تاۋەلسىزدىكتىڭ 25 جىلدىعىنا – 25 مەكتەپ! وبلىستاعى پايدالانۋعا بەرىلگەن وسى ءبىلىم نىساندارىنىڭ ەكەۋى شاردارا اۋدانىنا تيەسىلى. 

جاڭا وقۋ جىلىندا اۋداننىڭ ق.تۇرىسبەكوۆ اۋىلىنداعى ابىلاي الىمبەتوۆ اتىنداعى جانە قالاداعى قۇرمانعازى اتىنداعى جالپى ورتا مەكتەپتەرىنە قوسىمشا سالىنعان ەكى قاباتتى 200 ورىندىق جاڭا مەكتەپ عيماراتتارى سالتاناتتى تۇردە اشىلىپ، وقۋشىلاردىڭ يگىلىگىنە بەرىلدى.

ەكى مەكتەپتەگى شاراعا وبلىستىق ءماسليحاتتىڭ حاتشىسى قامىتبەك ايتورەەۆ پەن اۋدان اكىمى ارمان ابدۋللاەۆ قاتىسىپ، تۇرعىنداردىڭ قۋانىشتارىن ءبولىستى. ەلباسى ساياساتىنىڭ ارقاسىندا پايدالانۋعا بەرىلگەن قوس عيماراتقا قۇتتى بولسىن ايتىستى. 1 سىنىپقا قابىلدانعان وقۋشىلارعا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «مەنىڭ وتانىم – قازاقستان» اتتى كىتاپتارىن سالتاناتتى تۇردە تابىستاپ شىقتى.

ابىلاي الىمبەتوۆ اتىنداعى ءبىلىم نىسانى اۋدانداعى قاراشاڭىراق مەكتەپتىڭ بىرەگەيى بولىپ سانالادى.ىرگەتاسى 1928 جىلى قالانعان مەكتەپ-ينتەرناتتا، نەگىزىنەن، جەتىم بالالار مەن مالشى بالالارى ءبىلىم العان ەكەن. ەسكى نىسان 1974 جىلى ابدەن توزىعى جەتىپ، قۇلاعان. وسى جىلدارى مەكتەپتىڭ تىزگىنىن ۇستاعان ارداگەر ۇستاز اقىلبەك وسپانوۆتىڭ ايتۋىنشا سودان بەرى قانشاما جەرگە ءوتىنىش بىلدىرگەنىمەن جاڭا عيمارات سالۋعا ەشقانداي مۇمكىندىك بولماعان. كەڭەستىك داۋىردە ءساتى كەلمەگەن ءبىلىم ورداسىنىڭ باعى ەل تاۋەلسىزدىگىنىڭ 25 جىلدىعى اياسىندا جانىپ وتىر. جيىندا ا.وسپانوۆ ينتەرنات ۇلگىسىندە سالىنعان قاراپايىم عيماراتتا قىرىق جىلدان استام ۋاقىتتان بەرى تىعىلىسىپ بالا وقىتىپ كەلگەن ۇستازدار قاۋىمىن قۋانىشتارىمەن قۇتتىقتادى.

قالاداعى قۇرمانعازى اتىنداعى جالپى ورتا مەكتەپ ۇجىمىنىڭ دا قۋانىشتارىندا شەك بولعان جوق. ارداگەر ۇستاز، اۋىلدىق ارداگەرلەر كەڭەسىنىڭ توراعاسى مۇحامبەت مۇڭالباەۆ جاڭا مەكتەپ سالۋ جونىندەگى تۇرعىنداردىڭ وتىنىشىنە وڭ كوزبەن قاراپ، سوڭعى ۇلگىدەگى ەكى قاباتتى عيمارات سالۋعا قول ۇشىن بەرگەن بۇرىنعى اۋدان اكىمى قامىتبەك ايتورەەۆكە العىسىن جەتكىزدى.

ا. الىمبەتوۆ اتىنداعى ورتا مەكتەپتىڭ تابالدىرىعىن بيىلعى جىلى 47 ءبۇلدىرشىن اتتاسا، قۇرمانعازى مەكتەبىندە 82 وقۋشى 1 سىنىپقا بارىپ وتىر. ال، اۋدان بويىنشا 1985 وقۋشى مەكتەپ بوساعاسىن جاڭادان اتتادى.

ءبىلىم سالاسىنداعى مۇنداي يگى ىستەر الداعى ۋاقىتتا دا جالعاسىن تاباتىن بولادى. اۋدان اكىمى ارمان ابدۋللاەۆتىڭ ايتۋىنشا، جاڭا جىلعا دەيىن قالاداعى مۇناي بازاسى اۋىلىندا 60 ورىندىق، الاتاۋ باتىر اۋىلىندا 900 ورىندىق جاڭا مەكتەپتىڭ قۇرىلىستارى باستالماق.

Abai.kz