Facebook الەۋمەتتىك جەلىسىندەگى «كارىموۆتىڭ دەنساۋلىعى» (زدوروۆيا كاريموۆۋ) دەگەن پاراقشادا وزبەك حالقىنىڭ كوشباسشىسىنىڭ سوڭعى ءسوزى جاريالاندى. ءبىز سول پوستى اۋدارىپ، نازارلارىڭىزعا ۇسىنۋدى ءجون سانادىق.

سوڭعى پوست جانە مەن كەتىپ بارامىن

قۇرمەتتى، وزبەكستاندىقتار!

سىزدەردىڭ ماعان دەگەن قۇرمەتتەرىڭىز بەن سۇيىسپەنشىلىكتەرىڭىزگە العىس ايتقىم كەلەدى. ءبىز بۇكىل الەمگە ءوز پرەزيدەنتىمىزدى جاقسى كورەتىنىمىزدى، ول شىن مانىندە ارقايسىمىز ءۇشىن تىن قىمبات جان ەكەنىن دالەلدەدىك.

شەتەلدىڭ ءھام رەسەيلىك سىڭارجاق سايتتار يسلام كارىموۆ «ديكتاتور»، «تيران» دەپ قارالاپ جاتقاننىڭ وزىندە ءبىزدىڭ بۇكىل حالىق مۇنىڭ ءبارى جالعان ەكەنىن الەمگە ايگىلەدى.

وسىنى ۇزاق ۋاقىت جازىپ كەلگەندەردىڭ ءوزى حالىقتىڭ ماحابباتىن مويىنداۋعا ءماجبۇر بولدى.

مەن مۇنىڭ ءبارى تەك ءتۇس بولعانىن قالايمىن. مەنى وياتىپ جىبەرسە عوي دەيمىن. بىراق، امال نە، ءبارى شىنايى ومىردە بولىپ جاتىر.

بارلىق ادام بۇل ومىرمەن قوشتاسادى، مۇنى ءبارىمىز بىلەمىز. بىراق، ءبىز ءوز كوشباسشىمىزدىڭ ءتىرى ەكەنىنە، ءتىرى بولاتىنىنا سوڭعى ساتكە دەيىن سەندىك. سەنە بەرەمىز. ءبىز ونى تاعاتسىزدانا كۇتىپ، ونىڭ ميلليوندارعا تانىس داۋىسىن، ءسوزىن تىڭداعىمىز كەلدى، ونىڭ سول باياعى رياسىز كۇلكىسىن كورۋدى قالادىق.

بىراق، ەندى مۇنىڭ ءبىرى دە جوق. دەسە دە، ءبىزدىڭ پرەزيدەنت ءبىزدىڭ جۇرەگىمىزدە ماڭگىلىك ءومىر سۇرەتىن بولادى، يسلام كارىموۆ وزبەكستاننىڭ ماڭگىلىك پرەزيدەنتى! يسلام كارىموۆ اتاتۇرىك سەكىلدى وزبەك حالقىنىڭ اكەسى.

يسلام كارىموۆ – اكەلەرىمىز كوپتەگەن جىلدار كۇرەسىپ الىپ بەرگەن بوستاندىقتى بىزگە سىيلادى.

يسلام كارىموۆ – ميلليونداردىڭ ارمانىن سەزىندى.

يسلام كارىموۆ – ءدىني فاناتيكتەردىڭ ەلىمىزدى باسىپ الۋىنا جول بەرمەدى.

يسلام كارىموۆ – الەمدىك دەرجاۆا سانالاتىن مەملەكەتتىڭ ىرگەتاسىن قالادى.

يسلام كارىموۆ – 31 ميلليون حالىقتىڭ اكەسىنە اينالدى.

يسلام كارىموۆ – ەشقاشان دا ەشقانداي ءدىني ءھام ۇلتتىق ارازدىقتى ۋشىقتىراتىن ىستەرگە ارالاسقان جوق.

يسلام كارىموۆ – ۇلى كوشباسشى، ونىمەن تەڭدەسەر ەشكىم جوق.

ەگەر دە مەن بىرەۋلەرىڭىزدى رەنجىتكەن بولسام، كەشىرىم سۇرايمىن! دوستار، مەنى كەشىرىڭىزدەر، مەن تەك قانا ءبارىمىزدىڭ ءبىر بولۋىمىزدى عانا قالادىم. مەن بۇكىل الەمگە وزبەكستان ءوز پرەزيدەنتىمەن ماقتانسا دەپ ويلادىم، وعان دا قول جەتكىزدىم. سول ءۇشىن دە دوستار، سىزدەرگە راحمەت!

سىزدەرگە مىڭ العىس جانە تاعى دا كەشىرىڭىزدەر!

ورىس تىلىنەن اۋدارعان ءشارىپحان قايسار

Abai.kz