اكىمى قايىر رىسكەلدينوۆ جانە روبەرت شۋماحەردىڭ وكىلدەرى سترۋچكوۆ، ەسماعامبەتوۆتاردىڭ ۇستىنەن باس پروكۋراتۋراعا جازعان ارىزى

اكىم ارالاسقان ءىستىڭ مۇنداي اسقان شاپشاڭدىقپەن بىتكەنىنە تاڭ قالعان وركەندەۋ اۋىلىنىڭ تۇرعىندارى «جەر تۋرالى كەلىسىمگە كىشكەنە عانا وزگەرىس ەنگىزۋگە جەرگىلىكتى جۇرت ون جىلداپ جۇرەدى»، ال شۋماحەرگە كەلگەندە ءبىر-اق كۇن جەتەدى ەكەن دەيدى.

مىنە، وسىنداي ورەسكەل زاڭسىزدىقتار مەن اتا-بابانى، ونىڭ ۇرپاعىنا مۇرا ەتىپ قالدىرعان جەرىن قورلاعانداردىڭ ارەكەتىنە تەكسەرىس جاساپ، توقتام سالۋدى سۇراعان ورلەۋ اۋىلىنىڭ 47 تۇرعىندارى قول قويىپ، باس پروكۋراتۋراعا ارنايى ارىز جازدى.

ءبىز بۇل ماسەلەنى نازارداي ۇستايتىن بولامىز.

نۇرا ماتاي

Abai.kz