استانا قالاسىنداعى ۇلتتىق اكادەميالىق كىتاپحانادا Termincom.kz cايتىنىڭ تۇساۋكەسەرى ءوتتى، - دەپ حابارلايدى اباي-اقپارات مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.

"قازاقستان رەسپۋبليكاسى پرەزيدەنتىنىڭ 2011 جىلعى 29 ماۋسىمداعى № 110 جارلىعىمەن بەكىتىلگەن قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىن جۇزەگە اسىرۋ ماقساتىندا عالامتور جەلىسىنە ەنگەن Termincom.kz سايتى عىلىم، ءبىلىم، تەحنيكا مەن ەكونوميكا، قوعامدىق–الەۋمەتتىك ومىردەگى تەرمين سوزدەردىڭ بىرىڭعاي رەسپۋبليكالىق تەرمينولوگيالىق ەلەكتروندىق بازاسى بولىپ سانالادى" دەلىنگەن حابارلامادا.

سونداي-اق، سايت قازاق تەرمينولوگياسىن جۇيەلەۋدىڭ جاڭا تالاپتارىن جۇزەگە اسىرۋدى كوزدەيدى، تەرمينولوگيالىق لەكسيكانى بىرىزدەندەرۋ، تەرمينولوگيالىق قوردى تولىقتىرۋ، تەرميندەردى جانە اتاۋلاردى قازاق ءتىلىنىڭ نورمالارىنا سايكەس رەتتەۋ، تەرمينولوگيالىق اتاۋلاردى قولدانۋ تيىمدىلىگىن ارتتىرۋ ماقساتىندا بۇقارا قاۋىمعا ارنالعان اقپاراتتىق قۇرال.

سايتقا كىرۋشىلەر بەكىتىلگەن تەرميندەر مەن قولدانىستاعى تەرميندەرمەن تانىسىپ، ونى قىزمەتىنە قاتىستى قولدانا الادى، ۇتىمدى ەنگىزىلگەن تەرميندەردى سارالاپ، جاڭا تەرميندەردى ساراپتاۋعا مۇمكىندىك تۋادى.سالالىق تەرميندەردى قالىپتاستىرۋ مەن ستاندارتتاۋ، تەرميندەردى اۋدارۋ، تەرمين تۇزۋدەگى ۇستانىمدار تۋرالى عىلىمي جانە عىلىمي-كوپشىلىك، انىقتامالىق ادەبيەتتەرمەن، تەرمينولوگيا سالاسىندا جارىق كورگەن  سوزدىكتەرمەن تانىسا الادى.

سونداي-اق، سايتتىڭ باستى مىندەتى - قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق تەرمينولوگيالىق كوميسسياسىنىڭ بەكىتۋگە ۇسىنىلاتىن تەرميندەردى اشىق تالقىلاۋ جانە ولارعا داۋىس بەرۋ ارقىلى قوعامدىق قولجەتىمدىلىك پەن اشىقتىق قاعيدالارىن جۇزەگە اسىرۋدى قامتاماسىز ەتەدى.

جيىنعا زيالى قاۋىم وكىلدەرى، ءتىل جاناشىرلارى، ءتىلشى عالىمدار، سالا ماماندارى مەن باق وكىلدەرى قاتىستى.

اباي-اقپارات