«قازاقستان»  ۇلتتىق ارناسى قازاقستان مەن پولشا قۇراما كوماندالارىنىڭ  الەم چەمپيوناتى الدىنداعى ىرىكتەۋ ويىنىنان كەزەكتى ماچتىن تىكەلەي ەفيردە ترانسلياتسيالادى. ءبىزدىڭ ىعىرىمىزدى شىعارعان-تەلەكوممەنتاتورلار! بۇل نەتكەن سورلىلىق! ءاپ دەگەننەن-اق پولشا قۇراماسىن ماقتاپ، وتكەن-كەتكەن تاريحىن ايتىپ، اسىرەسە پولياك كاپيتانى روبەرت لەۆاندوۆسكيدى اۋزدارىنان سۋى قۇرىپ جالىقپاي  ماقتاپ، مىجىپ وتىرىپ الدى. 

ەكى ءسوزدىڭ بىرى – لەۆاندوسكي. ەكى ءسوزدىڭ ءبىرى پولياكتار ءبارى ەۋرو كوماندالاردا وينايتىن پەرىلەر.  كومەنتاتورلاردى تىڭداپ وتىرىپ، «وسىلار پولشا قازاقتارى ەمەس پە ەكەن؟» دەپ ويلايسىڭ. نەگە ەكى كوماندانىڭ ستراتەگياسى مەن تاكتيكاسىن، ويىنداعى ورنەگىن تالداپ، تالعاپ وتىرمايدى؟ كومەنتاتورلار ەرتەرەك ويىن بىتسە، وسى تەڭ ويىندى ساقتاپ قالساق  دەپ قازاقستاندى بەيشارا، سورلى دەگەندى  اڭعارتتى.   

ءبىزدىڭ قازاق كوممەنتاتورلارى فۋتبول تەحنولوگياسىن جەتىك بىلمەيدى. فۋتبولشىلاردىڭ شەبەرلىك ەرەكشەلىكتەرىنەن حابارسىز. بار بىلەتىنى –  فۋتبولشىلاردىڭ وتكەن-كەتكەنى، اۋىسقانى-تۇيىسكەنى، وسەك-اياڭى، تۇككە قاجەتسىز ءومىرتاريحى. ال كورەرمەنگە كەرەگى بۇگىنگى فۋتبولدىڭ ناقتى بولمىسى: ويىن ورنەگى، ءستيلى،  الاڭداعى شەبەرلىك سىرلارى مەن قىرلارى، كوماندالاردىڭ وزىندىك تاكتيكالىق ەرەكشەلىكتەرى! مۇنىڭ ءبارىن ءبىزدىڭ  جورنالشىلارىمىز بەتىن قالقيدى دا، تەرەڭىنە بويلاي المايدى! ءسوز ساپتاۋلارىنان قوي ۇركەدى.  الاڭداعى دوپ تەۋىپ، سوققى جاساعانداردى «شەشىم قابىلدادى»، «ۇيىمداستىردى» دەگەندە، ولار ءۇشىن ۇيالىپ،  دىبىستى باسا قوياسىڭ. نەگە ەكەنى بەلگىسىز، قانشا جەردەن كوممەنتاتورلارعا سىن ايتىلعانىمەن بىردە-بىرەۋى جوندەيىن، دۇرىسىن دۇرىس دەمەيدى-اۋ سابازدارىڭ! 

ال الگى  اۋزىنىڭ  سۋى قۇرىپ، تابىنا ماقتاعان لەۆادوۆسكي نە ىستەدى دەيسىز عوي.  ول  قازاقتاردى مەنسىنبەي، قازاقستان قۇراماسىنىڭ قورعاۋشىسى ەلدوس احمەتوۆتىڭ  ۇرىپ ەرنىن جارىپ، مۇرنىن قاناتتى، كاپيتانىمىز  باۋىرجان يسلامحاندى موينىنان قىسىپ قىلقىندىردى. ەندى ءبىر پولياك فۋتبولشىسى جەردە قۇلاپ جاتقان باۋىرجاندى اياعىمەن نۇقىپ كورگەنسىزدىك كورسەتتى. بىراق وعان تورەشى ەسكەرتۋدەن باسقا ەشتەڭە دەمەدى. مىنە، ۇلتتىق ارنا كوممەنتاتورلاردىڭ پىر تۇتقان جامپوزدارىنىڭ قىلىعى! نامىس قايدا، جىگىتتەر؟ 

قايرات تاڭاتاروۆ، قوستاناي قالاسى 

Abai.kz