بۇگىن استاناداعى №2 ەسىل اۋداندىق سوتىندا سەيىتقازى جانە اسەت ماتاەۆتاردىڭ قىلمىستىق ءىسى بويىنشا باستى سوت وتىرىسى باستالدى. سوتقا توراعالىق ەتۋشى سۋديا اقبولات قۇرمانتاەۆ اۋەلى باستى ايىپتالۋشىلار – س. جانە ءا. ماتاەۆتاردان، ولاردىڭ قورعاۋشىلارىنان قىلمىستىق ىستەگى دالەلدەردى الىپ تاستاۋعا قاتىستى ءوتىنىشحاتتارىنىڭ بار-جوعىن سۇراپ ءبىلدى. سۋديانىڭ سۇراعىنا: ء«وتىنىشحات جوق» دەگەن جاۋاپ قايتارىلدى. ودان ارىدە سۋديا ايىپتاۋ اكتىسىن وقۋ ءۇشىن پروكۋرورعا ءسوز كەزەگىن بەردى.

مەملەكەتتىك ايىپتاۋشى ەرجان قۇراقباەۆ سوت وتىرىسىندا: «2011 جىلدىڭ باسىندا «ۇلتتىق ءباسپاسوز كلۋبى» قوعامدىق بىرلەستىگىنىڭ پرەزيدەنتى سەيىتقازى ماتاەۆ پايداكۇنەمدىك قىزىعۋشىلىقپەن زاڭسىز جولمەن بايۋدى كوزدەۋدى ويلايدى. ءوز قولىندا بار اقپاراتتاردى تالداي جانە سالىستىرا كەلە، س. ماتاەۆ «قازاقتەلەكوم» اق-نىڭ قاراجاتىن قىمقىرۋدىڭ جولىن ويلاستىرادى. وسى ماقساتتا ءوزىنىڭ بەدەلىن پايدالانا وتىرىپ «قازاقتەلەكوم» اق-نىڭ قىزمەتى جونىندە جارنامالىق-اقپاراتتىق ماتەريالداردى جارىققا شىعارۋ ءۇشىن «ۇلتتىق ءباسپاسوز كلۋبى» قوعامدىق بىرلەستىگى اراسىندا كەلىسىم-شارت جاسايدى. الايدا كەيىنىرەك، جارىققا شىققان ماتەريالداردىڭ قىزمەت قۇنىنا كەلگەندە «قازاقتەلەكوم» اق-نىڭ قىزمەتكەرلەرىن جاڭىلىستىرىپ، زاڭسىز جولمەن اقشا الادى. سونداعى جىمقىرىلعان اقشانىڭ كولەمى – 143 ملن. تەڭگە»، - دەپ حابارلادى.

مەملەكەتتىك ايىپتاۋشىنىڭ ايتۋىنشا، سەيىتقازى ماتاەۆ 2010-2015 جىلدار ارالىعىندا وزىمەن الدىن-الا سىبايلاسقان ادامداردىڭ توبىمەن بىرلەسە وتىرىپ، مەملەكەتتىك ساتىپ الۋ سالاسىندا بيۋدجەت قاراجاتىن قىمقىرعان. سونىڭ بارىندە الداۋ مەن سەنىمگە قيانات ەتۋ جولىمەن ارەكەت جاساعان. جارنامالىق-اقپاراتتىق قىزمەت سالاسىندا كاسىپكەرلىكپەن اينالىسۋ ماقساتىندا س. ماتاەۆ 2008 جىلى 19 ماۋسىمدا الماتى قالاسىنىڭ ادىلەت ورگاندارىنا «قازتاگ» حالىقارالىق اقپارات اگەنتتىگى» جاۋاپكەرشىلىگى شەكتەۋلى سەرىكتەستىگىن تىركەيدى. ء«وزىنىڭ قولىندا بار اقپاراتتارىن تالداي جانە سالىستىرا وتىرىپ، ماتاەۆتىڭ مادەنيەت جانە اقپارات مينيسترلىگىنىڭ اقپارات جانە مۇراعات كوميتەتىنىڭ لاۋازىمدى تۇلعالارىنىڭ وزىنە دەگەن سەنىمىنە قيانات ەتۋ جانە الداۋ جولىمەن مەملەكەتتىك اقپاراتتىق ساياساتتى جۇرگىزۋگە ارنالعان بيۋدجەت قاراجاتىن ۇرلاۋ جونىندەگى ارام نيەتى تۋىندايدى»، - دەدى سوت وتىرىسىندا ە. قۇراقباەۆ.

ونىڭ جاريا ەتكەنىندەي، بايلانىس، اقپارات جانە اقپاراتتاندىرۋ كوميتەتى مەملەكەتتىك اقپاراتتىق ساياساتتى ناسيحاتتاۋعا تەندەر وتكىزەدى. سول تەندەردى جەڭىپ الۋعا ۇمىتكەرلەردىڭ اراسىندا «قازتاگ» حالىقارالىق اقپاراتتىق اگەنتتىگى دە بولعان. الدىن-الا جاسالعان كەلىسىم بويىنشا، تەندەرلىك قۇجاتتار ءبىر عانا اسەت ماتاەۆ باسشىلىق ەتەتىن «قازتاگ» اگەنتتىگى جەڭىسكە جەتەتىندەي ەتىپ جاسالادى. الايدا، بۇل وسى سالاداعى زاڭنامانى ورەسكەل بۇزۋ بولىپ تابىلادى. كەلىسىم-شارت بويىنشا، «قازتاگ» مەملەكەتتىڭ ىشكى جانە سىرتقى ساياساتى، قارجىلىق سالا ينستيتۋتتارىن نىعايتۋ، ەلىمىزدىڭ قوعامدىق-ساياسي جانە الەۋمەتتىك-ەكونوميكالىق ءومىرى تۋرالى كولەمدى ماتەريالداردى جارىققا شىعارۋى ءتيىس بولعان. ماسەلەن، 2013 جىلى اگەنتتىكتەن كۇن سايىن كەم دەگەندە 5-7 ساراپتامالىق ماقالا، اپتاسىنا كەم دەگەندە ءۇش رەت وسى تاقىرىپتاردا ءارتۇرلى سۇحباتتار شىعارۋ تالاپ ەتىلگەن. ءىس جۇزىنە كەلگەندە ءبىر-ءبىر ماقالا، سۇحباتتار عانا جاريالانعان. ءتىپتى كەيدە مۇلدەم ەشقانداي ماتەريال جاريالانباعان. ول از بولعانداي-اق، اتقارىلعان جۇمىستاردىڭ اكتىلەرى تەكسەرىلمەي، انشەيىن «قول قويۋدان» ءوتىپ وتىرعان. سايىپ كەلگەندە، «قازتاگ» حالىقارالىق اقپاراتتىق اگەنتتىگى ارقىلى ۇرلانعان اقشانىڭ كولەمى 169 ملن. تەڭگەنى قۇرادى.

بۇعان قوسا، س. ماتاەۆ 2011-2015 جىلدار ارالىعىندا 216 952 683 تەڭگەنىڭ سالىعىن تولەمەدى دەپ ايىپتالىپ وتىر. ايتا كەتەلىك، بۇعان دەيىن ءمالىم بولعانى – س. ماتاەۆ كورسەتىلگەن سومانىڭ شامامەن 47. ملن. تەڭگەسىن مەملەكەتكە تولەپ قايتاردى.

ءامىرلان ءالىمجان

Abai.kz