ەلباسىمىز 2020 جىلدارعا قاراي قازاقستان حالقىنىڭ جان سانى 20 ميلليونعا جەتۋى كەرەك دەگەن تىلەگىن ءجيى ايتادى. وسى رەتتە ەلدەگى دەموگرافيالىق احۋالدى جاقسارتۋ ءىسى قازىر جان-جاقتى قولعا الىنۋدا. سونىڭ ناقتى كورىنىسىن وڭتۇستىك قازاقستان وبلىسىنداعى يگى باستامالاردان كورۋگە بولادى.

قازاقستان رەسپۋبليكاسىنىڭ كونستيتۋتسياسى كۇنى وڭتۇستىك قازاقستان وبلىسى سوزاق اۋدانىنىڭ شولاق قورعان اۋىلدىق وكرۋگىنە قاراستى اباي ەلدى مەكەنىندە 50 ورىندىق جەكە مەنشىك «ايكوركەم» بالاباقشاسى اشىلدى. بۇل تۋرالى «اباي اقپارات» وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

جاڭا بالاباقشانىڭ اشىلۋ راسىمىنە اۋدان اكىمى ماقسات يساەۆ، دەپۋتاتتار مەن اۋىل تۇرعىندارى قاتىستى. نىساننىڭ سالتاناتتى اشىلۋ ساتىندە سويلەگەن اۋدان باسشىسى م.يساەۆ: «سوزاق اۋدانىندا «بالاپان» باعدارلاماسىنىڭ ورىندالۋ بارىسى جوعارى دەڭگەيدە بۇل بيىلدىققا اۋدان كولەمىندە اشىلىپ وتىرعان بەسىنشى بالاباقشا. تاياۋدا تاعى دا 280 ورىندىق بالاباقشا اشاتىن بولامىز» - دەپ جينالعان كوپشىلىكتى كونستيتۋتسيا كۇنىمەن قۇتتىقتادى. 

بۇرىنعى ەسكى مەكتەپتى بالاباقشاعا لايىقتاپ، قايتا كۇردەلى جوندەۋدەن وتكىزگەن نىسان قوجايىنى بالالاردى مەكتەپكە دەيىنگى مەكەمەمەن قامتىعاننان بولەك، جەرگىلىكتى 8 ادامعا جۇمىس بەرىپ وتىر. 
ايتا كەتۋ كەرەك، جاڭا وقۋ جىلىندا اتالعان اباي ەلدى مەكەنىندە 150 ورىندىق ءبىلىم وشاعى پايدالانۋعا بەرىلمەك. بۇگىندە ونداعى 88 شاڭىراقتا 576 ازامات تۇرادى. وڭتۇستىك قازاقستان وبلىسى، سوزاق اۋدان ورتالىعىنان 30 شاقىرىم قاشىقتىقتا ورنالاسقان.

اباي اقپارات